Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◎William Barclay
台譯◎陳惠雅
若beh tī福音書以外ê傳說抑是教會傳統中間考察馬太，實在有困難。逐个故事lóng無啥仝款，傳奇ê內容有時mā真譀古，而且有ê故事、傳說kā馬太kah馬提亞lām-chham做伙講（使徒行傳1章26節），實在hō͘人m̄敢提來做通靠ê資料。M̄-koh，咱mā是ài kā chia-ê故事照in本來ê款式收錄lo̍h來。
馬太siōng早講道ê所在是tī猶大，伊ǹg家己故鄉ê人傳福音，koh為tio̍h in kā耶穌ê教示記錄lo̍h來（Eusebius, The Ecclestastical History, 3.24.5）。根據蘇格拉底（Socrates）ê講法，使徒分配工作範圍ê時，馬太分配tio̍h ê是衣索比亞（Socrates, The Ecclesiastical History, 1.19; cp. Rufinus, 1.9）。安波羅修（Ambrose）bat講馬太kah波斯、諾拉ê包利蕗斯（Paulinus of Nola）、帕提亞（Parthia）、伊西多（Isidore）以及馬其頓（Macedonia）chia-ê所在有關連。關係馬太ê死亡，逐款記錄mā無相仝，亞歷山大ê革利免指出，馬太是自然死亡ê（Clement of Alexandria, The Miscellanies, 4.9）。根據革利免留lo̍h來ê資料，馬太食菜，伊食ê是種子、果子ê核kah菜蔬，伊無食肉（Clement of Alexandria, The Miscellanies, 2.1）。Tī猶太法典（Talmud）內底有一个傳說，講猶太公會（Sanhedrin）判馬太死刑，幾年後koh有一个傳統講馬太是殉道死ê。人毋知影基督教信仰拄開始ê時陣，福音tī馬太身上產生啥款功效。
關係馬太ê所做kap事工，siōng kài出名ê傳說thang講是《安得烈kah馬太行傳》（Acts of Andrew and Matthew），這个故事ē出名毋但因為譀古，mā因為安格魯撒克遜ê詩人辛呢羽夫（Cynewulf）kā寫做安格魯撒克遜（Anglo-Saxon）ê詩文。故事按呢講，馬太hŏng派去ē食人肉ê國家，「食人國ê人m̄食麭、m̄啉酒，kan-na beh食人肉、啉人血」，in挖生份人ê目睭，用藥仔kā人麻醉、hō͘ in失去知覺，sòa接koh kā in關三十工，了後才食。In tō是án-ne對付馬太，無疑悟，藥仔無hō͘馬太失去知覺，上帝ê氣力hō͘馬太ê視力koh恢復，hia-ê顧監ê lóng m̄知。馬太繼續受關tī監獄，一直到第二十七工寄罪（緩刑）ê日子過去。
接sòa，安得烈收tio̍h神諭，吩咐伊去救馬太。伊kan-taⁿ三工ê時間thang趕路。馬太kap伊ê朋友到海岸，拄tio̍h一隻船、一个tāi-kong（舵公）kah兩个船員，in tō是耶穌kah兩个天使。頭起先，安得烈無認出耶穌，in做伙坐船出帆。無偌久，in tn̄g-tio̍h大風雨，安得烈安慰hia-ê kah伊仝船ê朋友，而且kā in講耶穌án-chóaⁿ平靜風湧ê故事。Hit ê tāi-kong ê安穩，hō͘安得烈感覺真特別，講：「我行船十六冬久，這是我第十七擺出海，m̄-koh m̄-bat看過親像你這款ê tāi-kong，這船行tī海面bōe輸tī平地hiah穩！」Tāi-kong應講：「海知影你是耶穌ê門徒，所以恬靜lo̍h來。」In koh談論一寡仔代誌，船行到食人國ê海岸，hit時安得烈睏去ah。伊醒起來ê時，in已經上岸，伊才知影hit ê tāi-kong是啥人。耶穌koh就近伊，鼓勵伊繼續ǹg前。安得烈到馬太ê監牢hia，祈禱了後，七个顧監ê lóng死去，tī十字架ê異象中，監獄ê門忽然拍開，馬太kah受關監ê兩百七十个查埔人，kap四十九个查某人lóng脫離hǒng thiah-chia̍h lo̍h-pak ê運命，得tio̍h敨放。馬太逃走，m̄-koh安得烈soah留lo̍h來，拄開始，伊是隱藏起來ê，人看袂著伊，接紲落來，安得烈tī人面前顯現。In ka虐待幾若工，刁工無beh斬伊ê頭，驚伊死了siuⁿ輕鬆，就ka拖去街仔路，拆伊ê身軀，掖伊ê血。安得烈ê血流到塗跤，大欉ê果子樹攏活起來。In koh kā安得烈關監。監獄內面有chhāi一仙偶像，安得烈摸tio̍h hit仙偶像ê時，ùi偶像ê喙內流出恐怖ê大水，見若hō͘ 大水kha̍p-tio̍h ê物lóng hō͘大水沖了了。Hia-ê人想辦法beh逃走，m̄-koh，有火牆出現擋tī in頭前，hit時，in才反悔。安得烈tō留lo̍h來，tī hia kā in教示七工。
關係馬太ê殉道，有故事按呢講：馬太koh tńg去食人國，想beh教化hia ê人，伊m̄-nā趕鬼，mā行真濟奇妙ê事。國王怨妒馬太，叫人kā伊掠起來，用浸過海翁油ê紙草包包leh，koh kā lâm硫磺、糊打馬膠，kā伊縛tī麻仔草kah柴堆頂面，kā百姓所拜ê十二仙金像chhāi tī伊身軀邊，ka圍起來。點著ê火soah變做1滴1滴ê水；火焰噴出來，kā金偶像燒kah熔了了。路尾，火焰成做龍ê形象，去jiok hit个國王，kā in逼入去王宮內底，火舌tī國王ê四圍燒kah足炎，hō͘伊bē tàng tín動，「hit時，馬太tō責備火，祈禱，koh停止hia-ê幻影。」Chia-ê事了後，馬太koh行真濟奇事，直到國王反悔，成做一個牧師。路尾，「馬太kah兩个天使做伙升去天頂。」
Chia-ê傳奇故事聽起來有夠怪奇，m̄-koh in背後所蘊藏ê事實是：馬太熱心傳揚福音，為耶穌基督犧牲性命。在人看，可能無比馬太這款koh-khah顧人怨ê人，m̄-koh tī耶穌手內，伊成做先鋒，siōng早kā耶穌ê教示寫lo̍h來。伊是福音使者，是信仰ê英雄！ (全文結束)
延伸閱讀：主 ê 門徒
