Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Che sī góa ê ko͘-tiūⁿ gín-á sî-tāi ê kò͘-sū, kóng hō͘ ta̍k-ke thiaⁿ.
Ko͘-tiūⁿ ê a-pa sī Tâi-tiong Saⁿ-tè-chhù chng ê lâng, in-ūi chòe ê chhân chin chió, hiaⁿ-tī koh chōe ê, só͘-í chū sè-hàn ko͘-tiūⁿ ê a-pa tō chai-iáⁿ, i ū chi̍t kang it-tēng ài chhut-khì phah-piàⁿ chiah ū chiong-lâi.
Āu–lâi ū chi̍t pái i thiaⁿ-tio̍h chi̍t ê siau-sit, O̍h-chhân chng ū chi̍t ê lông-hō͘, in-ūi i ê kiáⁿ chió-hòe, i koh nî-lāu, só͘-í siūⁿ beh kā tōa-hàn cha-bó͘-kiáⁿ chio-ang lâi tàu chòe-sit, keng-kòe môe-lâng-pô ê kài-siāu, i chiū hoaⁿ-hí kòe-mn̂g khì chòe lâng ê kiáⁿ-sài.
Kòe kúi nî, kiáⁿ siⁿ chhut-lāi, i ê lāu-pē hū-tam khah tāng, sim-lāi phah-sǹg, tio̍h ài chhut-khì thàn-chîⁿ chhī bó͘-kiáⁿ, chiong-lâi ji̍t-chí chiah ē khah hó-kòe, i tō kā kúi-lō tang khiām–khí-lâi ê chîⁿ, bé chi̍t-tâi gû-chhia, thè lâng chhia-ūn mi̍h-kiāⁿ thàn-chîⁿ, hit-chūn sī Ji̍t-pún sî-tāi, chèng-hú beh khí Chúi-lâm ki-tiûⁿ, ài chin chōe gû-chhia lâi chhia-ūn chio̍h-thâu, i ūi-tio̍h beh thàn khah chē chîⁿ, tùi thàu-chá kàu àm lóng bô hioh-khùn, thoa chio̍h-thâu, chi̍t chhia koh chi̍t chhia, ná chhin-chhiūⁿ leh thoa lāu-miā, ài chai, ùi O̍h-chhân chng iân Tōa-tō͘-soaⁿ kiâⁿ kàu Chúi-lâm, lō͘-tô͘ chiâⁿ-hn̄g, to̍h án-ne, in-ūi kòe-lô, ū chi̍t pái, i pak-tó͘ thiàⁿ, bô hioh-khùn, mā m̄ káⁿ khai chîⁿ chhōe i-seng, kiat-kó sòa in-ūi mô͘-tn̂g-iām ok-hòa lâi sí–khì, chit-siaⁿ chhù-lāi siōng ū khùi-la̍t ê lâng, hiông-hiông sí–khì, chhin-chhiūⁿ chhù–ni̍h ê tōa-thiāu tó–khì, kui-ke-hóe-á, hō͘ o͘-hûn tà-bū, m̄-chai beh án-chóaⁿ.
Ko͘-tiūⁿ ê A-bú ài chhōa kiáⁿ, koh tàu chò-sit, hit tâi gû-chhia bô-lō͘-ēng, tō bē hō͘ pa̍t-lâng, án-ni koh keng-kè kúi-nā nî, ko͘-tiūⁿ ê a-kū tōa-hàn, siūⁿ beh chhōa-bó͘, ài ēng chîⁿ, i chai, a-chí chá-chêng bē gû-chhia ū chi̍t tiâu chîⁿ, tō khui-chhùi ǹg a-chí chioh chîⁿ, m̄-koh, a-chí sim-lāi siūⁿ, chia ê chîⁿ sī bú-kiáⁿ ê kiù-miā-chîⁿ, tō m̄-káⁿ chhu̍t chioh, tō sī án-ni, chiá-tē-á sòa kia̍t oan-siû, sió-tī siū-khì, kā a-chí kóaⁿ chhut-khì, kiò i ka-kī khì thó-chia̍h, bē-sái koh tńg–lâi. Hit ê sî-tāi ê cha-bó͘-lâng bô-tè-thang thàn-chia̍h, ū khó-lêng ē iau–sí, ūi-tio̍h kiáⁿ ài oa̍h, ko͘-put-chiong pàng kiáⁿ kah a-kū tòa, ka-kī kâm ba̍k-sái lī-khui āu-thâu-chhù, ùi chia khai-sí, ko͘-tiūⁿ ê sim-chêng ko͘-toaⁿ koh kiaⁿ-hiâⁿ, khai-sí pi-chhám ê gín-á sî-tāi.
