Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chok-chiá◎Lloyd Edwin (Ted) Siverns
Hoan-e̍k◎Ông Bí-su
Tē 1 sè-kí ê Í-sek-lia̍t, pîn-hù ê kū-lî chin tōa. Lông-bîn sit-khì thó͘-tē, hî-bîn bô thâu-lō͘, khí-gī sù-siông ū. Ū lâng chiâⁿ-chòe khit-chia̍h, mā ū lâng chiâⁿ-chòe thó͘-húi, koh khah ū lâng in-ūi iau-ki kap phòa-pīⁿ lâi kòe-sin. Lô-má kap i ê cháu-káu hióng-siū bí-hó ê seng-oa̍h.
Hó-gia̍h-lâng ta̍k-kang pān-toh lâi hióng-siū, tī siā-hōe, i sī tōa jîn-bu̍t; tī phí-jū, i bô miâ. Chóng–sī, phí-jū tiong-kan ū chi̍t ê lâng hō chòe Lia̍p-sat-lō͘, ì-sù sī “Siōng-tè sī góa ê pang-chān.”
Lia̍p-sat-lō͘ bô tit-tio̍h hó-gia̍h-lâng toh-téng lak–lo̍h-lâi ê sap-á thang chí-ki; hō͘ i an-ùi–ê sī chi̍t chiah káu-á lâi chīⁿ i ê chhng.
Hit ê hó-gia̍h-lâng sí–khì ah, lán thang siūⁿ, ū chē-chē ū thâu ū bīn ê lâng lâi chham-ka chòng-sek. Sàn-chhiah ê Lia̍p-sat-lō͘ sí-khì ah, i ê si-thé khó-lêng hō͘ lâng chhìn-chhái tàn lo̍h-khì soaⁿ-kok, chhìn-chhái tâi-tâi–leh.
Lia̍p-sat-lō͘ kàu tī A-pek-lia̍p-hán hia, hó-gia̍h-lâng tī Im-hú siū chin tōa ê thòng-khó͘. Tī in ê tiong-kan ū tōa chhim-ian keh-khui. Clarence Jordan (chèng thô͘-tāu ê Sin-iok ha̍k-chiá) mn̄g kóng:
“Chit ê tōa chhim-ian sī siáⁿ lâng ó͘–ê? Sī siáng khí-chō–ê? Hit ê hó-gia̍h-lâng chai-iáⁿ sī siáng chò–ê. In-ūi che sī i ka-tī ó͘–ê! Ūi chóaⁿ-iūⁿ i beh khí-chō chhim-ian? In-ūi i beh keh-lī ū chhng ê lâng, i bô ài seng-khu siⁿ chhng ê lâng poaⁿ ji̍p-khì i ê siā-khu á-sī chiâⁿ-chòe i ê chhù-piⁿ, chiah bián-tit i ê chhù-the̍h ê kè-siàu piàn bái, i bô ài i ê châi-sán kiu-chúi. Hit ê hó-gia̍h-lâng siūⁿ kóng, tio̍h ó͘ chi̍t tiâu tōa-tōa ê kau-á, hō͘ pat-lâng bōe-tàng ji̍p-lâi. Hit ê hó-gia̍h-lâng hām-lo̍h tī ka-tī só͘ ó͘ ê hām-chíⁿ, i kā ka-tī iōng ûi-chhiûⁿ-á koaiⁿ–khí–lâi, kā ka-tī koaiⁿ tī lāi-té, mā kā ka-tī koaiⁿ tī gōa-kháu.
“Bô iàu-kín.” Hit ê hó-gia̍h-lâng kóng: “Góa iáu ū pī-àn. Phài lâng khì góa ê hiaⁿ-tī hia, i thang khì kā in kéng-kò, chiah bián-tit in mā lâi kàu chit-ê khó͘-thàng ê só͘-chāi.” A-pek-lia̍p-hán kóng: “Bô khó-lêng. Lí ê hiaⁿ-tī ū Mô͘-se kap sian-ti, in eng-kai khì thiaⁿ in ê ōe.” “Nā án-ni, A-pek-lia̍p-hán, phài Lia̍p-sat-lō͘ khì. Nā ū lâng tùi sí-lâng tiong koh-oa̍h khì chhē in, in chiū ōe hoán-hóe.” A-pek-lia̍p-hán kā i kóng, “Bōe, in mā bōe siong-sìn.”
In-ūi kap Siōng-tè saⁿ-lî, hit ê hó-gia̍h-lâng ū khó͘-thàng, i kiû-kiò A-pek-lia̍p-hán: “Lîn-bín–góa! Kiò Lia̍p-sat-lō͘ lâi! Kiò Lia̍p-sat-lō͘ lâi! Kiò Lia̍p-sat-lō͘ lâi hōng-thāi–góa!” Hó-gia̍h-lâng siūⁿ kóng i tī sí-āu mā ū te̍k-koân chhin-chhiūⁿ tī chāi-siⁿ ê sî. Sū-si̍t sī, i chāi-siⁿ ê sî ó͘ chhim-ian khí-chō ûi-chhiûⁿ, kā ka-tī kap chhin-chhiūⁿ Lia̍p-sat-lō͘ chit-khoán ê lâng keh-khui, tī i sí–khì liáu-āu, chit ê chhim-ian iû-goân kā in keh-khui.
Robert Frost ū siá chi̍t siú si Siu-lí ûi-chhiûⁿ (Mending Walls):
“Tī góa khí-chō ûi-chhiûⁿ ê sî,
Góa ē mn̄g-kóng,
Góa beh kā siáⁿ-mi̍h mi̍h-kiāⁿ koaiⁿ tī lāi-té, beh kā siáⁿ-mi̍h mi̍h-kiāⁿ keh-lī tī gōa-kháu?
Góa siūⁿ beh tit-sit siáⁿ-lâng?
Ū sî-chūn kin-pún tō boăi ū ûi-chhiûⁿ,
Tō ka thiah-tiāu.”
A-men. Thiah-tû it-chhè saⁿ-keh ê chhim-ian kap ûi-chhiûⁿ. Iâ-so͘ choa̍t-tùi hoán-tùi ū lâng kā Siōng-tè ê chú-bîn tòng-chòe pùn-sò, tòng-chòe siū khì-sak ê lâng.
Ki-tok ê sìn-gióng kóng: Sìⁿ-miā, bô-lūn sī chāi-siⁿ, sí-bông á-sī sí-āu, sìⁿ-miâ ê tiong-sim lóng-sī Siōng-tè. Siōng-tè ho͘-tiàu lán chiap-siū Lia̍p-sat-lō͘, Lia̍p-sat-lō͘ tio̍h tī lán tiong-kan: “Siōng-tè pang-chān.” Siōng-tè pang-chān lán, Siōng-tè mā thong-kòe lán khì pang-chān.
