Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◉William Barclay
台譯◉陳惠雅
M̄-koh，彼得siōng偉大ê行動是接納外邦人哥尼流成做基督教會ê會員（使徒行傳10章1節～11章18節）。偤太人kiò是家己是上帝ê選民，to̍h藐視外邦人，in無法度想像ài kap外邦人做伙分享上帝ê恩典。彼得知影耶穌基督ê福音是beh傳到全世界，伊tī耶路撒冷ê議會促成教會拍開門hō͘外邦人入來（15章7～11節）。因為彼得ê行動，hō͘教會體會tio̍h這个偉大ê事實：「上帝mā有hō͘外邦人悔改，來得tio̍h活命」（11章18節）。
以上是新約聖經所留hō͘咱關係彼得ê經文，彼得是基督教會內偤太人偉大ê頭人。
新約聖經以外，早期ê教會有流傳一寡關係彼得ê傳奇故事，chia-ê故事對彼得ê身分有三種無仝ê講法：
1.彼得kap安提阿ê關係：聽講彼得bat tī安提阿做主教七冬久，彼得有可能是「福音頭pái傳hō͘外邦人」（11章20節）kap 「門徒開始hō͘人叫做基督徒」（11章26節）hit所在ê教會領袖。
2.彼得kap小亞細亞ê關係：chia是講彼得tī安提阿了後，koh有去小亞細亞傳道理。這mā毋是無可能ê代誌。因為伊ê批信是寫hō͘ tī本都、加拉太、加帕多家四散避難ê基督徒（彼得前書1章1節）。彼得前書內底有一个難題：批信路尾ê請安寫講：「Tiàm tī巴比倫kah lín平平受揀選ê教會」（5章13節）。咱tio̍h án-chóaⁿ看巴比倫這个字?有少數ê學者tō照字面ê意思來解說：B. H. Streeter主張講，彼得tī巴比倫傳道理m̄是無可能，伊ê觀點是：Khiā tī巴勒斯坦人ê立場，偤太人本來tio̍h會轉去巴比倫，因為受掠ê偤太人多數lóng無轉去故鄉，「siōng純kap siōng正統ê東正教ê中心，一直是美索不達米亞」。Tī五旬節ê時，有講偤太人ùi帕提亞、米底亞、以攔kap美索不達米亞來ê偤太人。偤太歷史學家約瑟夫真重視巴比倫，所以伊hi̍t本亞蘭文ê著作《偤太戰爭》初版ê冊中有特別指明，hi̍t本冊是為tio̍h幫助tī巴比倫kap美索不達米亞ê偤太同胞。偤太律法siōng偉大ê註解是巴比倫ê偤太法典（Talmud），若beh chhōe tio̍h偤太學者ê精華，tō必須進入巴比倫。這是chiâⁿ-si̍t ê，m̄-koh到今chhōe無關係彼得bat tī巴比倫傳道ê事蹟。所以，巴比倫百面是teh講羅馬，因為啟示錄確實tio̍h是用巴比倫leh比喻羅馬（啟示錄14章8節，16章19節，17章5節，18章2節）。Eusebius這个偉大ê歷史家相信，彼得前書內底ê巴比倫tio̍h是teh講羅馬。伊寫講：「In講彼得掠巴比倫ê城做象徵，tio̍h kán-ná伊講ê，he是teh寫羅馬。」（Eusebius, Ecclesiatica History. 2.15）早期ê基督徒想tio̍h羅馬ê規模kap氣力、罪惡kap殘暴，tō kán-ná古早ê巴比倫，所以in定定用巴比倫來稱呼伊。咱有充分ê理由相信彼得bat tī小亞細亞宣講道理，mā仝款會當肯定伊m̄-bat去過巴比倫。
3.早期教會ê傳統lóng認為彼得bat去過羅馬：he大概tī主後61年，而且伊tī hia殉道。次經內ê《彼得行傳》留hō͘咱一个趣味ê故事：彼得kap hit ê bat tī撒馬利亞hām伊起糾紛、行邪術ê西門koh起衝突（使徒行傳8章9～24節）；西門講伊家己bat hō͘一个少年人ùi死koh活，m̄-koh伊ê騙局去hō͘彼得點破，西門mā因為伊ê陰謀來死去。M̄-koh，西門tī羅馬有bē少人kā支持，致到彼得ê對敵mā bē少。Siōng慘ê是，彼得ê講道hō͘亞基帕王ê四个細姨反悔，改變in ê生活。M̄-nā án-ne，因為受tio̍h彼得ê影響，皇帝ê寵幸ê大臣亞比努ê牽手Xanthippe開始禁慾koh獨身。亞基帕kap亞比努受氣，決心beh殺害彼得。彼得ê朋友kap教會lóng勸伊緊走，留一條命繼續服事主。彼得逃出城外了後，tú tio̍h tng beh進入羅馬ê主。「主啊！」伊叫講：「祢beh去佗位？」（Dommine quo vadis?）主講：「我tn̄g beh去羅馬koh hŏng釘一pái十字架。」彼得講：「主啊！祢beh koh hŏng釘一pái？」「是啊，彼得！」主講：「我 beh koh去hŏng釘死一pái。」（彼得行傳35章）彼得明白，耶穌beh去羅馬夯彼得逃閃ê hit ê十字架。因為án-ne，彼得行轉去羅馬。In強迫彼得目睭金金看伊ê牽手受釘。Hit時，彼得大聲對伊ê牽手講：「Tio̍h ài會記得主！」（Eusebius, Ecclesiastical History. 3.30）彼得ê勇氣感動顧監ê人， in mā接受基督ê信仰。彼得要求kā伊ê頭kap跤顛倒頭釘，伊講家己不配kap伊ê主用仝款ê方式受釘。（Eusebius, Ecclesiastical History. 3.1）彼得為主殉道，成做英雄。
彼得有真濟過犯，m̄-koh伊ùi頭到尾堅持伊疼主ê心。法拉（F. W. Farrar）講彼得siōng偉大ê所在tio̍h是伊定定跋倒kap失敗，「伊到尾恢復勇氣koh保持伊ê忠心。」路加用戲劇化ê描述來結束彼得毋認主ê故事：「Hit時，主oa̍t頭注神看彼得」（路加福音22章61節）。耶穌ê目睭注神看彼得，呼召伊koh轉來榮光kap忠實ê路。所以，咱mā án-ne祈禱：「我teh憢疑ê時陣，求祢kā我看，hō͘我siūⁿ–khí-lâi！」(全文結束)
延伸閱讀：主 ê 門徒
