Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhongû
Àm-tǹg liáu, a-bú chio góa chòe-hé khì sian-siⁿ in tau sàng-lé. Khì sian-siⁿ in tau ài keng-kòe àm-sàm ê Khu-chhù-á-po͘, siūⁿ kàu chia, sim-lāi tō hoân-ló. In-ūi hit-chūn Tâi-tiong pin-gî-koán tú-tú beh heng-kiàn, bōng-á-po͘ ài chhian-sóa, tī bōng-po͘ ê lō͘-piⁿ, ē khòaⁿ-tio̍h ēng tê-kho͘ siuⁿ-á té chi̍t-siuⁿ chi̍t-siuⁿ teh pha̍k-ji̍t ê kut-hâi. Ta̍k-pái ha̍k-hāu pàng-o̍h, goán ē keng-kè hia, hit-chūn ta̍k-ke lóng kiaⁿ kah tiām-chuh-chuh, bē-su ē hō͘ kúi thoa–khì.
Góa leh siūⁿ, bô-tek-khak sī a-bú kiaⁿ bô-phōaⁿ, chiah ē chio góa chòng-táⁿ, chòe-tīn kiâⁿ.
Hit-kang àm-mê bô goe̍h-kng, sì-kè àm-bong-bong. A-bú ê tò-chhiú the̍h chi̍t-ki chhiú-tiān-á, chiàⁿ-chhiú kōaⁿ tán-lō͘, góa tòe tī i ê kha-chhng-āu kiâⁿ. Iân-lō͘ seng keng-kòe kui-khu chhài-hn̂g, chi̍t-tiâu chúi-kau, kah kúi-lōa tek-bô͘, bōng-á-po͘ tō kīn–ah. Sòa–lòe, chi̍t-chō chi̍t-chō ê hûn-bōng chiām-chiām chhut-hiān, lâng o͘-pe̍h tàn ê pùn-sò chi̍t-tui chi̍t-tui, i kah móa-sì-kè. Pùn-sò tī chá-sî hō͘ ji̍t-thâu pha̍k kè sán-seng ê hú-pāi khì-bī kàu àm-sî iáu-bē sòaⁿ-khui, si̍t-chāi chin pháiⁿ-bī, jiáu-loān lâng ê sim-chêng, hō͘ lâng chin bô sóng-khoài.
Hit-sî, hn̄g-hn̄g thoân-lâi chhoe-káu-lê ê siaⁿ, góa ê sim-chōng ná-chháiⁿ ná-kín, kám-ka̍k āu-piah ū m̄-chai ê mi̍h-kiāⁿ leh tòe–góa. “kám ē sī kúi-á leh jio̍k?” Ná-siūⁿ ná-kiaⁿ, lú-kiâⁿ-lú-kín, kiaⁿ kah kui sin-khu ê bah-mo͘ lóng chhàng–khì-lâi. Bô-gî-ngō͘, góa koh hiông-hiông that-tio̍h chi̍t ê tâng-kóng-á, chhoah-chi̍t-tiô, tōa-siaⁿ ai–chhut-lâi.
A-bú mā hō͘ góa kiaⁿ–tio̍h, oa̍t-thâu mn̄g góa sī án-chóaⁿ? Chit-sî góa chiah chiām-chiām hôe-hûn, sim-lāi bān-bān-á tiām-chēng lo̍h–lâi. Āu–lâi, góa koh siūⁿ–khí-lâi, mā kám-kak hó-chhiò, hit-chūn nā-sī ū kúi tī āu-piah, mā m̄-chai sī lâng kiaⁿ kúi á-sī kúi kiaⁿ lâng.
