◎LCM
阿成是一個猶大 ê 少年人，伊 kap 父母兄姊走分散去。
伊現在徛佇約沙法山谷（審判谷）ê 稜線，這時黑天暗地。伊看著山谷中，有一大陣外國軍隊馬上欲面對上帝 ê 審判，嚴肅 ê 氣氛互人真緊張、驚惶。
順著山谷看閣卡遠，有一個城佇半山崙。遐就是耶路撒冷，是阿成 ê 故鄉。
回想這一路行轉來，實在真奇妙，好親像一場夢。
面對公義 ê 審判
阿成 in 兜原來住佇耶路撒冷附近，家境普通，無偌大 ê 地通種作。逐擺收 ê 麥仔、無花果猶有夠全家吃，chhun ê 提去市場賣賺生活費，勉強有夠用。
卻是逐擺入城，阿成看著城內 ê 人愛飲酒醉，無敬拜上帝、sòa teh 拜別 ê 神明。伊著為 in 真著急，伊想「阮猶太人 ê 信仰 kap 道德，怎樣 hiah 敗壞？」
後來，先知約珥出現。伊喊聲，講上帝欲審判罪惡 ê 猶太人，伊差一大群草蜢來，毀壞所有 ê 農作物。
真正，有一日一大群草蜢對天降落，比軍隊閣卡互人著驚。無論人欲吃 ê 米糧、水果、菜蔬，閣精牲欲吃 ê 草料，攏互草蜢吃空空。
當大家哀哀叫苦、teh 枵腹肚、無力 ê 時，四周圍 hiah 個對敵 ê 國家（推羅、西頓、非利士、埃及、以東），竟然也派軍隊來，趁火打劫，將聖殿裡面值錢 ê 金銀寶物攏搶走。In m̄ 若 ài 錢，閣 ài 人。將耶路撒冷附近 ê 人掠走去做奴隸，或是賣互希臘人閣賺一筆。
阿成就是佇遮個混亂中，父母 chhōa in 遮個子趕緊逃走。Tú-á 走出 in 庄社，就互 hiah 個外國軍隊逐著。大家著散開走，免得全家互 in 攏掠著。
一個騎馬 ê 逐著阿成。伊聽著背後鞭仔噼一聲 sut 過來，閃袂過，疼 kah 昏倒去。等伊醒起來 ê 時，雙手攏用索仔綁 teh，邊仔 ê 人也 kap 伊像款手綁 teh。
伊看無著父母兄姊，到底 in 是生是死，攏̄ m̄ 知。阿成真傷心，足想欲哭，目屎含 teh，但是哭無出聲。
Hiah 個外國兵給 in 諸個掠著 ê 人牽 teh，排一隊，chhōa in 愈行愈遠。
上帝是我逃閃 ê 衛所
已經行幾天，算無到底行偌遠，阿成偷偷問邊仔同受掠 ê 阿叔，到底欲互 in 導到佗位？阿叔講伊略略仔聽有 in ê 話，「可能是欲將咱掠去賣。欲賣去佗位，嘛 m̄ 知？」阿成想想咧，「袂使！一定要逃走！」
有一晚休睏 ê 時，趁 hiah 個兵仔飲酒醉、無注意，阿成就用撿著 ê 瓦片坯，偷偷將索仔割斷，趕緊逃走。
但是有一個兵仔發現，就給伊逐。阿成心中只有想「主啊，救我！」伊 ê 腳就踏空，跛落山崁。身軀趴車輪幾十個，輪到山底。
等伊閣爬起來，全身軀是傷、痛 kah 欲死。但是好佳哉，外國兵無閣逐來。可能是暗唆唆，伊 m̄ 敢落來。阿成就 bih 起來。等到天光，真正無人閣來逐。
伊 m̄ 知欲怎樣，就祈禱、哭互上帝聽。目屎濕閣乾、乾閣濕，突然伊聽著有聲音共伊講：「轉去耶路撒冷，我會保護你。」伊相信是上帝憐憫伊、共伊講話指示。
阿成就用土共面抹黑黑，吚吚嗚嗚假作啞口乞食。經過有人家，就給人討飯吃。行佇荒郊野外，暗時就 bih 佇磅空睏。若是抵著豺狼，就爬去樹頂，或是 khian 石頭趕走野獸。
這 chōa 路阿成實在 m̄ 知欲怎樣行，伊只有祈禱上帝，求上帝做伊逃閃 ê 所在、做伊 ê 避難所；也求上帝引 chhōa 伊頭前 ê 路。
重建家園 ê 希望
現在，阿成伊真正行到約沙法山谷（審判谷），也看會著遠遠 ê 耶路撒冷城。伊卻發現二件奇怪 ê 代誌：
1）M̄ 若是阿成，伊閣有看著其他猶太人也拖著腳步來到這個山谷。看起來大家攏真累；但是目光攏充滿著希望。
2）也有真多外國軍隊來到像款 ê 山谷，卻是 in 亂嘈嘈。為什麼？因為天突然暗落來，地大振動。
閣有聲音佇山谷中迴響「恁就知我是耶和華──恁 ê 上帝，徛起佇錫安──我 ê 聖山者。彼時，耶路撒冷欲成做聖；外邦人無閣對伊 ê 中間經過。」（約珥書3章17節）
阿成 kap 遮個受掠轉來 ê 猶太人，聽著上帝宣布 ê 聲，目睭攏金起來。In 好親像看著一幅圖，上帝 chhōa 祖先以色列人出埃及、過紅海 ê 時 ê 情境。
公義 ê 上帝 ê 審判臨到囉！暴虐不義 ê 萬族怎樣逃脫上帝 ê 審判？
慈愛 ê 上帝 ê 拯救臨到囉！遭受苦難 ê 猶太人更加珍惜上帝 ê 拯救！
所以，阿成 kap 其他 ê 猶太人，in 欲向前行，向耶路撒冷 ê 方向繼續進前。In m̄ 驚 hiah 個曾掠走 in ê 外國軍隊，因為上帝的確會處置遮個軍隊。
雖然，耶路撒冷附近曾受著整陣草蜢破壞 kap 外族軍隊 ê thún 踏，是破敗不堪。想著遮個，豈是閣會加傷心？按呢，轉去欲 chhóng 啥？
但是上帝 ê 聲音閣對 in 講「當彼日，大山欲滴甜 ê 酒；小山欲流奶；猶大諸個溪、河攏有水 teh 流。欲有水泉對耶和華 ê 殿出來，潤澤什亭 ê 山谷。」（18節）
是啦！就照上帝 ê 應允轉去，見證上帝怎樣為 in 成就大事，重新恢復土地 ê 生命，成作「滴酒、流奶、流活水」 ê 好所在。
阿成本來猶閣煩惱，現在開始有笑容。伊足希望轉去故鄉。可能阿爸、阿母、兄姊比伊早一步已經轉去。大家閣會通團圓、作伙打拚、重建家園。
抑是阿成是上早到，伊會代先整理厝，重新種作，等厝裡 ê 人轉來，作伙來享受上帝所賜美好 ê 收成。
想著諸個，阿成充滿著希望，痠軟 ê 腳加足有力。其他 ê 猶太人也有 in 家己 ê 希望。總是，大家做伙向前邁進。
（靈感源自約珥書3章14～18節。這幾年中東及歐洲攏無平安。因為ISIS恐怖攻擊及敘利亞內戰，互真多無辜的人民要離開家鄉，千里迢迢逃走、偷渡去外國。佇路裡過程遭受痛苦、死亡。看著新聞，互咱真心酸。願上帝看顧！）
