Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎陳柏壽
媽祖生彼日，附近庄頭ê人攏會óa來，廟口tīⁿ-tīⁿ攏是人，阿公手牽孫仔，阿媽ka-chiah偝紅嬰，少年ê頭殼縛紅巾準備欲扛轎。路邊ê徛家，真濟人攏pān-toh hō͘人食，無論庄內人庄外人，mā有阿本仔kah阿陸仔，mā有黃頭毛ê啄鼻仔，攏入來坐桌，食免錢，鬧熱滾滾。對遮咱看著咱台灣人ê純真、純情kah好款待人客。有時這爿ê媽祖婆會去thàm隔壁ê媽祖婆，有時mā會相爭siáⁿ-lâng分hiuⁿ正身，真正是分袂清。
阮兜離開北港大甲真遠，真少有機會去參拜。阮tòa佇雲林古坑，阮阿母一世人mā毋捌講伊是佛教徒抑是啥物，但是日子若到，伊攏會排四果牲禮佇門口，mā會叫我giâ二支hiuⁿ做伙拜拜。阮有時mā去阮溪邊厝庄ê廟仔拜，我去廟仔鼻著hiuⁿ ê味會感覺溫暖kah親切，這可能是我細漢to̍h訓練出來ê直感。
箴言第8章kap詩篇第8篇是咱kap giâⁿ媽祖ê鄉親hō͘-siong對話ê基礎。咱攏pêⁿ-pêⁿ是人，箴言講上帝賞賜咱攏有仝款人ê「智慧」，咱著用pêⁿ-pêⁿ是「人」ê定點來hō͘-siong款待。箴言講「愚戇ê人啊，恁著曉悟……上帝佇造化ê起頭，佇太初創造萬物代先就有『智慧』，對古早，對太初，對猶未有世界以前，我就設立……對上帝猶無創造大地、田野kah世上ê土質以前，我已經佇hia……。上帝為滄海定伊ê界限，hō͘水袂盤過伊ê命令。上帝設立大地ê根基以前，我已經佇hia。」「智慧」是上帝創造世界ê基石，是世間逐族ê人hō͘-siong交流ê基礎。「我看著祢親手創造ê天，kah祢排設ê月娘kah星辰，世間人是啥物，你數念伊，……祢互伊比天使厘仔卡輸，閣賞賜伊榮光尊貴做冕旒（bián-liû），祢派伊管理祢ê手所造ê，下萬物佇伊ê跤下。上帝互全世界在佇伊ê管理，成做一个人類調和kah平安ê所在。
咱台灣ê民間信仰，有史以來攏真平和kah單純，基督教傳來台灣mā真少引起社會ê對立。宣教師巴克禮去hông潑屎，伊只是笑笑仔講；「真無采，chiah-ē pùn（糞）若來a̍k田毋知beh偌好！」來台灣ê宣教師做善事，做醫生，辦教育，kah台灣ê社會相當和諧。保羅頭一擺將基督教傳入歐洲ê時，mā kah當地ê地方信仰無發生啥物衝突。歐洲bat發生嚴重ê宗教衝突，是基督徒家己刣基督徒，天主教徒kah新教徒相刣30年久，這項代誌kah地方ê傳統宗教無啥關係。
世間逐所在留存ê在地信仰，我想是上帝ê好意kah liap-lí（攝理）。160年來基督教會佇台灣慢慢仔釘根，主要就是咱佇台灣傳教有照上帝教示咱ê方法kah道理。
