Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Sih chì-kéng
Tī chiap tio̍h tiong-lâng thong-ti kóng chhù-the̍h sêng-kau liáu-āu, góa chiah khai-sí hoân-ló poaⁿ-chhù ê tāi-chì. Tāi-seng ài chiong lóng-chóng ê mi̍h-kiāⁿ chheng chhut–lâi, koh kā beh-ti̍h kap m̄-ti̍h–ê hun-lūi kap chng-siuⁿ.
In-ūi beh poaⁿ tńg-khì Tâi-pak, hia ê khong-kan khah e̍h, tio̍h chhú-lí tōa-hêng ka-kū. Goân-pún siūⁿ kóng sàng hō͘ bóe chhù ê lâng-kheh, khó-sioh i kan-ta kéng kúi-hāng-á in ha̍h-ēng ê, chhun lo̍h-lâi ê 60 chhùn tiān-sī sàng hō͘ bōe-chhù sió-chiá, kî-thaⁿ ê nā beh kau hō͘ Khoân-pó kio̍k chhú-lí, tio̍h ka-kī poaⁿ khì in chí-tēng ê só͘-chāi khǹg.
Góa siūⁿ, nā kā chhâ-thâu ka-kū bōe hō͘ jī-chhiú tiàm, m̄-nā bián ka-kī poaⁿ, koh thang ke-kiám bōe chi̍t kóa chîⁿ. Góa sûi-sî liân-lo̍k tī bāng-lō͘ chhōe–tio̍h ê jī-chhiú tiàm. Thâu-ke iau-kiû seng hip-siòng hō͘ khòaⁿ, chiah koat-tēng beh a̍h m̄. I khòaⁿ tio̍h Bí-lô goân-bo̍k ê tiān-sī-kūi, chiū tong-ji̍t ē-po͘ 2 tiám gōa ùi Lāi-ô͘ sái chhia (téng-bīn mā lóng sī goân-bo̍k ka-kū) piàⁿ lâi Sin-tiàm soaⁿ-téng.
Chi̍t ê siⁿ chòe chhin-chhiūⁿ goân-chū-bîn, iok-lio̍k 30 chhut-thâu hòe ê “thâu-ke” chhōa chi̍t ê kiám i bô kúi hòe ê chheng-liân tàu-tīn lâi. In ùi chhia-khò͘ peh lâu-thui khí–lâi liáu-āu, khai-sí hoat-hui hiâm táng hiâm sai ê kang-hu, liâm-piⁿ kóng goán tau m̄-sī it-lâu, beh poaⁿ chin hùi-khì; liâm-piⁿ kóng í-chá Bí-lô tiān-sī-kūi bōe 5 bān gōa kho͘, chit-má kan-ta 3 bān gōa; koh hiâm gû-phôe phòng-í jiâu-phé-phé. In ta̍k-hāng tō hiâm kah bô chi̍t tè hó.
Góa chhiáⁿ i pò-kè, i chiū khai-sí hoat-hui i kóng-ōe ê choan-gia̍p, lau̍h chi̍t kù kóng: Góa khui-kè, lín chhian-bān m̄-thang tio̍h-kiaⁿ. Chit-sî, góa í-keng sim-lāi iú-sò͘. Tō án-ni, i kā phòng-í khui-kè 800, Ìn-tō͘ tê-toh 1000, liân i siōng kah-ì ê tiān-sī-kūi mā kan-ta 1500 (góa thiaⁿ–tio̍h, hiám-hiám-á poa̍h-tó), góa chhân-chhân kóng phòng-í ê kè-siàu tio̍h ke 200, i a-sa-lih sûi chiap-siū. (Án-ne, chiū chai-iáⁿ i khui ê kè-siàu mā chin hiông! ) Lō͘-bóe, kan-ta bōe i phòng-í kap tê-toh, kè-kiōng 2000 kho͘ ( tong-chho͘ chit nn̄g hāng khai-hùi góa 10 thóng bān ).
Chit pái kau-e̍k hō͘ góa 2 ê khé-sī: 1. Eng-hiông chhut siàu-liân, keh hâng ná keh soaⁿ. 2. Thiⁿ-ē bān-poaⁿ lóng ū tēng kî, sin ê mi̍h piàn kū chiū m̄ ta̍t-chîⁿ.
