◎蘇聖詠
永康城 大學城
台南科大有名聲
崑山南台真時行
培養人才向前行
Éng-khong-siâⁿ tāi-ha̍k-siâⁿ
Tâi-lâm kho-tāi ū miâ-siaⁿ
Khun-san Lâm-tâi siōng sî-kiâⁿ
Pôe-ióng jîn-châi hiòng-chêng-kiâⁿ
永康城 懷古城
埔羌頭是古早名
永康車頭真有名
永保安康結親情
Éng-khong-siâⁿ hoâi-kó͘-siâⁿ
Po͘-kiuⁿ-thâu sī kó͘-chá-miâ
Éng-khong chhia-thâu chin ū miâ
Éng-pó an-khong kiat-chhin-chiâⁿ
永康城 菜頭城
全國產量排有名
焄湯曝乾共人唌
發展經濟望你成
Éng-khong-siâⁿ chhài-thâu-siâⁿ
Choân-kok sán-liōng pâi ū-miâ
Kûn-thng pha̍k-koaⁿ kā lâng siâⁿ
Hoat-tián keng-chè bāng lí chhiâⁿ
永康城 遺蹟城
三崁店糖廠留名
樹欉蔭影規大坪
先人跤跡佇遮行
Éng-khong-siâⁿ ûi-chek-siâⁿ
Saⁿ-khàm-tiàm thn̂g-chhiúⁿ lâu-miâ
Chhiū-châng ìm-iáⁿ kui tōa-phiâⁿ
Sian-jîn kha-jiah tī-chia kiâⁿ
永康城 資產城
王藝明木偶出名
口白特技真奢颺
保留資產全民贏
Éng-khong-siâⁿ chu-sán-siâⁿ
Ông Gē-bêng bo̍k-ngó͘ chhut-miâ
Kháu-pe̍h te̍k-ki chin chhia-iāⁿ
Pó-liû chu-sán choân-bîn-iâⁿ
永康城 運動埕
教育公園挑戰營
園區內底自由行
體能訓練的大埕
Éng-khong-siâⁿ ūn-tōng tiâⁿ
Kàu-io̍k kong-hn̂g thiau-chiàn-iâⁿ
Hn̂g-khu lāi-té chū-iû kiâⁿ
Thé-lêng hùn-liān ê tōa-tiâⁿ
永康城 關懷城
主的教會有好名
兒童教育大本營
社區營造作伙行
Éng-khong-siâⁿ koan-hoâi-siâⁿ
Chú ê kàu-hōe ū hó-miâ
Jî-tông kàu-io̍k tōa-pún-iâⁿ
Siā-khu êng-chō chò-hóe kiâⁿ
永康城 工商城
台南人口第一名
工商文教的大廳
有閒請來永康行
Éng-khong-siâⁿ kang-siong-siâⁿ
Tâi-lâm jîn-kháu tē-it-miâ
Kang-siong bûn-kàu ê tōa-thiaⁿ
Ū êng chhiáⁿ lâi Éng-khong kiâⁿ
