【台文世界】Góa Só͘ Ài ê Kò͘-hiong

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◎Iâu Chì-liông

我所愛的故鄉

中央山脈 到海邊
守護臺灣 得徛起
百姓勤奮 閣專一
逐家相疼 相扶持

感謝上天 好排比
芳花果子 滿滿是
五穀菜蔬 攏齊備
寶島子民 真福氣

Góa Só͘ Ài ê Kò͘-hiong

Tiong-iong soaⁿ-me̍h kàu hái-piⁿ
Siú-hō͘ Tâi-oân tit khiā-khí
Peh-sìn khîn-hùn koh choan-it
Ta̍k-ke saⁿ-thiàⁿ saⁿ hû-chhî

Kám-siā Siōng-thiⁿ hó pâi-pí
Phang-hoe kóe-chí moá-moá-sī
Ngó͘-kok chhài-se lóng chiâu-pī
Pó-tó chú-bîn chin hok-khì

Móa-sim kám-siā Siōng Chú ê un-thāi, lâng si̍t-chāi chin bî-sè, bô siáⁿ thang khoa-kháu–ê, nā ē-hiáu chûn kèng-ùi ê sim, tī té-té ê jîn-seng tō-ē kám-siū–tio̍h lán tī sè-kan só͘ tú-tio̍h–ê sū-sū hāng-hāng lóng ū Chú chin-hó chin-súi ê pâi-pí, bô tú–tio̍h tō bē kám-siū–tio̍h. Ēng chòe-kīn tiong-iong khì-siōng-kio̍k hoat-pò͘, 2024 nî 10 goe̍h chhe-jī San-tô͘-jî hong-thai chhim-si̍p Tâi-oân sī tùi Ko-hiông Sió-káng teng-lio̍k, tì-sú chin chē lāu-chhiū-châng tó tī chú-iàu tō-lō͘ koh sī tó kui-pâi, sò͘-liōng si̍t-chāi ū kàu chē chheng beh kui goe̍h-ji̍t, ū kúi ê kong-hn̂g iáu-teh chéng-lí… Ko-hiông tē-khu liân hioh sì-ji̍t hong-thai kà-kî, chē-chē tiong-pak-pō͘ ê pêng-iú lâi Ko-hiông chiah chai-iáⁿ chit ê hong-thai sī hiah khióng-pò͘, chóng-sī hong-thai teng-lio̍k ko-hiông āu pōng-tio̍h “Tiong-iong-soaⁿ-me̍h” chi̍t-ē-á tō siau-hong–a, bô ui-le̍k–ah, hong-thai ê kiat-kò͘ chin-kín tō soàⁿ-soàⁿ-khì.

Khong-jōe hong-thai 11 goe̍h chhe-jī chiap-sòa chhim-si̍p Tâi-oân tang-pō͘, chit-ê kì-lio̍k sī 1958 nî lâi tī 10 goe̍h hā-sûn teng-lio̍k Tâi-oân ê kiông-lia̍t hong-thai; tùi khì-siōng-ūi-chhiⁿ hip–tio̍h ê siòng-phìⁿ, hoān-ûi si̍t-chāi ū kàu tōa, ū kàu khióng-pò͘–ê, Khong-jōe hong-thai leh cháu ê sok-tō͘ chin kín koh sī ti̍t-chiap hiòng Tâi-oân chhiong–lâi, chin chē kok-ka ê khì-siōng tan-ūi chhiáⁿ Tâi-oân tō-ài te̍k-pia̍t chù-ì hông-chí hong-hō͘ ê gûi-hāi. Khong-jōe hong-thai poàn-kèng 320 kong-lí kā Tâi-oân lóng pau-tī hoān-ûi lāi; 10 goe̍h chhe San-tô͘-jî hong-thai tùi Ko-hiông teng-lio̍k, hong-thai ê lō͘-kèng tùi chhī-lāi keng-kòe hō͘ kiông-hong chhoe kah chin giâm-tiōng. Ta̍k-ke thiaⁿ tio̍h 11 goe̍h koh-ū kiông-lia̍t hong-thai beh tùi Tâi-oân lâm-pō͘ hū-kīn keng-kòe, chiok chē lâng lóng chhoah leh tán.

