◎何豐裕（岡山松年大學學員）
我退休以後，透過朋友紹介來松年大學，起初有一點仔排斥，旁聽了著決定報名。一目 nih 已經 4 年，逐樣 ê 課程攏有參加，可能是有歲 ah，效果有限，著按呢自我安慰，志在參與，無求收穫。逐種課程中我上有興趣就是羅馬字，可能是家己 ê 母語，比較無負擔，毋過深入探討，應該是蘇晏德老師教導有方，予我產生興趣。
蘇老師每擺上課，無惜辛苦，攏先教羅馬字發音，目看耳聽，漸漸受著啟發，其中上趣味 ê ──台灣孽詰仔話，譬如：阿婆仔生囝──誠拚、火燒豬頭──面熟、接骨師父──tàu 跤手等等！
其實予我上有興趣 ê 是，台語有文白音、一字雙發音，這佮華語破音字無仝，比如「樂」，佇華語有音樂（ㄩㄝˋ），快樂（ㄌㄜˋ），仁者樂（ㄧㄠˋ）山，「樂」各有無仝 ê 意思，毋過台語著無仝款，譬如華語 ê 毒（ㄉㄨˊ），佇台語仝款是寫毒字，就有兩種解釋，to̍k 佮 ta̍k，譬如砒霜足 to̍k、蝦仔足 ta̍k，佇句中寫蝦仔足毒，自然就會讀 ta̍k，無讀 to̍k，閣比如華語「臭」，台語臭字有兩種講法，你放屁足臭（chhàu），這尾魚 àu 去 ah，華語「抱」，台語 phō，對方雙跤離地，台語 lám 對方雙跤無離地，真濟真濟講袂完……。
蘇老師糾正阿公阿媽，講 m̄ 著 ê 一句話，拍斷手骨顛倒勇，佇遮「斷」逐家攏唸成 tn̄g，其實以前 ê 人攏講毋著，佇遮「斷」愛念做 chi̍h，tn̄g 是分開分成兩段，chi̍h 是無分開皮肉猶黏做伙，只是骨頭 chi̍h–去，事實上 chi̍h–去 ê 骨頭閣會當接合起來，是比以前較結實，所以若閣聽著這句，一定愛糾正拍 chi̍h 手骨顛倒勇。講甲一大堆，目的是 beh 鼓勵逐家來學羅馬字，會予各位學長學弟妹感覺羅馬字課程大碗閤滿墘。
