◉ 陳柏壽
我是kap牛車做伙大漢ê gín-á，阮攏kiâⁿ牛車路去學校。彼日阿公對北港牛墟牽牠轉來，牠猶是一隻細隻gû-káng-á，規隻烏烏，二支牛角尖尖翹蹺，向後壁彎。阿公佇井邊soāiⁿ-á-chhiū跤，起一間gû-tiâu hō͘牠tòa。我tiāⁿ-tiāⁿ出去外口割菅芒葉kap甘蔗葉轉來hō͘牠食，mā tiāⁿ-tiāⁿ牽牠去阿公ê墓仔埔遐食草。我攏kā牠縛佇彼叢大叢苦楝仔下面互牠慢慢仔食，我the佇墓仔埔邊仔，kah樹仔頂chiu-chiu-ka-ka ê白頭殼仔講話。
當牛漸漸大漢了後，牠toh會拖甘蔗，對阮ê田拖去載五分仔車，欲去虎尾糖廠。細漢阿姑欲嫁ê時，阿公用彼隻牛車，載tîⁿ-tîⁿ ê嫁妝，一直kiâⁿ到半天寮，我mā攏tòe佇牛車後，去給人分一粒紅圓。牠mā拖阮去斗六東市仔口去食碗粿，ùn豆油膏。割稻仔了牠會拖規車ê稻股，轉來蓋厝頂做棕簑。
一直到我讀斗中欲畢業ê時，有一日聽講人欲kā牛賣去牛墟。當牠欲互人牽上車ê時，我有看著牠咧流目屎。
台灣詩人陳明仁有一首詩安呢寫講：
牛車溝 深閣長
你按呢iⁿ-iⁿ-oaiⁿ-oaiⁿ會當行外遠
豈會行過阮故鄉ê甘蔗園
你一世人佇阮田泥拖磨
今已經老lah
你按呢iⁿ-iⁿ-oaiⁿ-oaiⁿ欲行去佗位？
我所敬愛ê蔣中山醫師頂個月過身，想著伊我toh真毋甘。40幾冬前伊搬到日本，kā我當做小弟咧照顧。幾十冬ê友情，我看這个兄哥親像一隻老牛，拖伊彼台牛車kah伊ê某囝，對台灣流浪到日本，無放棄伊一生ê理想，恬恬過日奮鬥，毋捌出聲怨嘆喝苦，直到伊人生ê路尾。
台灣大學畢業了後，蔣醫師佇屏東車頭對面開一間中山耳鼻嚨喉科，患者真濟。除了看診以外，伊真愛畫bàng-gà。伊ê畫中有台獨意識，得失當局，路尾受迫，全家移居日本。到日本著改名，名改做中山將太郎，佇橫濱金澤八景仝款用「中山耳鼻嚨喉科」開業，並且閣繼續畫圖。彼時，伊定定佇禮拜ê時來東京附近台灣教會講道，逐擺伊來講道，阮攏全家出席。
◢ 哭死賴上帝ê道理
細漢gín-á無順意ê時會起番，會哭、拍人、cheng人，規身軀nòa佇塗跤無愛起來，哭死賴爸母。蔣醫師細漢就失去老爸，伊講伊一世人無法度哭賴死爸母。但是伊講道ê時定定講著「哭死賴上帝」道理，伊講伊就是靠哭死賴上帝來過日。伊晚年ê時，有一工，大囝明州lu伊出來曝日頭，我佇電話中kah伊講話，伊mā講伊欲哭死賴上帝！
蔣醫師講ê哭死賴上帝有幾項內涵：
1.人來世間ê國籍毋是伊ê選擇，國籍對人毋是重要ê代誌，人一生ê幸福kah不幸，攏是上帝ê代誌，是上帝ê安排。
2.準講亞當kah夏娃算第一代，第二代算生2个，按呢一直算落去，會變作天文數字。地球ê人口咱to無法度了解，做人實在無啥通誇口。雖罔按呢，上帝hō͘我出世來世間，一定有伊ê好意，所以我毋甘願死，我死mā欲哭死賴上帝。
3.人攏認為家己是上要緊，家己好上好， 考試逐家攏考tiâu無夠好，上好是別人ê囝無tiâu，干單阮囝tiâu上好，這是另外一種哭死賴ê心理。
4.人生親像地毯，外口看起來媠噹噹，內底卻是真亂糟糟。人若拄著困難、艱苦，通常會想辦法去牽拖別人，這嘛是另外一款哭死賴ê心理。
5.隔壁半暝來挵門欲借三塊pháng，因為隔壁有朋友臨時到，雖然已經睏，總是因為一直挵門，只有起床應伊ê要求（路加福音11章5～9節），這種勉強、無常識ê要求，對哭死賴ê道理來看，mā應該去做，因為若做，結果就交hō͘上帝。
