Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Sih Chì-kéng
Chhiau-kè pòaⁿ sè-kí í-chêng, góa tī kò͘-hiong Ông-Keng Kàu-Hōe jî-tông chú-ji̍t-o̍h ha̍k-si̍p Pe̍h-ōe-jī. Kiám-chhái che sī Chú phah-sǹg thàn góa iáu gín-á ê sî kì-sèng khah hó, iông-ī siū chong-pī, ūi góa kin-á-ji̍t beh chiâⁿ-chòe Sin-Tiàm Kàu-Hōe Sèng-keng ha̍k-hāu pe̍h-ōe-jī lāu-su só͘ pī-pān–ê.
Chiū tī kū-nî (2023) bó͘ chi̍t-ê Chú-ji̍t, Sèng-keng ha̍k-hāu Khu hāu-tiúⁿ ūi-tio̍h an-pâi ē-ha̍k-kî pe̍h-ōe-jī lāu-su ê tāi-chì, chhéng-sī kàu-io̍k pō͘ Ú tiúⁿ-ló ê sî, pō͘-tiúⁿ ti̍t-chiap thui-chiàn góa lâi tam-tng, góa mā lo̍k-ì sêng-tam chit hāng êng-iāu ê jīm-bū.
Ú tiúⁿ-ló ē chhui-chiàn góa, khí-in sī góa chiam-tùi kàu-hōe tī 2021/12/19 chēng-sàng hōe-iú chi̍t hō͘ chi̍t pún Hiān-tāi Tâi-gú E̍k-pún Sèng-keng (Hàn-Lô Pán) ê tāi-chì, ēng LINE phah Pe̍h-ōe-jī kap i kau-tâm, thàm-sûn kî-tiong ê bo̍k-te̍k kap Tâi-oân Ki-tok Tiúⁿ-ló Kàu-hōe tī chhui-hêng Tâi-gí eng-kai tio̍h chòe–ê, hoat-piáu góa kò-jîn ê khòaⁿ-hoat, mā thó-lūn tha̍k chit pún Sèng-keng só͘ tú–tio̍h ê gî-būn. Chiū án-ne, i chai-iáⁿ góa bat Pe̍h-ōe-jī.
Góa tap-èng chiap-siū jīm-bū tong-mî, tiō chē tiàm tiān-náu chêng khai-sí su-khó kàu-ha̍k lōe-iông í-ki̍p chún-pī kàu-châi.
Tē it chiat khò khí-thâu kiông-tiau Tâi-gí í-keng óa-kūn gûi-kip ê kai-tōaⁿ, nā bô thàn chá chhiúⁿ-kiù chiok kín tiō ē siau-sit; sòa-chiap kóng tio̍h kàu-hōe khui chit mn̂g khò ê iōng-ì, chiah koh lâi chi̍t ê tōa-tōa ê sìn-sim kó͘-lē.
Khò-thêng ùi jīn-bat jī-bú khai-sí, koh lâi hoat-im, ho͘-im, siaⁿ-tiāu, ji̍p-siaⁿ, í-ki̍p piàn-tiāu, chóng-kiōng chiah 3 tiuⁿ A4 ê káng-gī (ia̍h tiong phû-chúi-ìn “practice makes perfect”; ia̍h bé ìn “where there’s a will, there’s a way”).
Ûi-kî 12 lé-pài, kî-tiong lô-im G kap phīⁿ-im NG nn̄g ê hoat-im í-ki̍p siaⁿ-tiāu chiâⁿ-chòe tōa-pō͘-hūn lâng ê khùn-lân; lēng-gōa ê khùn-lân sī siū Eng-gí ê hoat-im si̍p-koàn kiáu-jiáu, tì-sú ho͘-im tiāⁿ-tiāⁿ chhò-ngō͘. Keng-kè kúi chiat khò ê ló͘-le̍k, bô-lūn Soan-tiàu, Khé-èng a̍h-sī Sèng-keng chat, ta̍k-ke lóng ē-tàng liām kah chin lìn-tńg.
Tē jī ha̍k-kî chiam-tùi chheng-liân chip-sū í-ki̍p kî-thaⁿ siūⁿ beh o̍h ê hōe-iú ke khui Chú-ji̍t (làng lé-pài) e-tàu 1 tiám ê pan, lōe-iông phian-tiōng tī jīn-bat Pe̍h-ōe-jī. Bô-kâng-khoán ê sī téng ha̍k-kî ê khùn-lân-tiám bô chiâⁿ-chòe chit pan ê būn-tôe, só͘-í góa kā chit pan chheng-chòe “cheng-eng pan”. Kî-tiong iau-kiû múi chi̍t ê ài ē-hiáu siá ka-kī ê miâ-jī; kî-bé ta̍k ūi ài kau chi̍t phiⁿ 50 jī í-siōng ê sim-tit pò-kò chòe ha̍k-si̍p sêng-kó ê chham-khó.
La̍k-ge̍h té tē-jī ha̍k-kî ê khò-thêng chiū tī chi̍t-kóa lâng chiong Tâi Oân Kàu-hōe Kong-pò 3772 kî ê Tâi-bûn Sè-kài hit-phiⁿ “Sái-ha̍k-á ê ‘ok-bāng’” khòaⁿ-chòe “o͘-pang” á-sī “OK band” ê chhiò-siaⁿ tiong kiat-sok.
Chim-giân 16:31, kóng
“Pe̍h thâu-mn̂g sī êng-iāu ê hoa-koan, si̍t-hêng kong-gī chiah ōe tit–tio̍h.”
Chim-giân 20:29 mā kóng,
“Ióng-kiāⁿ sī siàu-liân-lâng ê êng-kng; pe̍h thâu-mn̂g sī lāu-lâng ê kong-chhái.”
