【那teh褪色ê台灣俗話語】飯會使隨便食, 話 bē 使隨便講!

◎李南衡

「飯會使隨便食(pn̄g ē-sái sûi-piān chia̍h)」是咱祖先傳落來 ê 想法,我 mā 一直攏按呢想。有一工,葉榮鐘先生娘拍電話約我某一日早起 11 點去伊厝裡見面。11 點?莫非是 beh 請我食飯?果然,hit 工中晝頓,伊煮一桌鹿港 ê 手路菜,是我出世以來食過上好食 ê 一頓台灣菜。食飯了,葉先生娘才講:「恁 ojisan 有幾若箱 ê 遺稿,m̄ 知按怎處理 khah 好?」有 4 箱滿滿 ê 600 字 ê 原稿紙。我講:「是 m̄ 是會使 hō͘ 我 chah 一袋仔轉去台北,影印了看了,兩禮拜後 the̍h 來還你,才提出我 ê 建議。」先生娘用一 kha 塑膠袋仔 té 滿滿 ê 原稿交我。兩禮拜後照約束原稿交還先生娘。我講:「文稿看了,我 kā 分作幾類,上蓋濟 ê 是寫 ojisan 仝時代 ê 人,有伊 ê 長輩,朋友、親人。我建議編作一本台灣人物選集。」先生娘真客氣講:「李先生你按怎做,我攏同意。」Taⁿ 害 ah,一本冊 m̄ 是干單編輯、註解、校對,上要緊是 chhōe 出版社。1980 年代初期,chit 類有關台灣 ê 冊猶未受重視,啥人肯出版?好佳哉政治大學教授尉天驄拜託 in 姑丈 ê「帕米爾書店」來出版 chit 本《台灣人物群像》。為 tio̍h chit 本冊無閒幾個月,算是食一頓飯 ê 代價。Khah 奇怪 ê 是馬英九 tī 台北市長任內,有食過富邦銀行 ê 魚翅宴無?頭起先講無,hông chek 一下 ân,講有食一擺。敢一擺 niā-niā?兩擺。敢是兩擺?三擺。到底是五擺抑是六擺?五擺。一位台北市長無代無誌去 hō͘ 一間銀行請魚翅宴,而後 kā 趁錢、大間 ê 台北市銀行賣 hō͘ 細間 ê 富邦銀行,到今仔日馬英九猶一點仔代誌攏無。敢講「天下無白食 ê 中晝頓」,我食 ê 是中晝頓 bē 使隨便食,伊食 ê 是暗頓,暗頓 m̄ 是中晝頓所以無代價。Siáng 知影到底飯會使隨便食抑 bē?
我 70 外年 ê 歲月,有 38 年是生活 tī 白色恐怖 ê 戒嚴時期,當時台灣 ê 序大人真緊張,足驚序細隨便講話出代誌,十交代八交代「囝仔人有耳孔無嘴」。1975 年 10 月,參選中央民意代表增額選舉 ê 白雅燦,發傳單質疑行政院長蔣經國一寡問題,內底有「蔣介石遺產稅問題」、「要求蔣經國公布財產問題」,hông 掠去判無期徒刑,有影是「話 bē 使隨便講(ōe bē-sái sûi-piān kóng)」。Chit-má 佇台灣作官啥人敢無公布財產、抑是報了無實在?佇電視政治性談話節目中會 hông 罵 kah 臭頭。佇節目中啥物 siáu 話 mā 隨在人練。Siáng 講,話 bē 使隨便講?
英文字“paradox”意思是講:看起來那像矛盾 koh 假那正確,看起來那像 tio̍h koh 假那 m̄ -tio̍h。「飯會使隨便食,話bē 使隨便講」chit 句台灣俗語,那像是“paradox”。Chit 種台灣俗語話 beh 那有可能流傳落去咧!

廣告/聖經充滿我-經文填充本

我有話要說