Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
踏話頭：20世紀初，新竹湖口ê客家望族張七郎全家遷徙到花蓮鳳林khiā起。1947年4月初四，張七郎kap伊ê三個hāu-seⁿ，長男宗仁、次男依仁和三男果仁，爸á囝四个醫生做伙hō͘蔣介石ê軍隊掠–去。當暝張七郎和宗仁、果仁tī鳳林第一公墓hông苦毒、槍殺。次男依仁hông關三月日才放–出來。以下ê記錄根據2018年12月初二tī台灣基督長老教會台中中會民族路教會kā張依仁ê長女張惠滿做ê訪談。感謝林蓉蓉姊牽線，mā感謝惠滿醫師連食晝、駛車載góa去in老母ê住所，to一直和góa分享。
記錄整理◎Tēⁿ Ngá-î
Góa號做張惠滿，是228受難者張七郎（1888-1947）ê第二hāu-seⁿ張依仁（1919～2011年）ê大漢查某囝。Góa和小妹芳滿、小弟立滿分別tī 1950、1953、1958出世。細漢ê時goán tòa tī淡水，goán老爸tī chia開業，做小兒科醫生，一直到góa 13歲讀初二，chiah kap老母許梅（1920～2020年）、小弟、小妹坐船去巴西。
Iáu tī淡水ê時，阿爸就發現國民黨不管時to teh kā伊監視，甚至一再kā伊khún-tio̍k、騷擾。身兼228 ê「倖存者」和遺族，阿爸特別警醒。伊懷疑國民黨kiám-chhái想beh koh對伊落手，kā張–家總滅，若án-ne，koh留tiàm台灣就無安全ah。Sòa–落來阿爸代先去日本探路，chiah koh去巴西替規家伙á鋪排好勢。1963年，阮母á囝四個人，搭船兩個月，經過日本等幾ā個國家，chiah到tī巴西ê聖多市（Santos）。初初到hia，goán姊弟á一句巴西話（葡萄牙語）to bē曉講。阿爸就kā goán教。此後góa tī巴西tòa 17冬，一直到1980 góa chiah離開。
巴西是移民組成ê國家。巴西人民ê祖先來自歐洲、非洲、亞洲等chōe-chōe族群，所致in ê腹腸開闊，對新移民歡喜接納，bē kā看輕。Goán攏認為巴西是好所在，真好tòa。總–是因為話語bē通，góa姑不將tùi小學三年讀起，芳滿mā tùi小學二年重新開始。Ka-chài goán gín-á真緊就o̍h會曉在地語言，m̄-kú媽媽tō khah無法度適應ah。
Hit-sî goán iáu少歲，窮實m̄知影為何故hiông-hiông hông chhōa來巴西，m̄-niā語言文化、生活環境全然生疏，連家庭經濟mā產生極大ê變化。以早tī台灣goán m̄-bat teh操煩厝–裡有錢thang用無。搬來巴西了，全家ê食穿soah tio̍h節制，chiah勉強會得過。阿爸tī巴西無行醫執照，chiâⁿ pháiⁿ趁食。Hit陣bat聽伊提起，想beh去一個「日本人ê集團」做醫生，因為巴西ê日本移民真chōe，「日本村」有 teh欠用醫生。
雖罔來到巴西，阿爸感覺國民黨ê迫害猶原tòe teh來，m̄放伊soah。有一工阿爸hiông-hiông無–去，自按呢七、八冬音信全無，連耶穌生(Christmas) to無寄chocolate hō͘阿母。無一個人知影阿爸到底走去tó位，是生抑是死。總–是，阿母chiâⁿ有耐性，一直用包容ê心來聽候。照goán小妹teh講，到伊讀初中期間，阿爸chiah倒轉–來。路尾goán chiah知，是「中華民國」巴西代表處ê副領事kā巴西政府密告，講阿爸是危險人物，叫巴西警察ài kā伊驅逐出境。阿爸姑不將bih tòa巴西北部叢林（chông-lîm）七、八冬。
阿爸失蹤，goán tau ê錢愈用愈少，阿母獨力chhiâⁿ三個囝，生活日益艱難。有Santos ê台灣人移民看goán chiah pháiⁿ度活，就建議goán去割漢式ê繡花室內鞋來賣。自按呢，góa和小妹、阿母三個人一戶一戶kā人chhi̍h電鈴、lòng門來走賣，tio̍h-koh bih警察，也bat hông搶，hông phah。Hó-ka-chài chiok chōe巴西人看tio̍h goán兩個gín-á也teh賣繡花鞋，攏好心kā goán注文、交關。Hit當陣teh做傳道師ê四叔秉仁、o̍h音樂ê五叔存仁tú好mā tùi美國來到巴西北部，tòa tī離Santos坐車ài三日半ê所在。兩位阿叔tī經濟上也kā goán tàu-saⁿ-kāng。Hit站雖然辛苦，m̄-kú mā體覺tio̍h上帝關一pêng ê門，soah也替goán開另外一pêng ê窗á，派chōe-chōe天使來kā goán扶持幫贊。Taⁿ回想早前，感覺萬項到路尾攏成做好–ê，非常ê感謝。（講到chia，張惠滿nâ-âu-kńg tīⁿ，聲顫）
Goán tī學校拍拚o̍h葡萄牙語，學業成績真好，攏the̍h第一名。總–是，芳滿講，有一擺考試，有一條題目是，巴西ê電力公司是toh一間？若tī台灣，伊的確會曉回答「台灣電力公司」，m̄-kú hín伊iáu m̄知影巴西ê電力公司號做「Light」，這條bē曉，soah無thang保持頭名，真m̄願。可見語言文化ê調適需要長時間ê培養。
語言上goán輸巴西學生，畢竟葡萄牙語m̄是goán ê母語。Ka-chài góa ê數學成績真好，中學ê時mā兼家教kà數學趁錢。Hit陣góa chiâⁿ認真讀冊，準備beh考醫學院。巴西ê入學考試方式是hō͘ ta̍k間大學分別招生，我去考五間醫學院，tio̍h三間，其中一間koh tio̍h坐8點鐘ê車去考，mā考有tio̍h。亦有考tiâu Santos在地ê醫學院。後來就決定讀就近–ê，省所費。雖罔按呢，醫學院ê學費實在siong-tiōng (傷重)。Tng teh煩惱beh怎樣khêng學費ê時，soah有一位船公司頭家允講，beh出錢hō͘我去讀醫學院，有影遇tio̍h貴人！Góa也koh-chi̍t-pái體驗tio̍h上帝ê恩典！（後期閣刊）
下一篇：
