Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Tân Chheng-chùn
Lâng m̄-sī kan-ta óa-khò piáⁿ lâi oa̍h, lâng sī óa-khò Iâ-hô-hoa chhùi só͘ kóng it-chhè ê ōe lâi oa̍h. (Sin-bēng-kì 8:3)
Goán ê ji̍t-si̍t, kin-á-ji̍t hō͘ goán. (Má-thài 6:11)
Lâng nā tit-tio̍h choân sè-kài, lâi sòng-sit i ê sìⁿ-miā, ū sím-mi̍h lī-ek? (Má-khó 8:36)
Tē-i̍t chia̍h, tē-jī chhēng, tē-saⁿ khòaⁿ hong-kéng. Bîn í si̍t ûi thian, chia̍h-pn̄g hông-tè tōa. Chia̍h, chhēng, chū, hêng, lóng sī teh kiông-tiāu chia̍h ê tiong-iàu-sèng.
Chia̍h-pá–boe̍h!? Che sī khah-chá ê Tâi-oân lâng sio-tú–tio̍h, bô-lūn se̍k-sāi á-sī bô se̍k-sāi, khui-chhùi chio-ho͘ ê siông-iōng-sû. Tâi-oân ê iā-chhī-á, chi̍t-pòaⁿ í-siōng ê tàⁿ-á lóng-sī teh bē chia̍h–ê. Lán nā khì tōa chhī-tiûⁿ shopping tńg–lâi, bé ê mi̍h-kiāⁿ tāi-pō͘-hūn mā sī iú-koan chia̍h–ê. Tī Bí-kok, chia̍h-mi̍h m̄-bián khioh bé-bē sòe, in-ūi he m̄-sī êng-lī-phín.
Lāu-lâng tùi chia̍h ê phín-chit ē in-ūi nî-kí cheng-ka tō lú chù-tiōng. Bāng-lō͘ mûi-thé ū chē-chē koan-hē chia̍h ê sin siau-si̍t. Thn̂g-jiō-pēⁿ ê lâng m̄-thang chia̍h thn̂g, sim-chōng-pēⁿ ê lâng bē-sài chia̍h iû, io-chí-pēⁿ ê lâng tō kìm nn̄g-pe̍h-chit. Chîm–á kap âng-khī bē-sài tâng-chê chia̍h. Chin chē liâu-ióng-īⁿ sīm-chì chhiàⁿ êng-ióng-su tiâu-phòe saⁿ-tǹg ê si̍t-phó͘ hō͘ lāu-lâng chia̍h. Koan-hē chia̍h ê kho-ha̍k lūn-soat, chē kàu tú thiⁿ, mā m̄-chai beh tòe tó chi̍t-ê chiah tio̍h.
Iâ-so͘ tī khòng-iá kìm-chia̍h 40 kang, pak-tó͘ iau, Mô͘-kúi chiū lâi kā chhì-thàm, kóng: Lí nā-sī Siōng-tè ê kiáⁿ, chiū kā chia ê chio̍h pìⁿ chòe piáⁿ. Iâ-so͘ chiū ìn kóng: “ Lâng ê oa̍h, m̄ nā óa-khò piáⁿ, chiū-sī óa-khò tùi Siōng-tè ê chhùi só͘ chhut lóng-chóng ê ōe.” Piáⁿ, tī goân-bûn chiū-sī mī-pau, iā chiū-sī chia̍h-mi̍h siōng ki-pún ê hāng-bo̍k. Í-sek-lia̍t lâng tī khòng-iá liû-lōng 40 tang, bô thang chia̍h; Siōng-tè iōng siōng ki-pún ê chia̍h-mi̍h má-ná, hō͘ in chia̍h. Kiat-kó in iáu koh bâi-oàn Siōng-tè bô hō͘ in koh khah sóng-khoài ê seng-oa̍h. Sian-ti chiū ēng thâu-chêng tē-i̍t kù só͘ kóng–ê thê-chhéⁿ in. Kāng-khoán chit kù ōe, kòe 1300 nî, Ia-so͘ iáu-koh ē-tàng ēng che lâi that mô͘-kúi ê chhùi. Koh kòe 2000 nî ê chit-chūn, chit kù “Lâng ê oa̍h m̄-nā óa-khò piáⁿ” iû-goân sī lán eng-kai kéng-séng ê kim-kù.
Sui-jiân lán m̄-thang kòe-thâu lâi hoân-ló chia̍h, tān-sī iā tio̍h khiam-pi lâi tùi Siōng-tè khún-kiû ki-pún ê ji̍t-si̍t.
Ē kì-tit tī góa ê lāu-pē te-beh kòe-sin ê sî, góa ê náu-hái chhut-hiān téng-thâu ê tē-saⁿ kù: “Lâng nā tit-tio̍h choân sè-kài, lâi sòng-sit i ê sìⁿ-miā, ū sím-mi̍h lī-ek?” Chiū pek-chhiat kā Chú kî-tó kóng: “Lí m̄-sī kóng lâng ê sìⁿ-miā pí choân sè-kài koh-khah pó-kùi, taⁿ góa ê lāu-pē ê sìⁿ-miā te-beh bô–khì, kì-jiân lí kóng sìⁿ-miā hiah tiōng-iàu, góa goān-ì ēng góa só͘-ū ê kim-chîⁿ, châi-sán, lâi ōaⁿ i ê sìⁿ-miā.”
Kiat-kó só͘ tit-tio̍h ê hôe-tap: bô jōa-kú, lāu-pē chiū kòe-sin. Sū-āu góa siông-sè châ-khó chit-tōaⁿ Sèng-keng, chiah chai chêng chi̍t chat sī an-ne: “Kìⁿ-nā ài kiù i ê sìⁿ-miā ê beh sit-lo̍h i; kìⁿ-nā ūi-tio̍h góa kap hok-im lâi sit-lo̍h i ê sìⁿ-miā ê beh kiù i.”
Goân-lâi só͘ chí ê sìⁿ-miā ū sio̍k jio̍k-thé kap sio̍k éng-seng nn̄g-hāng ê sìⁿ-miā. Sui-jiân lāu-pē jio̍k-thé ê sìⁿ-miā bô–ah, tān-sī i ê éng-oán ê sìⁿ-miā, beh tit koh-oa̍h.
