◎陳金順
設使請逐家揀選一款動物，成做Formosa ê代表，頭名大概是台灣烏熊。台灣烏熊ê意象，佇每一角勢攏有機緣參咱相搪頭。坐火車，行出玉里車頭大廳，兩身烏熊尪仔出現佇咱面頭前。猶有足濟咱想袂到ê所在，逐款烏熊ê古錐物仔唌眾人目光。
論真講，黃美秀是親目見過台灣烏熊，嘛參上濟隻烏熊chih接過ê人。無論是對紀錄片《黑熊來了》，抑是筆記冊《尋熊記》認捌黃美秀，咱攏愛kā伊比大頭拇兼拍噗仔。
《尋熊記》是美秀對1997年8月到2000年12月，踮佇深山林內堅心走揣kah守護烏熊ê紀錄。彼時，伊猶袂提著博士學位。彼幾冬跤踏實地ê研究kah紀錄，成做博士論文上蓋滋養ê肥底。
我讀這本冊，勻聊仔讀，無幾工就讀煞。美秀寫這本冊ê路程，是用性命摻濫血汗沃出來ê成果。
這毋是學術論文，是真拄真ê生活紀錄。美秀ê文筆上腳，有文學性ê實踐哲理。一字一字，一章一章讀紲落，咱定著讀出美秀毋但有勇氣kah體力，伊嘛kah咱相siāng，稀微和失志不時纏綴身軀邊。
暫且莫論tng烏熊，kā伊麻醉做號ê鋩鋩角角。干焦喊你步輦peh過坎坷ê山路，常在勼踮澹濕ê睏袋仔裡，蹛無四序、食無利便，搪著風颱凡勢phēng搪著烏熊閣較捷。毋是一半擺仔，是長期te̍k按呢，大概無幾个人tòng-ē-tiâu。
佳哉，美秀ê同伴有幾若个卓溪鄉ê Bunun。In m̄-nā kā美秀tàu-saⁿ-kāng pháiⁿ pháng ê sit-thâu（穡頭），參in tàu-tīn， thèng好吸收濟濟生活智慧。檢采按呢，伊有一个Bunun名，號做Ali。
久長佇大分山裡，暝日追揣台灣烏熊，美秀鍛鍊意志，閣較鍛鍊對待動物ê慈悲心。世間人éng-éng徛懸山看馬相踢，別人ê囡仔死袂了。美秀定定徛懸山望熊惜情，家己ê腹腸hùn（楦）hō͘闊。
眾人喊美秀「烏熊阿母」，毋是喊趣味ê，閣較毋是喙唇皮相款待。現此時，研究台灣烏熊ê主客觀條件kah環境，phēng二十外冬前加好誠濟。
佇美秀ê心肝內，認捌烏熊ê性癖，尊重烏熊ê生存權，減少對烏熊ê損蕩，大自然ê生機自然永久循環。
伊按呢想，嘛按呢做。
