◎鄭雅怡
請問有人thê屋下堅持同細人é講客無？Ngài-tên帶細人è來認識、聚會、共下來講客，為chho̍k細人é尋講客ke伴，營造全客語ke環境，串聯家庭，擴展到社區好無？
第二次世界大戰以後，台灣本土語言遽遽流失。根據2022年行政院客委會統計，台灣客家人口數大約466萬人，占全國總人口數ke 19.8%，雖然比往年增加，總係照2017年客委會ke「105年全國客家人口暨語言調查」，客家族群中13歲以下會聽、講客話ke比例分別只有31%同13%。照聯合國教科文組織發布ke語言活力評估標準（LVA），台灣ke客話屬於「第三級」，係「明確危險」。係準無極力搶救，怕40年過後，台灣就無人講客lé！到該時節台灣ke客家文化、客家認同、客家族群就漸漸衰退、滅絕lé！
解嚴以後，政府、民間用蓋多資源、心力，想愛復興本土語言，但係客話猶原持續加速流失。淨靠學校少少ke母語課、母語活動、母語影音節目等等其實果效盡有限。愛傳承客話定chho̍k愛將客話生活化，thê日常生活中落實，同細人è完全使用客話。故所家庭ke功能盡重要，大人儕ke態度盡重要。像頭到過身ke客家sên-pái曾貴海強調ke，「唯有堅持」，正做得抵擋華語ke浸水式侵透，為chho̍k後代ke客語基礎釘根。這me係台灣建國ke文化工程之一。
現下做復興客話ke工作定chho̍k愛認清台灣正係ngài-tên ke國家，m̀好親中舐共，ka無，客話傳承sa pûn中共「割韭菜」，無彩工lé。請大家同心惜台灣，煞猛救客話！
（作者為文字工作者）
