Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
*這首童謠是陳信從先生教囝仔唸–ê，伊ê故鄉是佇嘉義縣朴子市ê牛挑灣庄。
口述◎陳信從
記錄◎邱淑華
白翎鷥 擔畚箕 擔去到溪仔邊
跋一倒 抾一ê圓 買大餅 分大姨
大姨嫌無活 呼雞呼狗來咒誓 咒誓無
投姆婆 姆婆去做客 投大伯 大伯去還龜
投姊夫 姊夫去賣塗紙 投來投去投tio̍h我
害我心肝phit-phok彈 雞鵤換雞僆 雞僆面烏烏
和尚拍尼姑 尼姑走去死
老婆仔偷糶米 糶幾斗 糶兩斗 一斗跋落塗
一斗跋落水 叫姑抾也毋 叫嫂抾也毋
老婆仔抾- -起來 姑也愛嫂也愛 開大門 剝芥菜
芥菜花 榮ló-ló 俺哥娶俺嫂 俺嫂手疼袂挨礱
俺哥跤疼袂入房 房空空 好種蔥 蔥無味
好種柿 柿無紅 姨仔放狗咬丈人 丈人喝毋通
褲底挵破三孔 欲補是無閒 欲㧒捔是毋甘
Pe̍h-lēng-si, taⁿ-pùn-ki, taⁿ khì-kàu khe-á-piⁿ,
Poa̍h chi̍t tó, khioh chi̍t ê îⁿ, bé tōa-piáⁿ, pun tōa-î,
Tōa-î hiâm bô oa̍h, kho͘-ke kho͘-káu lâi chiù-chōa, chiù-chōa bô,
Tâu ḿ-pô, ḿ-pô khì chò-kheh, tâu tōa-peh, tōa-peh khì hêng-ku,
Tâu ché-hu, ché-hu khì bē thô͘-chóa, tâu-lâi tâu-khì tâu tio̍h góa,
Hāi-góa sim-koaⁿ phit-phok tōaⁿ, ke-kak ōaⁿ ke-nōa, ke-nōa bīn o͘-o͘,
Hôe-siūⁿ phah nî-ko͘, nî-ko͘ cháu-khì-sí,
Lāu-pô-á thau thiò-bí, thiò kúi táu? thiò nn̄g táu, chi̍t táu poa̍h lo̍h thô͘,
Chi̍t táu poa̍h-lo̍h chúi, kiò ko͘ khioh iā m̄, kiò só khioh iā m̄,
Lāu-pô-á khioh–khí-lâi, ko͘ iā ài, só iā-ài, khui tōa-mn̂g, pak kòa-chhài,
Kòa-chhài-hoe, êng-ló-ló, án-ko chhōa án-só, án-só chhiú thiàⁿ bē e-lâng,
Án-ko kha thiàⁿ bē ji̍p-pâng, pâng-khang-khang, hó chèng chhang, chhang bô bī,
Hó chèng khī, khī bô âng, î-á pàng káu kā tiūⁿ-lâng, tiūⁿ-lâng hoah m̄-thang,
Khò͘-té lòng phòa saⁿ khang, beh pó͘ sī bô êng, beh hiat-ka̍k sī m̄-kam.
