◎柯三益
利未記10章1～2節記載摩西 ê 時代，以色列人出埃及了後，祭司制度初初設立，亞倫 kap 伊 ê 子新就任祭司 ê 時。Tī 當時若照上主 ê 吩咐，欲 tī 聖所 ê 香壇燒香，必須要用燒祭壇頂面 ê 火來獻祭。Chit-ê 燒祭壇 ê 火，起頭是對上主面前所降落 ê 火，擔任祭司 ê 人要維持 chit-ê 火常常燒 teh。但是身為祭司 ê 拿答 kap 亞比戶兩兄弟 tī 獻祭 ê 時犯了錯誤，無照上主 ê 吩咐來做，竟然用燒祭壇以外 ê 火來獻祭，因為按呢，上主 ê 刑罰隨時臨到，甚至互 in 致到死。
咱若對聖經來看，當時祭司 ê 職務及責任，祭司 ê 職務有下面三項：
1.領受上主 ê 旨意，將上主 ê 旨意傳達互百姓知影。
2.學習並且傳授信仰 ê 傳統，互百姓會曉將聖潔 ê 上主做生活 ê 中心。
3.通過祭典接納奉獻 ê 人，並且向奉獻 ê 人宣布上主 ê 赦免。
若是講到祭司 ê 責任也有下面三項：
1.分辨聖潔及無聖潔，來維護百姓過著聖潔 ê 生活。
2.照著上主 ê 旨意，來管理百姓事奉上主 ê 方式。
3.負擔教導百姓 ê 聖職，教導上主所定 ê 律例。
就是因為祭司有 chia-ê 職務 kap 責任，所以 tī 事奉頂面，必須要真謹慎遵照上主 ê 旨意來做，如果無謹慎犯了錯誤，上主 ê 刑罰就會臨到，實在是因為若是祭司明明知影上主 ê 旨意，卻是無照旨意去行，上主就用對拿答 kap 亞比戶 ê 刑罰，來顯明伊 ê 旨意，互以後擔任祭司 ê 人，tī 事奉頂面呣敢無謹慎。
因為按呢 tī 舊約聖經利未記、民數記有記載祭司 ê 工作內容，對受抹油擔任祭司到獻祭等等 ê 事工，攏著照上帝所指示 ê 禮儀法度來行。
Tī 出埃及記28章全章有記載，當時上帝所定祭司所穿 ê 裝備，有內衫、帽仔、腰帶、外袍、披肩、胸牌等等，無論質料、吋尺、色緻攏著照上主所吩咐來做。親像講披肩雙旁要各 hē 兩粒瑪瑙，胸牌要有四 chōa 寶石，一 chōa 有三粒無 kâng-khoán ê 寶石，閣要 tī 寶石頂面雕刻以色列十二支派 ê 名，所戴 ê 帽仔頂面要有一面金牌，金牌 ê 頂面要雕刻「做聖歸耶和華」ê 字等等，Tī 以西結書44章也有記載上主為祭司定律例。這是上主針對祭司個人 ê 約束，無論衫褲、頭毛、婚姻、禁止飲酒、分辨聖潔 kap 無聖潔、守安息日及節期等等，攏要遵照上主 ê 律法及條例。
總是當祭司違背上主旨意 ê 時， tī 瑪拉基書2章1～2節有按呢警告講：「恁 chiah-ê 祭司啊，chit-ê 命令是 hō͘ 恁-ê。萬軍 ê 耶和華講，恁若 m̄ 聽，m̄ hē tī 心裡，來歸榮光我 ê 名，我就 hō͘ 咒詛到 tī 恁，hō͘ 恁 ê 福氣變做咒詛；我已經咒詛，因為恁無將命令 hē tī 心裡。」
咱真感謝上帝，因為耶穌基督 ê 誕生，做咱世間人 ê 大祭司，伊 ê 身軀被釘 tī 十字架頂，將家己獻互上帝。主所流出 ê 寶血救贖咱人 ê 罪，chiâⁿ 了上帝 ê 旨意。因為按呢，主耶穌做咱 ê 中保，上帝 kap 咱立新 ê 約，就是凡若信伊 ê 人，就欲得到永遠 ê 活命。所以咱無需要通過早前 ê 祭司，只要靠著耶穌基督 ê 名就會 thang kap 咱 ê 天父親近。因為按呢，每一位基督徒本身也成了受揀選 ê 祭司，咱靠著主耶穌 ê 恩典來親近天父，tī 上帝面前咱無分地位、貧富及階級，逐人攏應該用所得到 ê 恩賜來服事上帝，參與 tī 教會整體祭司 ê 職分。
就親像彼得前書2章5節所講 ê：「恁就近伊，也親像活石，起做神靈 ê 厝，做聖 ê 祭司班，來獻神靈 ê 祭，對耶穌基督會互上主所歡喜接納 ê。」聖經也向咱講：「恁是被揀選 ê 族類，是王家 ê 祭司，是聖潔 ê 邦國，是上帝家己 ê 百姓。」當咱用信心來領受基督 ê 真理 kap 救恩，會曉遵照上帝 ê 公義 kap 教示，koh 有好品行 ê 時，tī 人 kap 上帝面前就 jú 實在顯明咱是一個有祭司職分 ê 基督徒。
咱 tī 主日禮拜 ê 時，濟濟司會 ê 祈禱總是會講：「上帝啊！向望阮 ê 敬拜成做 phang-phang ê 祭來獻互祢。」到底什麼款 ê 祭物才會互上帝歡喜，感覺咱獻 ê 祭實在真 phang，因為好 ê phang 味來接納咱所獻 ê。若按呢上帝所歡喜 ê 是啥物？無歡喜 ê 是啥物？希伯來書10章5節記載主耶穌按呢講：「上主啊！Chè-sū 禮物祢 m̄ 愛，祢 bat kā 我備辦身軀，燒祭 kap 贖罪祭祢無歡喜……上主啊，我來是欲行祢 ê 旨意。」馬太福音也有記載主耶穌指責法利賽人按呢講：「恁假好 ê 經學士 kap 法利賽人有災禍了，恁連調味 ê 香料，親像薄荷、大茴香、小茴香等等攏獻上十分之一互上帝，但是法律上真正重要 ê 教示，親像公義、仁慈、信實等等，恁 hoán-tńg 無遵守，chiah-ê 重要 ê 教示才是恁必須要實行 ê 事。」Tī-chia 咱 thang 知影 chè-sū ê 禮物上主已經無愛，咱必須要遵照上主 ê 旨意，koh 用公義、仁慈、信實等等 ê 好所行來獻互上帝，才是上主所意愛 ê 祭。
主耶穌親像舊約時代燒祭壇頂面 ê 火，chit-ê 火是常常燒 teh，祭司要用 chit-ê 火來燒所獻 ê 祭物，若無按呢做，就會親像拿答 kap 亞比戶互上帝刑罰。這是早前上帝 kap 以色列人所立 ê 約，上帝 kap 咱所立 ê 新約也是按呢，咱有祭司 ê 職分，咱 ê 敬拜、o-ló、祈禱，若無奉靠耶穌基督 ê 名來獻，tī 上帝 ê 面前攏是無功效，hoán-tńg 會惹上主生氣，因為咱無照伊 ê 旨意來行。向望咱攏學習咱 ê 大祭司主耶穌 ê 款式，靠著耶穌基督 ê 名，用上帝所賜互咱 ê 裝備 kap 好所行來獻互上帝，成做上帝所意愛「phang-phang ê 祭」，因為按呢來得到上主 ê 看顧 kap 祝福，榮耀伊 ê 名。
