Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎鄭加典(Tēⁿ ka-tián)
請咱來學白話字
毋通看輕B, Ch, Chh
讀若會曉真趣味
字母攏總拾柒字
早前傳教師創意
為上帝國傳道理
救贖台灣主子兒
飄洋過海無容易
為著保存咱母語
講話笑談鄉土味
使用外國羅馬字
創作台灣白話字
台灣－中國ê代誌
處境局勢真怪奇
飛機不時飛上天
吵鬧無分日kap冥
中國獨裁無天理
可惡踮佇咱厝邊
大事小事來相欺
有理無理常藐視
咱靠順趁主旨意
向望早日出頭天
兩岸文化相交纏
有關台灣ê文字
為著分別北京語
請咱來學白話字
Chhiáⁿ lán lâi o̍h pe̍h-ōe-jī,
M̄-thang khòaⁿ-khin B. ch. Chh,
Tha̍k ná ōe-hiáu chin chhù-bī,
Jī-bó lóng-chóng 17 jī.
Chá-chêng thoân-kàu-su chhòng-ì,
Ūi Siōng-tè-kok thoân-tō-lí,
Kiù-sio̍k Tâi-oân Chú kiáⁿ-jî,
Phiau-iûⁿ kòe-hái bô iông-ī,
Ūi-tio̍h pó-chûn lán bó-gí,
Kong-ōe chhiàu-tâm hiong-tó͘-bī,
Sú-iōng gōa-kok Lô-má-jī,
Chhòng-chok Tâi-oân pe̍h-ōe-jī.
Tâi-oân－Tiong-kok ê tāi-chì,
Chhú-kéng kio̍k-sè chin koài-kî,
Hui-ki put-sî poe chiūⁿ-thiⁿ,
Chhá-nāu bô hun ji̍t kap mî,
Tiong-kok to̍k-chhâi bô thiⁿ-lí,
Khó͘-òⁿ tiàm tī lán chhù-piⁿ,
Tōa-sū sió-sū lâi saⁿ-khi,
Ū-lí bô-lí siông biáu-sī,
Lán khò sūn-thàn Chú chí-ì,
ǹg-bāng chá-ji̍t chhut-thâu-thiⁿ.
Lióng-hōaⁿ bûn-hòa saⁿ kau-tîⁿ,
Iú-koan Tâi-oân ê bûn-jī,
Ūi-tio̍h hun-pia̍t Pak-kiaⁿ-gí,
Chhiáⁿ lán lâi o̍h pe̍h-ōe-jī.
