Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
kháu-su̍t◎Ngô͘ Jîn-ná
kì-lio̍k◎Lîm Phek-tông
2024 nî 11 goe̍h 24 sī Tâi-tiong Tiong-hōe Ho̍k-heng Kàu-hōe siat-kàu 50 chiu-nî. Í-keng 84 hòe ê Hun-lân kok ê soan-kàu-su Ngô͘ Jîn-ná ( Ritva Vuorenmaa) kóng khí 1974 nî Ho̍k-heng Kàu-hōe tú-tú khai-sí ê chêng-hêng kap i ê kò͘-sū.
Ngô͘ Jîn-ná bat tī Tâi-tiong ê Bîn-cho̍k-lō͘, Tok-hêng, Ho̍k-heng, Hî-tî, Jit-goa̍t-thâm kap kî-thaⁿ kàu-hōe choh Chú-ji̍t-o̍h lāu-su. Hit-tang-chūn, i khiâ o͘-tó͘-bái sì-kè thàm-hóng hōe-iú kap pēⁿ-lâng. Taⁿ i tòa tī Hun-lân kok ê Forssa.
Ho̍k-heng kàu-hōe 50 chiu-nî, góa kám-kak che oân-choân sī Chú ê un-tián, Chú ê jîn-chû kap thiàⁿ-thàng, só͘-í, lán tio̍h kám-siā Chú, êng-kng lóng kui hō͘ I.
Góa 1966 nî thâu-chi̍t-pái lâi Tâi-oân, góa kám-kak tú-tú chhin-chhiūⁿ Tāi-pi̍t ū siá kóng, sī Si-phian 16:6 “Só͘ niû hō͘ góa ê tōe, sī tī chin súi ê só͘-chāi; Góa ê sán-gia̍p si̍t-chāi chin hó.” Góa kám-kak Tâi-oân sī chin hó, chin súi ê só͘-chāi. Góa lâi Tâi-oân, sī ūi-tio̍h beh thoân Hok-im. Góa sī chi̍t ê hō͘-sū, tī Hun-lân ê pēⁿ-īⁿ kang-chok, chi̍t bīn choh kàu-hōe ê kang. Hun-lân ū sêng-li̍p chi̍t ê Ki-tok-kàu pēⁿ-īⁿ tī Tâi-oân lâm-pō͘ ê só͘-chāi, chiū sī Hêng-chhun Ki-tok-kàu Pēⁿ-īⁿ, góa tī hia ho̍k-bū. Hêng-chhun ê khì-hāu tùi góa lóng bē ha̍h, i-seng chiū koat-tēng, góa bē-tàng tī Tâi-oân kang-chok, kiò góa ài tńg-khì Hun-lân, che sī hui-siông kan-khó͘ ê tāi-chì. Ki-tok-tô͘ lóng thè góa kî-tó, Hun-lân ê hia̍p-hōe koat-tēng, nā Tâi-oân ū khì-hāu khah hó ê só͘-chāi, góa ē-tàng tī hia. Só͘-í, koat-tēng góa lâi Tâi-tiong.
Tī Tâi-tiong ū chi̍t ê Ki-tok-kàu pēⁿ-īⁿ, Lêng-kong Pēⁿ-īⁿ （靈光醫院）, tī hia ū chi̍t ê Koeh Tāi-hu, Koeh Sūi-lîm (郭瑞琳), lín khó-lêng chin chē lâng bat–i, i sī hui-siông thiàⁿ-lâng, sī hó ê i-seng, góa chiū khai-sí pang-chān i chi̍t-sut-á.
Chú-ji̍t-o̍h sī Ho̍k-heng ê khí-thâu
Góa lé-pài ê sî lóng choh kàu-hōe ê kang, chham-ú Chú-ji̍t-o̍h, hit ê sî-chūn, góa kan-taⁿ ē-hiáu kóng Tâi-gí, lóng bē-hiáu kóng Kok-gí, góa lé-pài ê sî lóng tī Tiúⁿ-ló Kàu-hōe choh lé-pài (in-ūi góa ē-hiáu thiaⁿ), só͘-í Tâi-tiong hia ê bo̍k-su lóng bat–góa. Hit ê sî-chūn tī Tâi-tiong lâm-pō͘ ê só͘-chāi bô kàu-hōe, tān-sī tī hia ū kúi-nā-ê Ki-tok-tô͘ ê ka-têng, hit ê sî-chūn, ū Niû, ū Tân, iā ū Tiuⁿ.
Niû Bān-hoat sian-siⁿ sī chin chīn-sim ê Ki-tok-tô͘, chin thiàⁿ Chú ê Ki-tok-tô͘, i kám-kak tī i só͘ tòa ê só͘-chāi bô kàu-hōe sī bē-sái, i tùi Tiong-hōe thê-khí chit ê tāi-chì, í-āu, Tâi-tiong tiong-hōe koat-tēng ē-sái khai-sí Chú-ji̍t-o̍h ê kang. Ká-sú ū lāu-su chiū ē-sái, sī chin-hó. Tān-sī bô ū lāu-su.
