Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Ū chi̍t-pái, ha̍k-hāu hioh-joa̍h ê sî, tōa-lâng chhōa góa khì Tâi-lâm chng-kha chhin-chiâⁿ tau kiâⁿ-ta̍h.
Kàu hia liáu-āu, góa khòaⁿ-tio̍h chhù-chêng ū chi̍t-châng chin tōa-châng ê lāu soaiⁿ-á-chhiū, chhiū-téng soāiⁿ-á kia̍t kah lúi-lúi-lúi, chhiū-kha chin ām-ńg, sī hioh-liâng ê hó só͘-chāi.
Chiau-thāi lâng-kheh chia̍h soāiⁿ-á ê sî-kan nā kàu, tōa-lâng kah gín-á chi̍t-lâng chē chi̍t chiah sòe-chiah í-thâu-á, thâu-chêng ê thô͘-kha té chi̍t-phûn chi̍t-phûn ê soāiⁿ-á, chhin-chhiūⁿ beh pí-sài chia̍h soāiⁿ-á kāng-khoán, soāiⁿ-á chin-kàu-hun phang-bī pu̍t-lí-á siâⁿ-lâng.
Che sī góa siⁿ ba̍k-chiu m̄-bat khòaⁿ–kìⁿ ē tiûⁿ-bīn, sim-lāi kám-kak ū tām-po̍h-á kî-koài, in-ūi chiah tōa-phûn ê soāiⁿ-á sī beh hō͘ lâng chia̍h kah tiùⁿ-tō͘ sī–bô.
Siūⁿ-khí tī goán-tau beh chiau-thāi lâng-kheh chia̍h ké-chí ê sî, éng-éng sī kā ké-chí chhiat chhiat leh, khǹg tòa pôaⁿ-á pâi-lia̍t hó-sè, chi̍t-lâng ū chi̍t-pôaⁿ, nā ū lâng té kui bīn-tháng ê soāiⁿ-á chiau-thāi lâng-kheh, chi̍t-khòaⁿ hô-sóng koh khóng-khài, beh hō͘ lâng chia̍h kah kiò m̄-káⁿ ê hong-sek, si̍t-chāi chin chhù-bī.
Ōaⁿ chi̍t ē kak-tō͘ lâi khòaⁿ, bô-tek-khak sī chng-kha lâng pí to͘-chhī lâng khah khóng-khài, m̄-kiaⁿ lâng chia̍h, sui-jiân to͘-chhī lâng kán-ná khah iù-siù, m̄-ku góa kám-kak hō͘ lâng-kheh kui bīn-tháng ê soāiⁿ-á tōa-chhia-piàⁿ khah chhù-bī.
