Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Tī góa kok-hāu-á it-nî ê sî, iok-lio̍k sī lio̍k-khóng nî-tāi, goán ū chi̍t ê chhiah-pê-pê ê cha-bó͘ lāu-su.
Ū chi̍t-pái, chi̍t ê tông-chhong, bô-tiuⁿ-tî khì jiá-tio̍h lāu-su, tì-sú lāu-su khì kah sim-kông-hóe-to̍h, tōa siaⁿ hiàm chit ê ha̍k-seng chhut-lâi khiā tī tâi-á-téng, hit ê gín-á-hiaⁿ khòaⁿ tio̍h lāu-su ê ok-bīn-khiuⁿ, sim-lāi chin kín-tiuⁿ, ba̍k-sái chha̍p-chha̍p-tin, phīⁿ-chúi siang-kóng lâu. In-ūi lāu-su si̍t-chāi khì kah tòng bē tiâu, chhut chhiú ū kàu kín, ǹg gín-á-hiaⁿ ê chhùi-phóe tōa-la̍t om–lòe-khì, hit-sî gín-á-hiaⁿ ê chhùi-phóe âng-kì-kì, lāu-su ê chhiú-tê liâm-thi-thi lóng sī phīⁿ-sái-kô͘ !
Chit ê cha-bó͘ lāu-su m̄-nā gâu siū-khì, kāu-sèng-tē koh chin iau-sâi, ta̍k-kang thàu-chá kàu ha̍k-hāu ê sî tō hiàm pan-tiúⁿ khì ha̍k-hāu-piⁿ thè i bé kho̍k-á-te lâi chò chá-tǹg, i sûi tī tāi-ke ê bīn-chêng tāi-sù-ki chia̍h kah chhùi-tûn iû-phè-phè, mā lóng m̄ kiaⁿ pháiⁿ-sè, hāi goán chit-tīn gín-á-thûn piàⁿ-sí thun-chhùi-nōa, lūn-chin-kóng goán sòa–loeh hit chiat khò, tha̍k ê lóng sī kho̍k-á-te!
