Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀
◎林朝成
“Só͘-í, hiaⁿ-tī chí-bē, in-ūi Siōng-tè ê lîn-bín, góa khǹg lín tio̍h chiong ka-kī ê seng-khu hiàn hō͘ Siōng-tè chòe oa̍h-oa̍h ê chè, sī sèng-kiat, I só͘ hoaⁿ-hí–ê; che sī lín ha̍p-gî ê kèng-pài. M̄-thang hō͘ sè-sio̍k tông-hòa, tian-tò tio̍h hō͘ Siōng-tè kā lín kái-chō, sim-chì tit-tio̍h keng-sin, hō͘ lín thang piān-pia̍t sím-mi̍h sī Siōng-tè só͘ hoaⁿ-hí, khòaⁿ-chòe hó, koh oân-choân ê chí-ì.”(Lô-má 12:1~2,現代台語譯本)
閣幾工就欲迎接新春過年,這是台灣人ê大日子。年貨大街人山人海,百貨公司e-e-kheh-kheh,攏是leh買年貨。有一項新年tio̍h做ê,就是去舊換新,逐家佇新春過年前大摒掃,hō͘厝內煥然一新。
基督徒欲佇新ê一冬主hō͘賜福,著「心志換新」,明白啥物是上帝所歡喜,看做好ê,才ē-tāng照上帝ê旨意來行。主耶穌講:「我ê食物就是實行差我彼位ê旨意,閣完成伊ê工作。」(約翰福音4章34節)主耶穌佇客西馬尼園三遍ê祈禱講:「父啊,你若肯,求你將此個杯給我提開!總是毋通照我ê意思,著照你ê旨意實現。」(路加福音22章42節)耶穌ê祈禱是欲行上帝ê旨意。基督徒ê人生目標是o̍h-iūⁿ耶穌基督。保羅勉勵每一个基督徒講:「兄弟姊妹,因為上帝ê憐憫,我勸恁著將家己ê身軀獻hō͘上帝做活活ê祭,是聖潔,伊所歡喜ê;這是恁合宜ê敬拜。毋通互世俗同化,顛倒著互上帝給恁改造,心志得著更新,hō͘恁通辨別什麼是上帝所歡喜,看做好,閣完全ê旨意。」(羅馬書12章1~2節)保羅勉勵咱,o̍h-iūⁿ耶穌基督,有幾項重點:
一、將家己ê身軀獻hō͘上帝做活活ê祭:
使徒保羅因為上帝ê憐憫,勸咱將家己ê身軀獻hō͘上帝做活活ê祭。利未記1章10~13節講:「人若欲獻綿羊抑是山羊做燒化祭,著獻一隻無瑕疵ê羊káng。伊著佇上主ê面前,佇祭壇ê北旁刣彼隻羊;亞倫ê後代做祭司ê,著將羊ê血hiù佇壇ê四周圍。彼個人著kā彼隻羊切做一塊一塊。後來,祭司將許個肉連頭kap油,排佇祭壇teh to̍h ê柴頂面。奉獻ê人著將祭物ê腹內kap腿用水洗清氣,祭司就將歸ê祭物攏下佇祭壇頂,用火燒做phang-phang ê燒化祭獻hō͘上主。」這就是講,咱愛完全無保留,將家己獻hō͘上帝,成做phang-phang ê祭。兄弟姊妹,你敢欲為主放捒你ê肉體,放捒一切無合主ê pháiⁿ kap私慾?你敢欲為主犧牲受剝皮、無惜面子、完全順服?你敢欲為主來做卑賤、人無愛做ê工作?咱看德雷莎修女,伊本來是千金小姐,有錢、有地位、有學問。德雷莎獻身hō͘主,到印度偏僻sàn-hiong ê庄跤宣教,服事散赤ê病人,為in洗孔嘴,用疼心服事in,這是o̍h耶穌基督ê款式,piàⁿ-khang家己,取奴僕ê身分來服事人。(腓立比書2章7節)
二、毋通hō͘世俗同化:
世俗是啥?世俗是干焦對重物質ê世界,追求榮華、富貴、名聲、地位,無看著屬靈ê世界。「毋通貪愛世間抑是世間ê物。若有人貪愛世間,伊就無疼父。」(約翰一書2章15節)亞伯拉罕ê侄仔羅得,kap亞伯拉罕分開以後,羅得遷徙去繁華奢侈ê所多瑪城。後來,上帝看見所多瑪罪惡貫滿,tùi天降落大火,毀滅這ê罪惡ê城市,這就是貪愛世俗ê結局。
三、心志換新:
用新年ê話來講,就是去舊換新,迎接新ê一年。欲迎接新年,厝內愛大摒掃。佇屬靈頂面,咱著清除心內一切ê汙穢lâ-sâm,hō͘咱成做一个新創造ê人(哥林多後書5章17節)。有新ê生活,凡事照主ê教示來行,做一个真實ê基督徒。
四、遵趁上帝ê旨意:
主耶穌「原本有上帝ê身分,卻無濫用及上帝平等ê地位。伊反轉摒空家己,取奴僕的身分,出世kap人仝款,用人ê形體出現。伊自願謙卑,順服到死,甚至死佇十字架頂。因為按呢,上帝提升伊到上懸ê地位,賜伊超越萬名ê名號。按呢,為著敬重耶穌ê名,天頂、地上、地下,一切ê跤頭窩攏跪拜伊, 逐个嘴攏宣認:『耶穌基督是主,來榮耀父上帝。』」(腓立比書2章6~8節)人若揣求koh遵趁上帝旨意,就欲得著榮耀ê冕旒。
基督徒若kā心靈去舊換新,就會有新ê͘活命,靈性會長進。迎接新春過年,咱對上帝ê旨意,kap對人生ê目標、境界,tio̍h有新ê眼光,咱祈禱揣求上主ê旨意心志,向頭前行新ê道路。