6.印度教kah佛教主張「因果報應」，猶太教mā是。亞當偷食禁果，上帝質問伊，伊講是in某叫伊食ê，in某講是彼尾蛇叫伊食ê。一切對家己不利ê代誌，攏sak互別人。以色列ê祖先雅各真gâu騙人，伊欺騙伊ê兄哥以掃，以掃因為按呢欲刣雅各，雅各緊走路。20冬了後，雅各kap某囝欲轉去故鄉，途中tú-tio̍h天使，雅各kah天使sio-ián，ián輸ê雅各kā天使giú牢牢，愛天使kā祝福才欲放天使去。這是哭死賴ê戰法，輸閣毋認輸，閣hông改名做以色列（創世記32章）。蔣醫師認為這種「敢ê提去食」ê偤太人精神，毋是對毋對ê問題，是世間ê現實，美國、中國、蘇俄攏差不多，是咱來世間做人tio̍h接受ê現實，所以只有ē-tàng親像耶穌、親像遠藤周作ê《沉默》哭死賴上帝。《沉默》內面寫暮府時代ê神父Rodrigo受官長命令，tio̍h用跤去踏耶穌ê相，若無隨時會受死。Rodrigo無別條路，只用跤去踏耶穌ê相，彼時，伊ê心情就是哭死賴上帝。
7.旅行ê人佇透中晝，kha-chiah āiⁿ重iⁿ-iⁿ ê包袱，叫伊起來坐車，佇車頂伊猶將包袱āiⁿ tiâu-tiâu，人叫伊將包袱囥落來，伊講歹勢lah，你hō͘我來坐toh真好lah，物件家己phāiⁿ。這叫做毋敢放伊去。真濟人擔人生 ê重擔，毋敢哭死賴上帝。
8.有人問，將一切擔交代上帝進前，是毋是著先反悔認罪、修行改進？著改進到啥程度？保羅是認為只要反悔，隨時toh得著赦免，「因信稱義」mā是哭死賴ê道理。普通時，咱攏想講家己是好，但是主耶穌教咱講：天父照顧好人，mā照顧歹人，天父落雨hō͘好人，mā落雨hō͘歹人（馬太福音5章45節）。普通人會想講好人有好報，歹人得著責罰，這叫做律法主義。律法主義無法度解決問題。路加福音18章有故事講，二个人入去聖殿祈禱，一个講：「主啊，你看，我無親像彼个抽稅ê，我一禮拜禁食二擺，我全收入ê十分一奉獻hō͘你」。彼个抽稅ê毋敢入去聖殿，徛佇遠遠，目睭向天，捶家己ê胸坎，kā上帝祈禱：「上帝啊，赦免我這个罪人！」抽稅ê人來到上帝面前。頭前彼个心內無上帝，後壁彼个心內無家己，心內只有上帝。健康ê人無需要醫生，病人才需要。
9.主耶穌曾講好額人欲入天國親像駱駝過針鼻遐爾困難（路加福音18章），我想這是講人若欲通過律法來得救是非常困難，只有一條路，就是chím-á隨時承認耶穌是救主就完全，會得救。
10.蔣醫師聽過一个譬喻，講一个gín-á欲去教會進前，老母hō͘伊二个銀角仔，一个是欲奉獻hō͘教會，一个是欲hō͘伊買含仔糖，伊真歡喜，oân-nā行oân-nā跳，結果一个銀角仔lak-lo̍h去水溝仔，gín-á心內想，lak-lo̍h去水溝仔ê彼个是欲奉獻ê，佇手頭ê彼个是欲提來買含仔糖ê。好ê攏是我ê，拍無去ê彼个是上帝ê，這就是哭死賴ê表現。
11.「倚靠耶和華ê人有福氣，伊親像樹栽佇水邊， 釘根佇溪水邊， 毋驚炎熱， 葉青翠茂盛； 曠旱ê時攏毋免掛慮， 會不斷結果子。」（耶利米17章7～8節）咱佇幸福ê時tio̍h呵咾上帝，佇艱苦ê時tio̍h祈禱上帝，佇祈禱ê時nā猶原繼續艱苦，tio̍h愛ē-hiáu哭死賴上帝。
＊＊＊ ＊＊＊ ＊＊＊
西雅圖今仔日猶咧落雨，毋知欲落外久？我親愛ê阿兄（あにき），我佇世間無大兄，干單你一个。我看你是一隻台灣牛，咧去上帝ê路。你突破世間種種困難艱苦，我想你佇天頂猶繼續咧傳福音，雖然牛車猶咧iⁿ-iⁿ-oaiⁿ-oaiⁿ，你車頂彼支「台獨」ê旗仔猶tòe風咧吹。
「主啊，阮所敬愛ê阿兄蔣醫師，雖然肉體離開阮，總是伊一生ê言行kap教導，尤其是伊對台灣獨立ê確信，親像一葩火永遠𤏸佇阮心內。願祢賜福保守伊ê家族kap阮ê兄弟姊妹，賜福阮ê故鄉台灣。靠主耶穌基督ê聖名祈禱，阿們。」
