◎翁博文
1.
爸爸節日已訂定 做人子女愛遵行
逐時有孝咱攏知 此日孝行更加愛
天父大愛及萬民 賜互人人有父親
生咱養咱栽培咱 親情恩情大無限
我ê爸爸真偉大 活出基督芳味來
生阮飼阮五兄姊 困苦家境來長大
2.
農家子弟續父業 作穡汗水若絞汁
透早出門駛牛犁 瓜園防偷巡歸暝
穡頭蟲害噴農藥 日頭中央攏無息
身穿一領破鬃Sui 抵擋風雨毋驚雷
趕工搶收閃風颱 三冥三日拼命採
3.
全家生計他包辦 甘願勞苦無埋怨
對外一人應萬項 對內雜事毋驚煩
面對厝內大細項 跤步勤緊無怠慢
柴米油鹽茶醬醋 逐日需求他全顧
阮若著傷啲流血 給阮糊藥續止血
4.
乳齒換齒免牙醫 用線縛齒就挽它
飼豬閹豬兼獸醫 庄社鄰里有名氣
兄弟家伙分𣍐平 他做公親足公平
媒人包生囝號名 伴娶遠路透冥行
智謀取勝計上計 掌聲若雷響萬世
5.
聖工事奉無落伍 聖歌隊包第四部
中會辦教會聯誼 體能競賽逐項比
選派強手爭第一 弱小教會人選失
充數進場攏總比 看好強手攏輸他
鉛球一sak若射箭 鐵餅甩身揣無它
動作猛掠跤頭猛 走鏢若飛他上緊
6.
晚年投入精兵團 開拓教會用心專
團長任內有擔當 建立教會滿四方
敬愛爸爸感謝您 您ê偉大無可比
甚願爸爸猶健在 數念孝行做伙來
但如今卻是
數念爸爸滿天城 仰望天堂親愛爸爸您佇遐
