◎洪南吉
初代結婚
1.
Siōng-tè ēng thô͘ chō A-tong.
A-tong chhōa-bó͘ bô se-chong.
Hā-oa kè-ang lō͘ “chhun-kong”.
Ka-chài tōng-bu̍t ū “sek-bông”.
2.
Sîn ēng hia̍p-kut chō Hā-oa.
Bô sin-niû-bāng thang hó moa.
Sui-jiân bô lâng chhiùⁿ chiok-koa.
Tōng-bu̍t chiok-hō teh soan-hoa.
3.
Chi̍p-thé kiat-hun chho͘-tāi bô
Lō-thé kiat-hun hiān-tāi bô
Chho͘-tāi bô-ū môe-lâng-pô.
Hiān-tāi m̄-bián môe-lâng-pô.
4.
Khó-sioh lú-sèng toaⁿ chi̍t-ê.
A-tong bē-thang kéng pa̍t-ê.
Ka-chài lâm-sèng mā chi̍t-ê.
Bô-ū saⁿ-kak ê lân-tê.
5.
A-tong sui-jiân tòa lo̍k-hn̂g.
Bô kàu khoài-lo̍k ê lo̍k-hn̂g.
Chí-ū chi̍t lâng bô chiâu-chn̂g.
Su-iàu ū bó͘ chhōa ji̍p mn̂g.
6.
A-tong toaⁿ-sin chin ko͘-toaⁿ.
Siōng-tè kám-kak i bô-phōaⁿ.
Thiu-chhut hia̍p-kut chō Hā-oa.
Chiâⁿ-chò phit-phòe hō͘ i chhōa.
7.
A-tong Hā-oa beh kiat-chhin.
Bô chú-hun-jîn ê hun-in.
Iā bô chhin-iú kap kùi-pin.
Ka-chài tōng-bu̍t chò thè-sin.
1.
上帝用土造亞當
亞當娶某無西裝
夏娃嫁尪露「春光」
佳哉動物有「色盲」
2.
神用脇骨造夏娃
無新娘網通好幔
雖然無人唱祝歌
動物祝賀啲喧嘩
3.
集體結婚初代無
裸體結婚現代無
初代無有媒人婆
現代呣免媒人婆
4.
可惜女性單一個
亞當?通揀別個
佳哉男性嘛一個
無有三角的難題
5.
亞當雖然住樂園
無夠快樂的樂園
只有一人無齊全
需要有某娶入門
6.
亞當單身真孤單
上帝感覺伊無伴
抽出脇骨造夏娃
成做匹配互伊娶
7.
亞當夏娃欲結親
無主婚人的婚姻
也無親友佮貴賓
佳哉動物做替身
現代結婚
1.
Kiong-hí、kiong-hí、chin kiong-hí.
Siōng-tè só͘-tiāⁿ hó ji̍t-chí.
Kim- ji̍t nn̄g ke kiat liân-lí.
Chì-chhin hó-iú tâng hoaⁿ-hí.
2.
Sin-lông iân-tâu ū khì-phài.
Tiūⁿ-lâng tiūⁿ-ḿ kéng kiáⁿ-sài.
Sin-niû chin súi chhiūⁿ thiⁿ-sài.
Ta-ke ta-koaⁿ chin ì-ài.
3.
Jîn-kháu kiám-chió tio̍h kiám-thó.
Seⁿ-lâm io̍k-lú kiù pó-tó.
Kiáⁿ-jî chiū-sī thoân-ka-pó.
Pē-bó an-sim bián hoân-ló.
4.
Kim-tông gio̍k-lú taⁿ kiat-hun.
Nn̄g-lâng thàn-chîⁿ ēng ū chhun.
Kóaⁿ-kín chò lâng chīn pún-hūn.
Kong má kip-sèng ài phō sun.
5.
Kiat-hun chhiú-chí kòa kim-kim.
Hu-chhe it-seng lóng tâng-sim.
Ē hō͘ pháiⁿ-tâng piàn n̂g-kim.
Iā hō͘ Tâi-phiò piàn Bí-kim.
6.
Ang-bó͘ ài-chêng thn̂g-bi̍t-tiⁿ.
Nn̄g lâng khan-chhiú chhut-thâu-thiⁿ.
Ang-bó͘ ài-chêng ê kiat-chiⁿ.
Ha̍p-chok phah-piàⁿ kóaⁿ-kín siⁿ.
7.
Sin-lông thé-thiap bô koân-ui.
Sin-niû bí-lē ū kó͘-chui.
Hoa-chek tōng-pâng í-keng khui.
Kim-mî kā in sak-chò-tui.
8.
Siōng-tè phòe-ha̍p chin oân-bí.
Ài-chêng khui-hoe kiat kóe-chí.
Tâng-tiⁿ tâng-khó͘ tâng khiā-khí.
Ki-tok ka-têng taⁿ khai-sí.
9.
Kiat-hun kiàn-li̍p sin ka-têng.
Hu-hū tâng-sim lâi keng-êng.
Goān Chú sù-hok éng bô thêng.
Ín-chhōa jîn-seng ê lō͘-thêng.
10.
Siōng-tè phit-phòe sèng hun-lé.
Lâm lú kiat-hun chiâⁿ chi̍t thé.
Chhut-ji̍p lāi-gōa siông chò-hé.
Hō͘-chō͘ ha̍p-chok pó͘ tn̂g-té.
11.
Hiān-tāi siā-hōe ê te̍k-tiám.
Khoài-chhan khoài-chhia kap khoài-siám.
Kín-kip kiat-hun chin mō͘-hiám.
Pe̍h-thiô-kia-ló it-ti̍t kiám.
12.
It-kiàn chiong-chêng iā chin hó.
Put-kò khoài-hun sī ló-chhó.
Tn̂g-kî kau-pôe kap kî-tó.
Ài-chêng khui-hoe kàu kiat-kó.
1.
恭喜、恭喜、真恭喜
上帝所定好日子
今日兩家結連理
至親好友同歡喜
2.
新郎緣投有氣派
丈人丈姆揀子婿
新娘真媠像天使
乾家乾官真意愛
3.
人口減少著檢討
生男育女救寶島
子兒就是傳家寶
父母安心免煩惱
4.
金童玉女今結婚
二人趁錢用有剩
趕緊做人盡本分
公嬤急性愛抱孫
5.
結婚手指掛金金
夫妻一生攏同心
會互歹銅變黃金
也互台票變美金
6.
尪某愛情糖蜜甜
二人牽手出頭天
尪某愛情的結晶
合作拍拚趕緊生
7.
新郎體貼無權威
新娘美麗有古錐
花燭洞房已經開
今暝給拺做堆
8.
上帝配合真完美
愛情開花結果子
同甜同苦同徛起
基督家庭今開始
9.
結婚建立新家庭
夫婦同心來經營
願主賜福永無停
引導人生的路程
10.
上帝匹配聖婚禮
男女結婚成一體
出入內外常做夥
互助合作補長短
11.
現代社會的特點
快餐快車佮快閃
緊急結婚真冒險
白頭偕老一直減
12.
一見鍾情也真好
不過快婚是潦草
長期交陪佮祈禱
愛情開花到結果
