Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎陳金順
Okinawa，咱kā號台語四角字名
就親像伊嘛號做琉球、沖繩相siāng
在人佮意，歡喜自在。
Okinawa，敢若離咱近近仔，煞毋捌踏跤到
伊徛踮闊莾莾ê太平洋裡，暝日參海湧相對看
佇日本佮Formosa中央，含括六百外粒島嶼。
頂日仔，知影太保彼間南院
欲展覽「萬國津梁――東亞海上ê琉球」
Iang-thok妙仔載咱來去搵一下仔豆油。
琉球王國，的確有留寡物件落來
通予世間人知捌歷史交落ê風華
「琉球人形」幼秀ê iūⁿ-siùⁿ唌咱目光。
輕飄ê琉球衫幔咧身軀
紺花點、水藍色緻相替換
袂輸Okinawa飄撇ê兄哥。
Okinawa跨世紀ê風獅爺
目睭展大蕊喙仔開開開
敢是咧暗示啞口硩死囝ê哀悲？
Nńg-lio̍h（軟略）ê毛筆字書寫歷史文書
毋是文人雅士食飯後ê議量
證明王國kha-chiah後罩牢帝國ê陰影。
準講無爆發kiau排灣族紛爭ê牡丹社事件
薩摩藩kín-choa̍h-bān嘛會想空想縫
攢便便隨時kā Okinawa拆食落腹。
世間ê強權在來雄死夾去食
頭前阿本仔先占先贏
後壁阿美仔大軍chhāi踮遐。
頂日仔，小說《暴風雨：琉球‧龍之女》網路現身
池上永一虛構百外冬前王國失落前夜ê風湧滾絞
無疑誤，無論新舊冊攏總失落佇茫茫冊海裡。
Hawaii參Okinawa仝運命
王國相siāng予人搦踮手蹄仔裡
電影《夏威夷公主》搬演Kaiulani最後ê奮鬥。
想袂到，博客來咧賣《夏威夷公主》DVD
49箍銀俗kah毋是款，殘殘兩塊總買
一塊送予《夏娃伊意紀遊》作者民祥兄。
《琉球王國的前世今生》冊名躼躼長取後半koe̍h
台灣少年家朱宥任，跤踏實地寫出這本冊
俗賣做伙交關，滋養咱缺欠ê營養分。
政治軍事暗漠漠烏魯木齊
藝術文學加減補紩咱ê憂悶稀微。
Okinawa啊！鷗綺娜娃。
