Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉Lōa Phek-chhong
Tang-bóe ê sî, thiⁿ-khì chin o͘-kôaⁿ, chhân ni̍h ê sit-thâu khah chió, chòe-chhân-hiaⁿ tio̍h thàn chit-sî chò chi̍t kóa gōa-sit-á, a-kong chio a-má chòe-hé khì tōa-kau hô͘ chháu-se, chún-pī chhia tńg lâi chhī chháu-hî, āu–lâi góa thiaⁿ-kóng hit tiâu tōa-kau kiò-chòe Liú-chhoan, in-ūi tng-tong-sî lō͘-chháu pháiⁿ-kiâⁿ, kàu tōa-kau piⁿ mā ài put-lí-á kú.
Hit-kang, in nn̄g kong-pô-á, khoán chi̍t-kóa bí-lôa kap nn̄g-ki jiàu-pê-á chiūⁿ lî-á-kah chhut-mn̂g, a-kong hū-chek thoa lî-á-kah, a-má tī āu-piah sak, khin-khin-khong-khong, khin-khin-khong-khong, ǹg hit-tiâu tōa-kau khì. Kàu Liú-chhoan ê kau piⁿ, nn̄g lâng piàⁿ-sì pê chháu-se, chò kah kōaⁿ lâu sám-tih, tán bí-lôa lóng té tīⁿ ê sî, nn̄g lâng chē tī thô͘-kha hioh-chhoán, a-má ê sim-lāi siūⁿ kóng, liâm-piⁿ nā tńg–khì ê sî, keng-kòe mī-tiàm-á, koat-tēng beh thó chi̍t óaⁿ mī lâi chia̍h, che m̄-chai beh jōa hó–leh.
Chháu-se móa-móa ê lî-á-kah, tāng-khoâiⁿ-khoâiⁿ, iân-lō͘ sìm–leh sìm–leh, a-kong tī thâu-chêng thoa, a-má tī āu-piah sak, in-ūi ài chhut-la̍t tō m̄-chai thiⁿ-khì léng, a-má ê pak-tó͘ iau kah ki-kū kiò, chit-sî iū-koh siūⁿ-khí hit óaⁿ hó chia̍h ê mī.
Kiâⁿ ah kiâⁿ, a-má hn̄g-hn̄g khòaⁿ-tio̍h ū chit-keng mī-tiám-á chhut-hiān, ba̍k-chiu thián tōa- lúi, chhùi-nōa khok-khok-thun. Bô phah-sǹg, a-kong kóng, āu-piah hit-keng khah hó-chia̍h, a-má siūⁿ tio̍h āu-piah hit keng ê mī khah hò-chia̍h tō jím-nāi koh kiâⁿ.
Kàu Āu-lêng-á chng-piⁿ, hit-keng mī-tiám-á chhut-hiān lah, a-kong kóng, “Chia ê só͘-chāi e̍h-chiⁿ-chiⁿ, bô tè thang khǹg chhia-á, nā-sī phàng-kìⁿ chhia-á, sī beh án-chóaⁿ? Lán tán àu chi̍t keng mī-tiám-á chiah lâi chia̍h hó–bô? ” Chit-chūn a-má sui-jiân bô sáⁿ hoaⁿ-hí, kha-kut mā chin sng, m̄-ku sim-lāi iáu-ū ǹg-bāng, tō kè-sio̍k jím-nāi tán-thāi, án-ni, nn̄g lâng tio̍h sak lî-á-kah koh kè-sio̍k kiâⁿ, kiâⁿ ah kiâⁿ, kòe chi̍t-khùn-á, a-kong tōa-siaⁿ hoah, kàu chhù ah…
Chit-chūn, a-má ê ba̍k-sái tih–lo̍h–lâi, i kā a-kong kóng, “Góa khah su hit khut chháu-hî, in iáu ū chi̍t-tǹg-pá”.
