Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◉William Barclay
台譯◉陳惠雅
Tī十二使徒ê名表內底，彼得lóng hō͘人排tī第一。彼得是使徒內底逐家siōng熟似ê領袖，m̄-koh tī新約聖經內底，伊koh有另外三个名。
1. 伊頭一pái出現ê時hŏng叫做Se-bûn （西門，馬可福音1章16節；約翰福音1章40、41節），西門是伊ê本名，馬太講伊是「叫做彼得ê西門」（馬太福音4章18節、10章2節），而且自頭到尾lóng叫伊西門。彼得hŏng叫做西門，通常是兩種情況：tī家庭中間，馬可kap路加bat講tio̍h西門ê厝kap西門ê丈姆（馬可福音1章29、30節；路加福音4章38節）。路加有講起西門ê漁船kap掠魚ê同伴（路加福音5章3～10節）。Tī哥尼流受指示去請彼得去in兜ê時，kā彼得號做西門（使徒行傳10章5、18節；11章13節）。另外一種是描述伊kap主耶穌中間偉大koh親密ê關係ê時，伊mā hông叫做西門：耶穌叫伊kā船駛去水khah深ê所在ê時（路加福音5章4節）；tī該撒利亞腓立比，耶穌kā呵咾ê時；tī客西馬尼園，伊thiám kah睏去ê時（馬可福音14章37節）。總講一句，「西門」是熟似彼得ê人leh叫–ê。
2.新約聖經內底有兩pái kā叫做Se-biān，西面，Simeon）。一pái是雅各án-ne kā叫（使徒行傳15章14節），一pái是tī用伊ê名義所寫ê批信內底（彼得後書1章1節）。Se-biān是伊ê名ê希伯來話發音；Se-bûn是Se-biān ê外來語變化音，所以，tī耶路撒冷ê教會中間，in lóng用伊原來ê希伯來名，kā 叫做Se-biān，這是真自然ê代誌。
3.若án-ne，西門是怎樣變做彼得？這是主耶穌kā號ê新ê名（馬可福音3章16節；路加福音6章14節）。這項代誌tī約翰福音有siōng完整ê紀錄。安得烈kā伊ê兄弟西門chhōa來耶穌ê面前，耶穌tùi伊講：「你to̍h是約翰（「約拿」，參照馬太福音16章17節）ê kiáⁿ西門；你beh稱做磯法。」（約翰福音1章42節）磯法翻譯出來，to̍h是彼得（石磐）。咱知影，磯法hām彼得是仝一个名ê無仝形式。Che真趣味：約拿ê意思是chíⁿ-á（粉鳥），m̄-koh磯法或者是彼得ê意思是石磐。所以，耶穌tùi彼得所講ê意思就是：「到今，你猶原親像一隻chhong-pōng koh軟汫ê chíⁿ-á。M̄-koh，你若倚靠我做你ê主，kā你ê性命交託hō͘我，我to̍h beh hō͘你成做石磐。」耶穌hō͘西門一个新ê名，表達出耶穌tùi彼得ê向望kap目標。福音書ê作者tiāⁿ-tiāⁿ kā彼得ê新名kap舊名排列做伙，稱伊做西門彼得（馬太福音16章16節；路加福音5章8節），這mā是約翰福音siōng捷用來稱呼西門ê方式（約翰福音1章40節，6章18節，13章6、7、24、36節，18章10、15、25節，21章2、3、7、11、15、16、17節）。
4.咱已經講過磯法kap彼得是仝一个人ê名，彼得是希臘文，磯法是亞蘭文ê「石磐」ê意思。Tī古早ê世界，差不多逐个人lóng ē-hiáu講希臘話kap家己ê母語，所以真濟人lóng有兩个名，一个是tī社會抑是事業teh用ê希臘名，另外一个是chhin-chiâⁿ朋友中間私底下用ê名。所以，多馬也稱做Té-thó͘-má（底土馬），多馬是亞蘭語，底土馬是希臘語「雙」ê意思。Tāi-pí-tāi（大比大）又koh號做To-ka（多加），亞蘭語ê大比大tī希臘語翻譯做多加，意思是「羚羊」。保羅一直稱呼彼得做磯法（哥林多前書1章12節，3章22節，9章5節，15章5節；加拉太2章9節）。因為彼得是向偤太人做使徒ê，所以保羅自然to̍h用偤太人ê名來稱呼伊（2章9節）。可能是因為彼得kap馬可ê關係真密切，彼得tī頭一張批信內底稱呼馬可是「我ê kiáⁿ馬可」（彼得前書5章13節）。彼得kap馬可福音書可能mā有真密切ê關係。主後第二世紀前半期，希拉波利斯（Hierapolis，今土耳其ê棉花堡）ê主教帕皮亞（Papias，70～155年）是熱心研究福音書寫作kap編纂問題ê學者，關係馬可福音書，伊講：
