◎鄭雅怡
半隻月前做禮拜唱《聖詩》〈吾主，吾救主，𠊎盡愛得完全〉，唱tó複歌「比雪較白！淨浰比雪白！求主洗淨𠊎，pûn𠊎比雪較白」，ngài突然愐tó最近前台北市長、民眾黨主席柯文哲涉入京華城案同其他四、五隻貪汙圖利案。柯文哲主導ke「白色力量」、民眾黨ke象徵色身白色斷真係kha容易屙糟？9月初5臨暗，柯文哲受扣押，掛手銬，坐囚車，到土城看守所該時，盡多民眾thê該位等候，phok手歡呼，慶祝正義臨到。這情景pûn人感慨，me成做大家ke警誡：係準無核心價值，無道德堅持，就算權勢ngióng-é大，到尾me致到毀滅。
2014年太陽花學運過後，柯文哲趁勢興起新ke改革清流「白色力量」，tap並當選台北市長。 2019佢成立民眾黨， 2024競選總統。總係，柯文哲從政chhiuk-khói無理想，連做人ke基本原則都無，淨計較ngióng-é鬥爭來得tó權力、私利。透過網路炒作，佢製造聲量，顛倒是非，將民主阿丑伯化，迷惑後生世代。過kha慘ke，佢疑似串通中共，連同民眾黨、國民黨攪亂國會，破壞台灣民主，危害台灣社會ke基礎，今下又涉嫌數件貪汙案。柯文哲接常誇口佢係台大醫生，智商157。但係kiâ所做證實，佢對台灣ke傷害贏過貢獻，實在無能無德，驕傲又戇檔。Kiâ政治生命已經死het。
半隻月前牧師講道強調，上帝為chho̍k基督徒cho̍k一領清淨ke白袍。Ngài恬恬思考，係準雪白ke袍淨khièm-tén表面，底下ke屙糟照原，無經過真誠ke反省、悔改來洗het，án-nê白色無定chho̍k表示kha純潔、 kha清淨。 （本文為南四縣腔客話、作者為語言研究者）