Hia ê bo̍k-su bat góa, in chiū siūⁿ, góa ē-thang pang-chān, tiong-hōe chiū chhiáⁿ góa lâi Ho̍k-heng Kàu-hōe khai-sí chit ê Chú-ji̍t-o̍h ê kang-chok, góa chin hoaⁿ-hí khai-sí. Ū chi̍t ê Tiuⁿ lāu-su, kà koa, kà Sèng-si. Iā-ū Tân lāu-su, chi̍t ê chí-mōe, iā ū chi̍t ê góa í-keng bē kì-tit miâ, goán ū 4 ê lāu-su.
Niû sian-siⁿ i só͘ choh ê sī chin iàu-kín ê tāi-chì. I múi pài-la̍k khì chhōe i só͘ tòa ê hit ê só͘-chāi ê gín-á, kā in kóng, Lé-pài-ji̍t ū Chú-ji̍t-o̍h, in eng-kai khì. Niû sian-siⁿ kā gín-á kóng, tī hia ū chi̍t ê gōa-kok ê lāu-su, i ē-hiáu kóng Tâi-gí, gín-á kám-kak chin chhù-bī, in chiū lóng lâi khòaⁿ góa, lâi Chú-ji̍t-o̍h. Iàu-kín m̄-sī góa sī lāu-su, sī lâi thiaⁿ Chú Iâ-so͘ ê ōe. Niû sian-siⁿ chin phah-piàⁿ teh thàm-hóng, múi pái hia ê gín-á ná-lâi ná chē, chi̍t khai-sí, gín-á ū 10 ê, 20 ê, bô jōa-kú, gín-á chiū 50 ê, gín-á í-keng ū thiaⁿ-tio̍h kan-tan ê kò͘-sū, chiū ū piáu-ián, chin chìn-pō͘, 130 ê gín-á lâi, iā ū tōa-lâng. Lâng hui-siông chē, ū ê tī gōa-kháu thiaⁿ, in-ūi bô só͘-chāi thang chē. Hit ê sî-chūn, Niû sian-siⁿ ū kóng eng-kai khai-sí tōa-lâng ê chū-hōe, tùi Tiong-hōe kóng-khí chit ê tāi-chì. Tiong-hōe kám-kak che ē-sái, in-ūi lâng í-keng hiah-nī chē, só͘-í, Tiong-hōe tòa tī Tâi-tiong ê bo̍k-su lóng lûn-liû lâi Ho̍k-heng kàu-hōe káng-tō. Tāi-seng sī Chú-ji̍t-o̍h, liáu-āu chiū-sī tōa-lâng ê chū-hōe, án-ne chiū khai-sí.
Hôe-kò͘ kap kám-siā
1975 nî, kàu-hòe ê kang-chok chiū í-keng khak-si̍t. 1976 nî, ū chhiáⁿ bo̍k-su Gân Sìn-seng, i tòa tī kàu-hōe ê só͘-chāi. Tú-tú sī hit ê sî-chūn, góa ài tńg-khì Hun-lân, ūi-tio̍h góa ê pē-bú. Ū chi̍t ê bo̍k-su lâi Ho̍k-heng kàu-hōe choh hit ê kang, góa chin kám-siā Chú. Án-ni, góa chai-iáⁿ kàu-hōe tī hit ê sî-chūn chiū ná lâi ná hó. Góa tī Ho̍k-heng kàu-hōe kan-taⁿ 2 nî. Í-āu, góa koh tńg-lâi Tâi-oân, chha-put-to pòaⁿ-nî chiū khì Po͘-lí Ki-tok-kàu Pēⁿ-īⁿ kang-chok, pang-chān hia-ê kàu-hōe, góa í-keng bô tī Tâi-tiong, chiū m̄ chai-iáⁿ Ho̍k-heng Kàu-hōe í-āu ê tāi-chì, chit-má chiah chai-iáⁿ. Sī Chú ê un-tián chiah-nī tōa. Hit ê sî-chūn Tiuⁿ lāu-su kā gín-á kà chhiùⁿ-koa, ū chit ê Sèng-si, gín-á chiok ài chhiùⁿ:
Chú beh koh lâi, Chú beh koh lâi,
Chū-chi̍p I só͘ ì-ài,
Chú ê pó-pòe sī sìn ê lâng,
Sī Chú só͘ thiàⁿ-thàng.
Êng-kng chhin-chhiūⁿ khé-bêng chhiⁿ,
Thàu-chá chhàn-lān kng-bêng,
Chú ê pó-pòe sī ha̍k-seng, tī I bián-liû chêng.
Hui-li̍p-pí 3:20 “In-ūi lán sī thiⁿ-téng ê kok-bîn, iā ǹg-bāng Chín-kiù-ê tùi hia lâi, chiū-sī Chú Iâ-so͘ Ki-tok.” Tī chia kóng Chú Iâ-so͘ beh koh lâi, lán chit-má thèng-hāu Chú Iâ-so͘ koh chài-lâi. Che tùi lán sī chòe-tōa ê ǹg-bāng. Góa kám-siā lín tùi góa ū chiok tōa ê thiàⁿ-sim, kám-siā Chú, che it-chhè ê tāi-chì, hō͘ góa chin hoaⁿ-hí. Góa beh tùi tāi-ke kóng, Goān Chú Iâ-so͘ Ki-tok ê un-tián, Siōng-tè ê thiàⁿ-thàng, Sèng-sîn ê siong-thong, kap lín chèng-lâng tī-teh. A-men.
