Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◉William Barclay
台譯◉陳惠雅
咱若ùi新約ê資料來研究彼得ê生平，to̍h會得tio̍h一寡仔偉大ê事實：
1.大發現：這tī共觀福音kap約翰福音lóng有記載，按約翰福音ê描述，耶穌hō͘五千人食飽了後，逐家想beh推sak耶穌出來做王，m̄-koh伊拒絕（約翰福音6章1～15節），結果真濟人感覺失望，to̍h無koh跟tòe耶穌。耶穌問伊揀選ê門徒是m̄是也beh離開，彼得這時宣告伊偉大ê發現：「主ah，祢有永遠活命ê話，阮tio̍h koh去tòe啥人？阮已經信，koh確實知祢是上帝ê聖ê。」（6章66～69節）
Tī共觀福音，這層代誌koh khah戲劇化，耶穌因為離開ê日子beh到，反對ê勢力逼近，伊想beh知影有佗一个門徒知影伊是啥人，to̍h chhōa門徒向北行ùi該撒利亞腓立比ê庄社，沿路kap in談論koh教導。耶穌提出一个問題：「人講我是啥人？」In kā主講，有人講伊是行洗禮ê約翰，有人講伊是先知之一，chia-ê 雖然是偉人，m̄-koh kap耶穌bē-tàng比並。耶穌直接問：「Lín講我是啥人？」這時，彼得應講：「祢是基督，永遠活ê上帝ê Kiáⁿ。」（馬太福音16章13～16節；馬可福音8章27～29節；路加福音9章18～20節）。準講彼得是因為m̄知beh講啥才án-ne講，伊仝款是頭一个發現「拿撒勒人耶穌是啥人」ê使徒。
2.大應允：彼得ê發現hō͘伊得tio̍h大應允，耶穌對彼得講：「你ê名叫做彼得，意思是石磐。我beh tī chit ê石磐頂，起造我ê教會。」（馬太福音16章18節）這个應允ê意義bē僫理解，因為彼得是頭一个發現耶穌身分ê人，是頭一个做信仰告白ê人，到今，每一个進入教會ê人mā lóng需要做這个信仰告白。事實是，彼得是基督tī地面ê教會ê頭一个會員，才會講彼得是教會ê基石。咱會使ùi彼得對基督徒ê勸勉看出伊ê想法：「Lín mā tio̍h做活石，來hō͘上帝起造屬靈ê殿。」（彼得前書2章5節）每一个基督徒攏是基督教會這个大建築物內底ê一粒活石，彼得是其中ê頭一个，mā是拍地基ê hit粒石。
3.大責備：to̍h tī彼得偉大ê信仰告白發表了後無偌久，耶穌預言家己ê死（馬太福音16章21節；馬可福音8章31節；路加福音9章22節）。彼得真tio̍h驚，而且反對。面對彼得ê抗議，耶穌對彼得講：「撒但，退去我ê後面！」（馬太福音16章22、23節；馬可福音8章32、33節）耶穌ê譴責，hō͘彼得無辯解ê機會。咱會使ùi彼得kap耶穌雙方ê觀點來了解。
彼得對耶穌teh beh死亡ê預言非常tio̍h驚，可能有兩个原因：
a) 因為疼耶穌，彼得對耶穌付出全部ê熱情，致到彼得無法度想像耶穌ê性命隨時to̍h beh結束tī十字架頂。
b) 因為這層代誌違背彼得進前所領受ê教示，kap彼得ê所知所信無仝。馬太福音記載，耶穌問：「人teh講人子是啥人？」（馬太福音16章13節）耶穌確實tiāⁿ-tiāⁿ自稱人子（路加福音9章58節，7章34節，19章10節；馬可福音10章45節）。這个稱號m̄是耶穌家己號ê。Tī舊約kap新約時代ê中間siōng有影響力koh逐家siōng知影ê冊是《以諾書》。Tī這本冊內底有講，人子是先存ê、天頂ê、超過現世ê人物，tī天頂等beh來世間完成上帝對這个世界kap人類ê旨意：
「你所看見ê人子beh叫君王kap有大氣力–ê ùi眠床起來，叫勇壯–ê離開in ê寶座。伊beh消滅勇壯–ê ê政權，koh beh kā 罪人ê喙齒摃hō͘碎。伊mā beh捙倒hia ê王ê統治kap國，因為in無稱頌伊，in mā無因為伊kā國賜hō͘ in來感謝伊。伊beh hō͘ in歹看面，hō͘ in見笑：烏暗beh成做in ê徛家，蟲是in ê 眠床，in無koh有向望thang ùi眠床頂peh起來，因為in無稱頌主ê名。」（以諾書46章2～5節；參照48章2～10節）。
