Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
文圖◎Sih Chì-Kéng
Lâng kóng “kah-ná teh kiâⁿ chàu-kha leh” sī leh kóng bó͘-mih-lâng chin-chia̍p kiâⁿ-tāng ê só͘-chāi. Tī goán-tau lāu-bú chiū sī hit ê siōng-chia̍p khì chàu-kha ê lâng.
Sè-hàn ê sî, ke-ke-hō͘-hō͘ lóng-sī iōng tōa-chàu teh chú saⁿ-tǹg. Chàu-thâu tōa-tiáⁿ chhá-chhài kiam chú-pn̄g, sòe-tiáⁿ té sio-chúi thang sóe-tn̄g; chàu-bóe tàu chi̍t-ki âng-mn̂g-thô͘ khōng–ê ian-tâng, tn̂g-tn̂g thàng kòe chhù-bóe-téng. Chàu-téng khǹg chi̍t àng iâm kap chi̍t a̍p Bī-Tan bī-sò͘, koh ū nn̄g koàn iû (thô͘-tāu-iû kap tāu-iû).
Chàu-kha tû-liáu tōa-chàu í-gōa, á-ū chi̍t-kháu tōa chúi-kng. Ū bí-àng, lēng-gōa koh ū chi̍t khū nn̄g-sìⁿ-mn̂g ê tek-chhài-tû, chhâ-tui thiap tī óa chàu-khang ê piah-piⁿ, chi̍t ki hóe-chhê khè tī chàu-khang ē.
Tng pē-bú choh-hóe khì ô-hn̂g, ū-sî góa mā ài thè lāu-bú chú àm-tǹg. Tāi-seng iōng kam-chià-ha̍h khí-hóe, sòa-loh pûn tek-kóng-á hóe-chhoe chiong chhâ-kho͘ hiâⁿ hō͘ to̍h, éng-éng tú khai-sí kui keng chàu-kha chiū o͘-ian-pe̍h-pōng, hun kah ba̍k-iû chha̍p-chha̍p-tih, hó-chhin-chhiūⁿ lâu ba̍k-sái kâng-chi̍t-iūⁿ. Lâng sī hoâiⁿ-chhâ giâ ji̍p chàu, goán sī koai-koai-á chú-pn̄g khah iú-hàu. Nā-sī the̍h í-chá lâi kap chit-má pí, í-chá chú-pn̄g si̍t-chāi sī chi̍t hāng sin-khó͘ ê tāi-chì.
Tōa-chàu chú-pn̄g su-iàu hó pún-léng, m̄-nā ài kò͘ tiáⁿ-téng mā ài kò͘ tiáⁿ-ē; chú ta-pn̄g ài khat ám, ū-sî mā ài thuh tiáⁿ-phí; iā beh chhá-chhài iā beh chian-hî, mā ài hē-iâm soah-iû chhì kiâm-chiáⁿ. Chú soah sit-hóe liáu āu, thàn chàu-khang iáu sio-sio, kóaⁿ-kín the̍h han-chî tâi tiàm hóe-hu pû, bián jōa-kú chiū ē phīⁿ-tio̍h siâⁿ-lâng ê phang-bī, sang koh phang ê hó chu-bī, kàu taⁿ á-sī bōe-tàng pàng-bōe-kì.
Iáu ē-kì-tit kok-hāu ê sî-chūn, pàng-o̍h tńg–lâi, lāu-bú the̍h chi̍t-lia̍p hō͘ ti-chhài ní chòe chhiⁿ-sek ê koe-nn̄g hō͘ góa chia̍h, goân-lâi he sī lāu-bú te̍k-pia̍t ūi góa chhoân ê lé-mi̍h. Sui-bóng chi̍t lia̍p sió-sió ê koe-nn̄g, bōe-tàng kap koe-nn̄g-ko pí, góa ê lōe-sim khiok chhiong-móa bû-hān ê kám-tōng. Kám-siā lāu-bú lóng ē kì-tit múi chi̍t-ê jî-lú chhut-sì ê ji̍t-chí, in-ūi ta̍k ê kiáⁿ-jî lóng sī i sin-khó͘ hoâi-thai, thàng-thiàⁿ só͘ siⁿ ê pó-pòe.
Lâng kóng: “Chhiú phō hâi-jî chiah chai pē-bú sî.” Kàu-taⁿ kìⁿ-nā kóng-tio̍h kò͘-hiong ê chàu-kha, chiū ē siūⁿ-khí lāu-bú iā ài choh-sit iā ài khoán saⁿ-tǹg, si̍t-chāi sī lô-khó͘ bān-hun. Goán ài chia̍h chheng-bí-pn̄g, i ài chia̍h han-chî-môe; tán goán chia̍h-pá, i chiah phâng óaⁿ-tī khêng chhài-bóe, chhìn-chhái pe-pe-leh chún chi̍t-tǹg. Chit-khoán lú-sèng sī beh khì tó-ūi chhōe.
