Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Tè Khái-sū
Png Chùn-gān (方俊彥) sian-siⁿ tī Kong-pò 3811 kî siá hit-phiⁿ “Kho-ha̍k kap Bîn-chú”, kā kho-ha̍k hong-hoat ê “pok–tó” kài-liām (falsifiability, Ji̍t-gí 反證可能性, hoán-chèng khó-lêng-sèng) kái-soeh liáu chin chheng-chhó. Siōng-bóe i koh kā kho-ha̍k hām bîn-chú saⁿ-liân.
｜延伸閱讀：【母語世界】Kho-ha̍k kap Bîn-chú
Bô-m̄-tio̍h! Bîn-chú kap kho-ha̍k lóng sī tùi-ōe ê ki-chè, bô chi̍t-ê thâu-lâng thang ū choa̍t-tùi ê koân-ui. Lán tio̍h tùi keng-giām, lí-lō͘, saⁿ-kap thó-lūn lâi khòaⁿ sím-mi̍h hoat-tō͘ siōng ū-thong, siōng ha̍p-lí. Bo̍k-phiau m̄-sī tì-ì oân-bí (he lán-lâng bô khó-lêng!); sī kan-na chit-tia̍p siōng-hó, siōng ū-thong–ê kái-koat hong-sek niâ. Án-ne thang hō͘ lán tī chit-tia̍p chhì-khòaⁿ-māi ū-thong bô; nā bô-thong, chiah-koh lâi kái-chìn. M̄-koh nā tio̍h chèⁿ oân-bí–ê, soah tian-tó ōe pìⁿ-chò “hun-sek kàu piàn-sūi” (paralysis by analysis) bē-tín-bē-tāng lah!
Só͘-í bîn-chú chè-tō͘ ē tēng-kî soán-kí, su-iàu ê sî pā-bián, hām kho-ha̍k ê “hoán-chèng”, “hoán-pok” chin sio-siâng. Kóng kàu chia, bô-hoat-tō͘ bô siūⁿ-tio̍h 1919 nî Pak-kiaⁿ Ngó͘ Sù Ūn-tōng ê kháu-hō:
“D sian-siⁿ kap S sian-siⁿ” (德先生佮賽先生) to̍h-sī Science hām Democracy, Kho-ha̍k kap Bîn-chú lah. Khó-sioh pah-gōa tang āu, Tiong-kok “tē gō͘ ê hiān-tāi-hòa” (Wèi Jīngshēng 魏京生, 1978 nî) iáu-bōe oân-sêng (khòaⁿ Sòng Choân-sēng, The Compassionate God, tē 11 chiuⁿ).
Kám-siā Sèng Sîn khé-sī Tâi-oân-lâng thang ēng bîn-chú ê hong-sek chò-hóe koat-tēng lán kong-ke ê tāi-chì. Goān Chú tiāⁿ-tiāⁿ kā lán thê-chhíⁿ “m̄-bián kiaⁿ”, kè-siok ín-chhōa pó-pì Tâi-oân ê chū-iû pêng-an.
