◎鄭雅怡
Chêng 2024年初以來，中國國民黨和台灣民眾黨疑似 kap 中共 tàu-khang，聯手 tòa 立法院 lām-sám 擴權，烏白 thâi 抑是凍結預算，siàu 想 beh 毀滅台灣，sòa 引起全民公憤，tī ta̍k 所在開展大罷免運動。連台灣 ê 藝文界、文學界，客家族群、客語作家都聲援罷免連署，志願來承擔罷免領銜人 ê 重擔，甚至連一寡外省族群、深藍社區都覺醒 ah，呼籲 ài 罷免「共匪」thang 救台灣，hō͘ 我 chiâⁿ 感動！
總–是，以早本土化和母語運動先驅ê台語界chit-pang soah 恬-chuh-chuh。一位 tī 教育部台語認證有主導權 ê 大老 tòa 台語群組吩咐伊 ê 學生 mài 加入罷免連署！我知影了真艱苦心，kā 一寡真有台灣意識、母語意識、「進步」ê 少年人提議：「台語界 nái 無愛用台語文作家、教師 ê 名義發起罷免連署？老身–ê 網路、電腦 khah ham-bān，勞煩 lín 做一個連署表單，kā 鋪 chiūⁿ 網路好–bô？我 tek-khak 會簽。台語界應當分擔台灣 ê 苦難，kap 全體台灣人民 khiā kâng-pêng。」 In 應講 beh koh 問看 māi， 無疑誤 sòa–lo̍h-lâi 就無消息。尾手我 kā 一個朋友講，「了然！規氣改族群身分，去做客人好 ah， 因為 tòa 李喬和 beh「消滅共匪」 ê 老芋仔先生面頭前，我頭攏 giâ-bē–khí-lâi。」現此時台語和其他弱勢 ê 本土語言 ē-tàng 舉辦能力認證考試，進入教育體制教學，得 tio̍h 種種 ê 資源，是 png-tio̍h 台灣民主化、本土化 ê 福氣。這是 jōa chōe 前輩拍拚、犧牲 chiah有 ê 成果。Taⁿ 台灣有滅亡 ê 危險，台語界 chiah-ê「大粒」兼「大尾」 ê 文學家、教授、頭人敢真正 beh 做 lín tìⁿ 恬恬，kā lín 在來上 gâu hoah ê「台灣，咱 ê 阿母」放 sak！
我一向都 kap 台語界保持社交距離。我 m̄ 敢自稱是「台文作家」，當然也 bē-tàng 代表台語界發表任何聲明。總–是，做一個客語、台語 ê 工作者，我 beh 表明我 ê 個人政治：我支持大罷免行動。懇求上帝引 chhōa，終歸尾 hō͘ 台灣出頭天。 （作者為母語工作者）
