Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Au Î-lîn
Kok-sió ê sî-chūn, gún chí-mōe-á nā-sī bô hoaⁿ-hí/bōe-sóng a-má koán, tō tī i ê bīn-thâu-chêng iōng “Kok-gí” kóng sè-siaⁿ-ōe. A-má i thiaⁿ-bô “Kok-gí”, m̄-koh gún a-má i mā m̄-sī chia̍h-chhài–ê, i kā gún kóng: Lín m̄-thang lia̍h-chò lín kóng “Kok-gí”, góa tō m̄-chai-iáⁿ lín teh mē–góa.
Gún pē-bú bô-êng chò khang-khòe thàn-chîⁿ chhī-ke, piàⁿ mê piàⁿ ji̍t hán-ti̍t teh hioh-khùn. Gún hiaⁿ-tī chí-mōe-á lóng sī a-má tàu chhōa tōa-hàn–ê. A-má m̄-bat jī, i kóng i sī chheⁿ-mê-gû, ài gún khah kut-la̍t tha̍k-chheh leh. Hoān-sè a-má án-chóaⁿ mā siūⁿ-bē-tio̍h i ê sun-á khì tha̍k-chheh ah, bat-jī ah, soah iōng i bē-hiáu ê ōe lâi kā mē. Bo̍k-koài a-má tiāⁿ-tiāⁿ liām chit kù ōe: “Sēng ti giâ chàu, sēng kiáⁿ put-hàu.”
Nā siūⁿ–tio̍h chit chân tāi-chì, góa tō chin kiàn-siàu, mā chin hiō-hóe. A-má i kòe-óng kúi lo̍h nî ah, bô ki-hōe tng-bīn kā hó-lé-á hōe-sit-lé.
A-má, góa kā lí ê kan-á-sun kà kah chiok gâu kóng Tâi-gí–ê, góa mā ū kā i kà bē-sái tī lâng ê bīn-thâu-chêng kóng sè-siaⁿ ōe. A-má, án-ne kám-ē-sái tòng-chò sī kā lí hōe-sit-lé?
