Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Soaⁿ-pêⁿ-téng sī tī Lâm-tâu Tek-san ê chi̍t ê sió chng-thâu, ū chi̍t tōaⁿ chiūⁿ chng-lāi ê lō͘ chin kiā koh pháiⁿ kiâⁿ, chng-á lāi ê lâng chhut-ji̍p m̄ sī ēng kiâⁿ ê, tō sī khiâ thih-bé, nā-sī khiâ thih-bé teh peh-kiā ê sî, ē kek kah tōa-lia̍p-kōaⁿ sòe-lia̍p-kōaⁿ, kōaⁿ-lâu-sàm-tih, kiōng beh thó͘-tn̂g-thâu, nā lo̍h-kiā ê sî, in-ūi lō͘ chin kiā, kan-ta khò thih-bé ê tòng-á tek-khak tòng-bē-tiâu sī chin gûi-hiám, mā ū khó-lêng lòng lo̍h-khì khàm-kha, siak kah tōa-khang-sè-lih, chá-chêng ê chng-á-lâng tō siūⁿ chi̍t ê hó pō͘-sò͘, nā beh lo̍h-kiā ê sî, thih-bé āu-piah ài pa̍k chi̍t-chat kin-chio-kho͘ lâi thoa-thô͘, ēng kin-chio-kho͘ chòe tòng-á, án-ni tō bē chhū-lián tòng-bē-tiâu, án-ni tō ē-tàng pêng-an kàu soaⁿ-kha, che sī kó͘-chá-lâng ê tì-hūi, chi̍t tāi thoân kòe chi̍t tāi.
Chhun-thiⁿ kàu ê sî, tī iá-gōa chúi-piⁿ ê chháu-po͘ ū chhân-eⁿ phū-phū-poe, chit-chūn khì lia̍h chhân-eⁿ sī chng-kha gín-á ê chhù-bī, in ē thì keng-chio-phôe ê si chòe soh-á, kho͘ chi̍t ê liù-soh, ûn-ûn-á liam, tán chhân-eⁿ lo̍h-ji̍p khoan-thò ê sî, liù-soh-á hiông-hiông khiú–khí-lâi, chhân-eⁿ chiū tio̍h-tiàu ah, chi̍t-khùn-á kú tō lia̍h chin chōe chhân-eⁿ, ta̍k-ke ēng lia̍h-tio̍h chhân-eⁿ ê chōe-chió lâi pí su-iâⁿ.
Àm-hun ê sî, ìⁿ-á ē tī kiô-kha poe-lâi poe-khì piàⁿ-sì beh thó-chia̍h, chit-chūn chng-lāi ê gín-á-hiaⁿ ē khiā tī kiô-téng, ēng sòaⁿ pa̍k chi̍t-phíⁿ-á ōe-seng-chóa, lūi-lo̍h kiô-kha hàiⁿ-lâi hàiⁿ-khì, chit-sî ìⁿ-á khòaⁿ–kìⁿ, ē kā ōe-seng-chóa tòng-chòe ia̍h-á, kín poe khì jiok, chit khoán ēng ōe-seng-chóa lāng ìⁿ-á ê chhit-thô mā put-chí-á chhù-bī.
Chi̍t-kang ê e-po͘-sî, thiⁿ lo̍h hiong-kông-hō͘, tì-sú Chheng-chúi-khe ê chúi chin chhòaⁿ-lâu, gín-á-hiaⁿ chá-khí chē tek-pâi-á kòe khe khì ha̍k-hāu, pàng-o̍h ê sî i kiâⁿ kàu khe-piⁿ beh tńg-khì, ná-ē chai-iáⁿ tek-pâi-á soah thêng tī tùi-hōaⁿ, chit-sî tō ài tán-thāi koh ū lâng theⁿ tek-pâi-á kòe–lâi, chiah ē-tàng chē tek-pâi-á tńg–khì, in-ūi tán chin-kú, tek-pâi-á bô kòe–lâi, gín-á-hiaⁿ tō siû-chúi kòe khe, hit-khoán ê ióng-khì si̍t-chāi bô kán-tan, m̄-kù i ê lāu-bú nā chai, m̄ chai kám tòng-ê-tiâu bô ?