Ū chi̍t-pái, ko͘-tiūⁿ ê a-kū thiaⁿ lâng kóng, chhī ah ē thàn-chîⁿ, tō thàn tang-bóe ê sî khe-chúi khah ta, chòe-hé khì Chiong-hòa bé ah-chai, nn̄g lâng kóaⁿ chi̍t tīn ah-bî-á, iân Tōa-tō͘-khe piⁿ kiâⁿ, lō͘-tô͘ nā keng-kè siu tang ê chhân-hn̂g, tō kóaⁿ ah-bî-á khiò lak-tī thô͘-kha ê chhek-á chia̍h, keng-kòe chi̍t-mê chi̍t-ji̍t, chiong-kî-bóe tńg kàu O̍h-chhân chng.
Tī O̍h-chhân chng ê tang-pêng, ū chi̍t tiâu Pâi-á khe, ko͘-tiūⁿ kúi-nā nî lóng sī chhōa chi̍t tīn ah, tī hia liû-lōng, chi̍t-chúi koh chi̍t-chúi, chia̍h kah khùn lóng tī khe-piⁿ, ko͘-tiūⁿ ê hóe-si̍t ū ùi chhù tòa–lâi ê bí, iâm, chiùⁿ-chhài kah a-kū kui-tēng chi̍t-kang ē-tàng chi̍t-lia̍p ê ah-nn̄g, sui-jiân ū-sî siūⁿ beh ke chia̍h chi̍t-lia̍p mā m̄-káⁿ, si̍t-chāi ū kàu láu-si̍t.
Ū chi̍t-pái lo̍h hiong-kông-hō͘, khe-chúi tiùⁿ khí–lâi, in-ūi kiaⁿ ah-á hō͘ chúi lâu–khì, it-tēng ē hō͘ a-kū phah, tō piàⁿ-sì kóaⁿ ah khí–lâi, ko͘-tiūⁿ sòa hō͘ chúi chhiâng-cháu, hó-ka-chài, lâu khì hō͘ tek-bô͘ khêⁿ leh, ko͘-tiūⁿ hit tiâu miā, chiah khioh–tńg-lâi.
Siōng chhám–ê chi̍t pái sī tio̍h ah-che, sún-sit chi̍t-kóa ah, ko͘-tiūⁿ ê a-kū hoat-sèng-tē, koài i bô jīn-chin kò͘, chiah ē tio̍h pēⁿ, tō giâ pún-taⁿ tùi ko͘-tiūⁿ tōa-la̍t hám–lòe, it-ti̍t hám, ti̍t-kàu ko͘-tiūⁿ tó tī thô͘-kha hun-hun-sí-sí khì, bô beh koán i ê sí-oa̍h, keng-kè chin-kú, ko͘-tiūⁿ chiah cheng-sîn.
Ū sî-chūn, ko͘-tiūⁿ ê a-bú siūⁿ beh khòaⁿ kiáⁿ, tō cháu khì Pâi-á khe ê khe-piⁿ chhōe, Pâi-á khe chiâⁿ tn̂g, sī beh tī tó-ūi chiah chhōe ē tio̍h? Cha̍p-pái mā bô chi̍t-pái tú ē tio̍h! Chi̍t kang ê hông-hun, bú-á-kiáⁿ sio tú–tio̍h, nn̄g lâng lám leh khàu, khàu chin kú, hong chhoe kòe khe-piⁿ ê tek-bô͘, tek-hio̍h-á sio chhè ê siaⁿ, kah bú-kiáⁿ ê khàu-siaⁿ lóng-chóng ha̍p chò-hóe, chit khoán chêng-kéng si̍t-chāi hō͘ lâng sim-sng, ba̍k-sái ná khe-chúi lâu bē thêng.
Āu–lâi, ū chi̍t ê bat a-kū ê chò-chhân-hiaⁿ, tī khe-piⁿ tú-tio̍h ko͘-tiūⁿ, kā kóng, lín a-kū bē-tàng hō͘ lí khò chi̍t-sì-lâng, m̄-thang koh tòe i chò-gû chò-bé! Hit mê, ko͘-tiūⁿ tō tńg–khì, khoán pau-ho̍k-á, cháu khì pa̍t chng-thâu kā lâng chòe tn̂g-kang. Ko͘-tiūⁿ ê jîn-seng tō chhin-chhiūⁿ chi̍t châng hông ta̍h teh ê iá-chháu, in-ūi hit ê chò-chhân-hiaⁿ ê kó͘-lē kah ka-kī ê ióng-kám, kā hit ki kha sóa-cháu, ùi chia khai-sí, ko͘-tiūⁿ tō chhut-thâu-thiⁿ ah!