「馬可是彼得ê詮釋者，伊詳細記錄伊所會記得ê代誌。M̄-koh，馬可ê目的m̄是beh為基督ê言行做紀錄，因為伊m̄-bat親身聽過主講話，mā m̄-bat親身跟tòe耶穌。而且，親像我teh講ê，馬可跟tòe彼得，ùi彼得hia接受彼得對聽眾ê教導，無特別beh kā主ê教示組織起來。馬可án-ne做並無m̄-tio̍h，伊不過是想beh將伊會記得ê代誌記落來niā-niā，m̄是thiau-kang beh省略，mā無kā無實在ê言論khǹg tī內底。」
Ùi chia ê 資料，咱to̍h知影，馬可ê福音書是彼得ê講道，伊一定是leh呵咾彼得無掩崁家己ê過失，有當時仔會hō͘主指責，以及伊嚴重ê不忠。Tī chia ê代誌，彼得顯明基督對伊ê赦免kap疼，以及基督重新kā塑造ê恩典是偌爾深。
彼得本底是一个掠魚ê，伊tī漁船洗網仔ê時，hō͘耶穌呼召（馬可福音1章16節）。彼得是已經結婚ê人（哥林多前9章5節），伊ê厝tī迦百農，耶穌tī迦百農傳道ê時，可能是用in ê厝做佈道ê基地，因為耶穌bat tī hia kap當地ê會堂中間出出入入，koh bat tī hia 醫治彼得ê丈姆（馬可福音1章29～30節；路加福音4章38節；馬太福音8章14節）。
彼得是加利利ê人，而且是正港ê加利利人，歷史家約瑟夫（註2）bat擔任加利利ê總督，所以對加利利人真了解。伊講：「In好玄、無定性，koh愛攪亂……in隨時準備beh跟tòe一个領袖起來造反。」接紲，伊koh講， in ê性地真bái koh愛冤家。M̄-koh，雖莽是án-ne，in mā是世上重情重義ê人，「加利利人永永bē無膽」（Josephus, Life 17；Wars of the Jews 3.3.2）。偤太法典Talmud講加利利人是：「In tùi-tiōng榮光khah過頭tī趁錢，一直是按呢。」愛受氣、衝碰、感情豐富，真愛冒險，m̄-koh做人真盡忠——彼得實在是一个正港ê加利利人。
彼得真緊tō tī十二使徒ê中間成做頭人。馬太tī伊ê十二使徒ê名單中間用這句話做起頭：「頭一个西門」（馬太福音10章2節）。「頭一个」tī希臘文聖經ê原文是Protos，意思是「第一」，mā是「首領」ê意思；所以，馬太可能m̄是kan-ta kā排tī頭一个，siâng-sî mā是beh說明彼得是使徒ê領袖。
Tī十二使徒ê中間有一个三人小組，to̍h是hām耶穌特別親近ê彼得、雅各kap約翰。Tī一寡仔場合，lóng kan-ta in kap耶穌做伙：睚魯 ê cha-bó͘-kiáⁿ koh活（馬可福音5章37節；路加福音8章51節）、耶穌tī山頂改變面貌（馬太福音17章1節；馬可福音9章2節；路加福音9章28節）、tī客西馬尼園內（馬太福音26章37節；馬可福音14章33節）、彼得kap約翰被chhē去耶路撒冷備辦pôaⁿ過節ê晚餐（路加福音22章8節）。
Tī福音書，彼得是十二使徒ê發言人，伊提出疑問（馬太福音15章15節；路加福音12章41節）問耶穌：「Tio̍h赦免人幾pái？」、「人若pàng-sak一切來跟tòe耶穌有啥物報賞？」等等ê問題（馬太福音19章27節）。彼得問無花果樹枯焦代誌（馬可福音11章21節）、聽耶穌談論末日ê代誌（13章3節），收丁稅ê人來見彼得，要求耶穌納丁稅（馬太福音17章24節）。耶穌問啥人tī群眾中間kā摸ê時，彼得kā耶穌回應（路加福音8章45節），向koh活ê基督提出質問ê，mā是彼得（約翰福音21章21節）。 （後期koh刊）
註：
1. 真濟中文聖經、現代台語聖經猶原翻譯做「西門」，西面（巴克禮聖經）khah倚近讀音。
2. 約瑟夫（Josephus, 37?～95年）偤太歷史家，bat做過加利利ê總督。
