Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎康順添
80 nî-tāi ê Tâi-oân, keng-chè tú-chiah leh khí-poe, ke-ke-hō͘-hō͘ chia̍h-chhēng lóng bián-hoân-ló. M̄-koh, beh chia̍h san-tin hái-bī, liông-hê, hî-si̍t-keⁿ, tiō ài tán-kàu ū lâng kè-chhōa pān-toh. Tī lō͘-piⁿ chia̍h-toh sī chiok-chē Tâi-oân-lâng kiōng-tông ê kì-tî. Chia̍h-toh, m̄-nā chia̍h chhiⁿ-chhau koh ē-tàng kap kúi-nā-tang bô kìⁿ-bīn ê chhin-chiâⁿ hó-iú ōe-sian, chia̍h–ê m̄-nā sī liāu-lí, mā-sī jîn-chêng-bī. Sui-bóng sī án-ne, ē kì-tit tī góa tha̍k kok-tiong ê sî-chūn, chia̍h-toh hō͘ góa ū bô kāng-khoán ê kám-siū.
Tī góa tha̍k kok-tiong jī-nî ê sî, ū chi̍t kang chiap-tio̍h chhin-chiâⁿ beh kiat-hun ê thiap-á. M̄-bat chia̍h kòe pān-toh ê góa ta̍k-kang sûn ji̍t-chí, khó͘-bē-tit sî-kan khah chá kàu. Chia̍h-toh hit-kang, góa kap gún a-bú chhēng kah chin pih-chah. Kàu-ūi liáu-āu, lâng sī chhah-chhah-chhah, gún a-bú tō khiú góa khì kiò lâng. “Chit ê kiò saⁿ-chek-kong, hit ê sī tōa-chím-pô…” Beh lâi chìn-chêng a-bú tō ū kau-tài, chhùi-tiⁿ chiah ē tit lâng thiàⁿ. Sûi-ê–á-sûi-ê kiò soah, goán tō chhōe nn̄g-ê ūi chē. Chhiò-koa ê sió-chiá tī tâi-á-téng iô kha-chhng-hoe, m̄-koh, góa iàu-kín ê sī pò͘-phâng siōng-bóe-liu ê liāu-lí-khu. Tô͘-chí hia̍h-thâu kho͘ chi̍t-tiâu pe̍h-sek ê kin-á, chhiú the̍h tn̂g-pèⁿ hāu-khat-á tī chhèng-ian ê lâng-sn̂g tiong-ng pí-chhiú-ōe-to, khòaⁿ-leh chiâⁿ-sim-sek.
Phàu-á-siaⁿ háu-liân-thian, khui–toh ah. Léng-pôaⁿ lāi-té ê o͘-hî-chí chia̍h-lo̍h ē tak-chi̍h. Hî-chhì-keⁿ ka âng-chhò͘ sūn-kháu hó-lo̍h-âu. Tōa-hong kap sún-koaⁿ sī siōng sì-thīn ê chi̍t-tùi. Hê-á sī oa̍h-thiàu-thiàu, chia̍h–khí-lâi chhiⁿ koh tiⁿ. Chúi-kó, ki-á-peng chhut-lâi liáu-āu, ta̍k-ê lóng chhùi-pá ba̍k-chiu-iau. A-bú khòaⁿ-tio̍h léng-pôaⁿ, hî-chhì-keⁿ, tōa-hong lóng koh ū chhun, i tō kóng “A-thiam-á, lán kā chia pau-pau–leh.” “Siáⁿ-hòe! Beh pau chia? Lán tau tō m̄-sī bô thang chia̍h, lâng ē kóng lán siáu-tham lah, beh pau, lí ka-tī pau.” Góa oa̍t-thâu chòe góa kiâⁿ. Góa khiā tī mn̂g-kháu khòaⁿ a-bú tī hia pau chhài-bóe, ū kúi-ê kâng-toh ê lâng-kheh kā tàu pau, góa chiâⁿ-si̍t m̄-chai a-bú sī-án-chóaⁿ chiah-nī ài-chia̍h koh siáu-tham.
Góa kōaⁿ gō͘ la̍k tē tāng-hoâiⁿ-hoâiⁿ ê chhài-bóe, chē tī a-bú hit tâi tâng-kóng-á chhia ê āu-piah-bīn, hong tī hīⁿ-khang-piⁿ hiú-hiú-kiò, góa ê thâu-khak-lāi lóng sī kâng-toh ê lâng-kheh phì-siùⁿ ê gán-sîn, sim-lāi kám-kak chin ngāi-gio̍h. Góa hoat-hiān a-bú khiâ m̄-tio̍h lō͘ ah, m̄-koh, góa bô ài kóng, góa hit-tang-chūn bô siūⁿ beh kap i kóng-ōe. A-bú ê o͘-tó͘-bái thêng tī chi̍t keng kē-chhù-á thâu-chêng, chit keng kē-chhù-á o͘-o͘-àu-àu. Chi̍t ê a-pô ùi chhù-lāi kiâⁿ–chhut-lâi. A-bú kóng “A-sáng, chia ê chhài-bóe hō͘ lí chia̍h, lóng iáu koh sī sio–ê .” A-pô ùi góa ê chhiú chiap-tio̍h chhài-bóe, góa khòaⁿ-tio̍h a-pô chhiò kah chhùi-á li̍h-sai-sai.
Góa koh chē tī a-bú ê o͘-tó͘-bái āu-piah, hong kāng-khoán tī hīⁿ-khang-piⁿ hiú-hiú-kiò, góa ê ba̍k-sái chi̍t-lia̍p chi̍t-lia̍p hō͘ hong póe khì piⁿ-á, góa kā a-bú lám-tiâu-tiâu. A-bú kóng “āu-pái koh chhōa lí lâi chia̍h-toh.” Góa tōa-siaⁿ kā a-bú èng-kóng “Hó, lán koh chò-hóe lâi chia̍h-toh, chia̍h-liáu, góa lâi pau chhài-bóe.” Hit-sî, hong iû-goân leh chhoe, chhia iû-goân leh kiâⁿ, thiⁿ-téng ê âng-hê kā góa ê ba̍k-sái ní chò âng-sek.
