Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Góa ê piáu-só tī gín-á sî-tāi tòa tī Lâm-tâu Kok-sèⁿ ê lāi-soaⁿ. 1950 nî-tāi, i ê lāu-pē ùi Thong-siau poaⁿ-soaⁿ-kòe-niá khì hia khai-khún, ko͘ chi̍t chiah chhù khiā tī soaⁿ-téng, ùi in tau kàu soaⁿ-kha ê ha̍k-hāu kiâⁿ-lō͘ ài nn̄g-tiám-cheng kú, nā sī ēng pòaⁿ-káu-cháu ê, mā ài tiám-pòaⁿ-cheng, hit-chūn góa ê piáu-só iok-lio̍k sī chi̍t ê káu-hòe gín-á, tha̍k kok-hāu jī-nî. Piáu-só kóng:
“Hit chi̍t kang, thiⁿ tú phah-phú-kng, lāu-bú khoán chi̍t tàⁿ hóe-thòaⁿ, kiò i beh khì ha̍k-hāu ê sî, sūn-sòa taⁿ khì soaⁿ-kha ê tiàm-á bē.
Góa ê sim-lāi sui-jiân chin m̄-goān, mā m̄-káⁿ the-sî, in-ūi chá-chêng bô bē mi̍h-kiāⁿ ê keng-giām, m̄ chai beh án-chóaⁿ bē hóe-thòaⁿ, hóe-thòaⁿ nā bē liáu, koh ài ē-hù khì ha̍k-hāu, siūⁿ kah chia, ba̍k-sái tō kiông- beh tih–lo̍h-lâi.
Sî-kan chi̍t-tiám-chi̍t-tuh leh kòe, hoân-ló mā bô-lō͘-ēng, tio̍h ēng kín ê kha-pō͘ cháu lo̍h-soaⁿ, kàu soaⁿ-kha tiàm-á ê sió ke-lō͘, o̍h bē-chhài ê tōa-lâng, kín kiâⁿ kín hoah. Bē hóe-thòaⁿ, Bē hóe-thòaⁿ oh. Hóe-thòaⁿ chi̍t-kin saⁿ-kak-gîn.
In-ūi kiaⁿ pháiⁿ-sè, lú hoah lú sòe-siaⁿ, kín-tiuⁿ kah kōaⁿ-lâu sám-tih. Ū lâng hiâm hóe-thòaⁿ kè-siàu siuⁿ kùi, ū lâng kóng hóe-thòaⁿ siuⁿ bái, hit-sî góa si̍t-chāi m̄-chai beh án-chóaⁿ ìn-tap chiah hó.
Khì ha̍k-hāu ê sî-kan beh bē-hù ah, hóe-thòaⁿ iáu-bē bē–chhut-khì, góa sim-koaⁿ sng-sng, ba̍k-sái ná lâu. Hó-ka-chài, chit-sî ū chi̍t ê hó-sim ê bí-tiàm a-sáng khòaⁿ–tio̍h, m̄-kam chit ê khó͘-liân ê cha-bó͘-gín-á, i kā hóe-thòaⁿ lóng-chóng bé–khì, hit-sî, góa ē-tàng kóaⁿ-kín khì ha̍k-hāu, koh pài-thok a-sáng hō͘ góa kià hóe-thòaⁿ láng-á tī hia, nā bô án-ne, láng-á kōaⁿ khì ha̍k-hāu ē hō͘ lâng chhiò, tán pàng-o̍h ê sî, chiah koh khì the̍h tńg–lâi. Pàng-o̍h liáu-āu, góa khì the̍h láng-á, sūn-sòa bé a-bú kau-tài ê mi̍h-kiāⁿ, chiūⁿ-soaⁿ tńg–khì, chit-khoán kín-tiuⁿ, kiaⁿ-hiâⁿ ê kì-tî, kàu taⁿ ū-sî iáu ē tī góa ê bāng tiong chhut-hiān.”
