Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎鄭加典
咱人一生的境遇
有時好天有時霧
圖謀世事無專務
改變花樣毋認輸
怨嘆無貴人相抵
終其尾馬馬虎虎
回顧過去大小事
若親像黑雲罩霧
離開上主有久久
著反悔換新去舊
接受主交託任務
做主重用的器具
無論拄著啥境遇
著體會上主豐富
有風有湧無順事
上主祝福無較輸
艱難試煉倚靠主
欠缺變成做富有
Lán lâng it-seng ê kéng-gū
Ū-sî hó-thiⁿ ū-sî bū
Tô͘-bô͘ sè-sū bô choan-bū
Kái-piàn hoe-iūⁿ m̄ jīn-su
Oàn-thàn bô kùi-jîn sio-tú
Chiong-kî-bóe má-má-hu-hu
Hôe-kò͘ kòe-khì tōa-sió-sū
Ná chhin-chhiūⁿ o͘-hûn tà-bū
Lī-khui Siōng Chú ū kú-kú
Tio̍h hoán-hóe ōaⁿ sin khì kū
Chiap-siū Chú kau-thok jīm-bū
Chòe Chú tiōng-iōng ê khì-khū
Bô-lūn tú-tio̍h siáⁿ kéng-gū
Tio̍h thé-hōe Siōng Chú hong-hù
Ū hong ū éng bô sūn-sū
Siōng Chú chiok-hok bô khah su
Kan-lân chhì-liān óa-khò Chú
Khiàm-khoeh pìⁿ-chiâⁿ chòe pù-ū
