文圖◎張家榮
向時 ê 我，是一个 gia̍t-siâu koh 悾戇 ê 囡仔，十外歲仔就 hō͘ 魔鬼牽 teh 行，四界 hām 人?迌做鱸鰻，tiāⁿ-tiāⁿ 想講家己有 gōa gâu，結果舞到尾仔「人 gâu，天 leh 做對頭」，m̄ -nā 罪惡得 tio̍h 報應，koh 換來 18 冬 lò-lò 長 ê 刑期，實在有夠了然！
佳哉，上帝慈悲憐憫，hō͘ 我這个懵懂 m̄ -bat 代誌 ê 囡仔，有機會 tī 內籬仔熟識耶穌基督，透過基督福音 ê 認 bat、聖神 ê 領 chhōa，我烏暗 ê 人生 chiah ta̍uh-ta̍uh 行向光明。所致，我深深曉悟過去所犯 ê 錯誤，源頭就出在我 m̄ -bat 誡律，所以跋倒 tī 無自由 ê 櫳仔內。
為此，我自 bat 主耶穌彼日開始，就一直認真 teh 讀聖經，向望家己 ē-tàng 開智慧，遵守上帝 ê 誡命，同時充分利用有限 ê 時間來學寫字、畫圖。所以 goán 今仔日 tī 遮，想 beh 用台文、用漫畫來敬拜上帝，希望透過心適 ê 圖樣提醒家己守誡，mā 希望 chē-chē 人 ē-tàng koh khah 了解上帝 ê 旨意。
Tī 遮，goán koh 一擺為家己過去所犯誡命深深懺悔，願主繼續 kā goán 幫贊，保守 goán ê 心，hō͘ goán ē-tàng 活出上帝 ê 榮光，做一个守誡律、跤踏實地 ê 新人。謳咾感謝主，哈利路亞！
1.主前 13 世紀，咱 ê 上帝耶和華，領以色列人出埃及了後，有一工，耶和華 tī 火中降臨何烈山頂 koân，並且召喚僕人摩西去山頂。
2.摩西去到山頂了後，耶和華向摩西曉諭誡命，吩咐伊向百姓講當守 ê 約。
3.就 án-ni，摩西遵照耶和華 ê 旨意，去到百姓遐，將以色列 ê 眾人 lóng 召集叫 óa 來，然後對 in 講：「以色列 ê 人 ah，我今仔日 beh 向恁曉諭神 ê 誡律，恁 lóng 要認真聽，用心學習，謹守遵行。耶和華咱 ê 神，tī 何烈山 kap 咱立約，這約 m̄ 是 kap 咱 ê 列祖立 ê，是 kap 咱今仔 tī 遮活 leh ê 人所立 ê，是耶和華 tī 山頂，對火中 kap 恁面對面所講 ê。當時，我徛 tī 耶和華 kap 恁 ê 中央，beh 將耶和華 ê 話傳 hō͘ 恁，因為恁驚惶 he 火，無才調去山頂。耶和華講：「我是耶和華恁 ê 神，曾經將恁 ùi 埃及地為奴之家 chhōa 出來，除了我以外，恁 bē-tàng 有別 ê 神。」這是第一條當守 ê 誡命。
4.第二誡：Bē-sái 為家己雕刻偶像，mā bē-tàng 作任何形像，好比上天、下地，kap 地下水中 ê 百物。不可跪拜遐 ê 像，mā bē-sái 奉祀伊，因為我耶和華你 ê 神，是忌邪 ê 神，恨我 ê，我絕對追討伊 ê 罪，自父 kap 囝，一直到三四代，愛我守我誡命 ê，我必向 in 發慈愛直到千代。
5.第三誡：不可濫糝稱耶和華你 ê 上帝 ê 名，因為妄稱耶和華名 ê，耶和華必不以伊為無罪。
6.第四誡：當照耶和華所吩咐，守安息日為聖日。六日勞碌作穡，努力做你一切 ê 工課，但是第七日是安息日，要歇睏守伊為聖。
7.第五誡：當孝敬你 ê 老父、你 ê 老母，hō͘ 你得福。
8.第六誡：不可刣人。
9.第七誡：不可姦淫。
10.第八誡：不可偷盜。
11.第九誡：不可作假 ê 干證來諂害人。
12.第十誡：不可貪戀人 ê 某囝，mā 不可貪圖別人 ê 房屋、田地、僕人、查某嫺、牛等等所有一切。