Chit phiⁿ bûn-chiuⁿ thâu-chêng ê chhit-jī-á si, sī 2016 nî 6 goe̍h kap Lîm Tō-seng lāu-su ha̍p-chok, góa siá koa-sû, Lîm lāu-su phó͘-khek, chit-siú “Góa Só͘ Ài Ê Kò͘-hiong” lāi-té ê koa-sû; “Tiong-iong soan-me̍h kàu hái-piⁿ, siú-hō͘ Tâi-oân tit khiā-khí.” Tùi chit nn̄g-ê chhim-si̍p Tâi-oân ê hong-thai, hō͘ lán chai-iáⁿ “hō͘-kok soaⁿ-me̍h” ū jōa lī-hāi, lán chin-chiàⁿ ài tōa-tōa kám-siā Siōng Chú ê liap-lí, hō͘ Tâi-oân ū “Tiong-iong-soaⁿ-me̍h” leh siú-hō͘, lán chiah ē-tit-thang an-ún khiā-khí. Chit siú “Góa Só͘ Ài Ê Kò͘-hiong” kin-nî 11 goe̍h chhe-káu pâi tī Pîn-tong ián-gē-thiaⁿ thâu-chi̍t-pái pâi-ián, 12 goe̍h chhe-peh beh tī Ko-hiông bûn-hòa-tiong-sim ián-chhut.

Sio̍k-gí kóng: “11 goe̍h thai bô lâng chai.” Chit pái hong-thai khah chiap-kīn Tâi-oân tang-pō͘ ê sî-chūn, tō chhoe 10 kip í-siōng chūn-chūn kiông-hong, choân Tâi-oân tī hong-hō͘ iáu-bōe chhim-ji̍p, tāi-ke tō chiok iōng-sim chún-pī hông-chí chai-hāi ê kang-chok. Put-jī-kò tng hong-thai tùi “Tâi-tang Sêng-kong” teng-lio̍k āu, tī Lân-sū, Le̍k-tó, Hoe-liân-káng, Hong-pin chhoe 17 kip phò-hoāi-sèng ê chūn-hong, 17 kip í-keng sī chhek-liōng hong-sok kip-sò͘ ê siāng-koân kip, thiaⁿ sin-bûn pò-tō hām chhek-liōng hong-sok ê gî-khì mā chhoe kah pháiⁿ–khì.

Goân-pún tī ūi-chhiⁿ khì-siōng-tô͘ chiok chheng-chhó ê “hong-thai-gán” tú-tio̍h Tiong-iong-soaⁿ-me̍h, chi̍t-ē-á tō hō͘ “hō͘-kok soaⁿ-me̍h” phò-hoāi kah bô tè khoàⁿ, ē-sái-kóng kúi cha̍p bió-á, hong-thai ê kiat-kò͘, kiông-tō͘, hong-sok chin-kín sit-khì ui-le̍k, chìn-ji̍p Tâi-oân chha-put-to 5 tiám-cheng āu, tō tùi Hûn-lîm chhut-hái lī-khui Tâi-oân. Āu–lâi tiān-sī pò-tō kóng: Ha̍p-hoan-soaⁿ thêng-chhia-tiûⁿ siu-hùi-chām ê siat-pī, hō͘ 17 kip hong chhoe kah tó-khiàu-khiàu, oân-choân bô-hoat-tō͘ sú-iōng, Ku-soaⁿ-tó ê sún-hāi ē-sái-kóng m̄-bat khoàⁿ kòe hiah giâm-tiōng–ê. Choân-sè-kài bīn-tùi piàn-īⁿ ê khì-siōng hoat-seng ke̍k-toan piàn-hòa, jîn-lūi lóng ài te̍k-pia̍t chù-ì kap bīn-tùi giâm-lē ê thiau-chiàn, chin hó-ka-chài lán ū Tiong-iong-soaⁿ-me̍h leh siú-hō͘ Tâi-oân.

我有話要說