彼得kiò是講人子是天頂ê人物，有無上ê權柄kap榮耀，會當毀滅伊ê對敵。M̄-koh，taⁿ耶穌soah beh kā人子kap基督受難liân做伙，這是彼得絕對無法度接受ê。
彼得對耶穌ê受苦kap死亡ê預言反應chiah-nī大，可能是kap伊對耶穌ê疼kap伊ê思想背景，hō͘伊無法度接受kap相信這款ê代誌會發生。
耶穌對這層代誌ê反應是kā彼得責備：「撒但，退去我ê後面！」（馬太福音16章23節）耶穌嚴嚴kā彼得責備是有道理ê。因為彼得用魔鬼tī曠野考驗耶穌ê試探來考驗耶穌（馬太福音4章1～11節；路加福音4章1～13節）。Hō͘ in食物——he是想beh用物質ê豐富來收買人ê忠誠。Ùi殿ê頂懸跳落來——he是想beh用五感ê享受來迷惑人。跪落來拜我——he是kap這个俗世ê方式妥協ê試探。耶穌為tio̍h十字架ê路，伊拒絕權柄kap榮耀ê試探，tī該撒利亞腓立比，耶穌koh一pái面對仝款ê試探——雖罔這pái是因為彼得對伊ê疼。
4.彼得否認主hit暝，是彼得一生siōng烏暗ê時刻。Tī hit間厝ê樓頂一間款好勢ê大廳，彼得bat堅定表示伊死mā beh跟tòe耶穌（路加福音22章33節）、tī客西馬尼園，彼得bat拔刀準備beh為伊敬疼ê主賣命（約翰福音18章10～11節）。M̄-koh，tī大祭司in厝ê埕裡，彼得ê腔口漏洩伊ê身分，tī逐家指出伊kap耶穌有關係ê時，彼得趕緊講伊m̄-bat耶穌（馬太福音26章69～75節；馬可福音14章66～72節；路加福音22章54～62節；約翰福音18章15～27節）。有一層代誌咱tio̍h注意，咱定定想講欲kā彼得責備是真簡單。事實是，其他ê人lóng驚kah走閃四界去bih，彼得猶原koh敢去大祭司in厝ê後埕（馬太福音26章58節；馬可福音14章54節；路加福音22章54節）。雖罔彼得失敗，總是，tī逐家lóng走了了ê時陣，干焦彼得單獨面對現實，這只有勇敢ê人才做會到。Koh再講，咱應該ài知影，彼得m̄認主ê悲劇，一定是彼得家己講出來ê，m̄是別人講ê。因為馬可福音nā是收集彼得ê講道材料，彼得ê講道一定有講tio̍h伊án-chóaⁿ失敗kap基督án-chóaⁿ kā赦免。
5.Tī新約，彼得ê歷史m̄是án-ne to̍h結束，是直直到大使命完成。Ùi福音故事，咱看tio̍h彼得tī耶穌死了後，koh召集使徒，這ê行動本身真有勇氣kap道德，因為in lóng知影彼得bat否認in ê主。彼得是siōng代先趕到耶穌ê墓前koh發見墓內空空ê頭一人（約翰福音20章6節），耶穌hō͘彼得不凡ê使命（馬太福音16章7節），特別顯現hō͘看（哥林多前書15章5節）。無人知影彼得tn̄g tio̍h koh活ê主了後有啥發現，m̄-koh，伊一定有發覺一个道理：「饒赦比講大道理koh khah會使hō͘人面對錯誤，koh m̄免chhōe藉口。」路尾，彼得tī湖邊接受基督交託hō͘伊ê使命：為主養飼伊ê羊（約翰福音21章15～17節）。
6.彼得ê故事到chia猶袂結束，主應允伊ê話chit-má才勻勻仔beh實現。Tī使徒行傳ê起頭幾章，彼得成做教會ê領袖，揀選另外一个人來代替背叛ê使徒偤大ê位，he to̍h是彼得代先提出ê建議（使徒行傳15章15節）。彼得tī五旬節ê時是教會ê發言人，伊發表頭一篇基督徒ê講道（2章14～40節）。彼得kap約翰tī聖殿ê「Súi門」hia醫好跛跤ê人（3章1～11節）。彼得kap約翰因為傳基督，hō͘人掠起來，伊大膽違抗「三合林」（註3）（4章1～22節，12章1～11節）。彼得是210代先kā福音傳到撒瑪利亞ê人，行邪術ê西門ê事件mā是伊處理ê（8章12～25節）。彼得嚴格處置亞拿尼亞kap撒非喇ê無老實（5章1～11節），以尼雅kap多加ê病mā是彼得醫好ê（9章32～43節）。 （Āu kî koh khan)
註3.「三合林」（Sanhedrin）是大祭司做頭ê民間領袖所組成ê議會，是偤太人siōng懸ê宗教法庭。
