◎楊威廉
Tiāⁿ-tiāⁿ聽tio̍h有人teh講「壁頂ê咖啡」，這到底是teh講啥?今仔日好運佇線頂看tio̍h這篇文章，袂使干焦家己知影，提出來kap逐家分享，這篇文章是按呢講：
有一工，我kah真濟冬無見面ê朋友，佇洛杉磯一間誠有名ê咖啡店啉咖啡兼破豆，一下仔閣入來一个人客，拄坐佇我邊仔彼塊桌仔。伊ia̍t-chhiú（擛手）叫服務生來，講「兩杯咖啡，一杯桌頂，一杯壁頂」，我看伊點咖啡ê表情有淡薄仔奇怪，服務生照伊ê意思，干焦送一杯咖啡來，伊啉了我想伊是付兩杯ê錢，當伊走矣，服務生隨佇壁頂貼一張「咖啡一杯」ê紙條，隨時閣有兩个人客入來，點三杯咖啡，兩杯囥佇桌頂，一杯貼佇壁頂，伊啉兩杯付三杯錢，服務生貼一張「咖啡一杯」ê紙條佇壁頂。
我想講這是毋是遮ê規矩，敢會咱這款外國倯，無「入風隨俗」這哪會使，毋過「不知者無罪」，這也無咱ê代誌，咖啡啉了阮就離開。
幾工了後，我閒閒無代誌，閣有機會來遮啉咖啡，阮當咧享受真好啉ê咖啡，有一个人來店裡，伊ê穿插和這間店ê級數無四配，看會出是一个散食人，伊坐落來tōa-pān tōa-pān（大範大範），用指頭仔指壁頂，喙講「一杯咖啡」，服務生mā真親切，隨送一杯咖啡來，彼个人客咖啡啉了就無付錢離開，尾手閣看tio̍h服務生將壁頂拆一張「咖啡一杯」ê紙條，擲落去糞埽桶內底，這時，hō͘我看tio̍h遮个人對散食人ê尊存，感動kah目屎強強欲流出來。
咖啡並毋是社會上ê基本需求，亦毋是生活ê必需品，我所欲講ê是當咱teh享受濟濟美好物件ê時，是毋是有想tio̍h有一款人也仝款愛這个物件，但是無能力得tio̍h？閣再講彼个服務生，當伊替散食人服務ê時mā是面帶笑容。閣講彼个散食人入來咖啡店，mā毋免驚歹勢來討一杯咖啡，因為佇壁頂就有，加付彼杯咖啡，等人來啉ê人，雖然先付錢，mā毋知啥人會享受，這就是充滿愛閣分享ê世界。有人提早付錢，買咖啡hō͘付袂起ê人享受溫暖，已經慢慢仔傳遍世界。
