Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Che sī góa gín-á sî-tāi chhin ba̍k só͘ khòaⁿ-kìⁿ ê tāi-chì, chhim-chhim khek tī góa ê sim-lāi, sui-jiân keng-kè la̍k-cha̍p-tang, kàu taⁿ iáu-kú kì kah chin chheng-chhó, tī-chia kóng hō͘ tāi-ke thiaⁿ.
Kò͘-sū hoat-seng hit-kang ê chá-khí, chhài-chhī-á lāu-lia̍t kún-kún, lâi chia bé-bē ê lâng, e-e-tīn-tīn tùi ta̍k só͘-chāi lâi, kàu chhài-chhī-á chìn-chêng ê hit tiâu lō͘ ê nn̄g-pêng, ū chin-chōe chng-kha lâng taⁿ-chhài lâi bē, in-ūi chit tiâu lō͘ ê phài-chhut-só͘ bô ún-chún lâng tī lō͘-piⁿ pâi tàⁿ, só͘-í ū sûn-cha put-sî teh sûn-lô, hit-chūn ê sûn-cha io hâ té-chhèng, thâu tì pe̍h-bō-á, goán sî-kiâⁿ kā in kiò-chòe pe̍h-thâu-khok-á, in nā chhut-hiān ê sî, ū lâng ē hoah-hiu kóng “pe̍h-thâu-khok-á lâi–ah, kóaⁿ-kín-cháu”, hia-ê bē-chhài ê lâng thiaⁿ–tio̍h tō kóaⁿ-kín sì-sòaⁿ, cháu ná leh poe leh, liâm-piⁿ tō bô-khòaⁿ-iáⁿ, m̄-kú góa khòaⁿ-tio̍h chi̍t-ê taⁿ pa̍t-á lâi bē ê a-sáng, chhiú khan i ê sòe-kiáⁿ chún-pī beh cháu ê sî, soah hō͘ sûn-cha cháng-tio̍h, hit ê sûn-cha ok-khia̍k-khia̍k koh pháiⁿ-chhèng-chhèng, i chi̍t-chhiú kháiⁿ a-sáng ê chhài-nâ, chi̍t-chhiú chhiúⁿ i ê chhìn-á, tōa-siaⁿ hoah kóng: “Khòaⁿ lí beh cháu tùi tó ūi khì!” Chit ê khó-liân ê bē pa̍t-á a-sáng chiâⁿ kín-tiuⁿ, siang-kha kūi tī thô͘-kha kóng: “Tāi-jîn ah! Chhìn-á hêng–góa hó–bô? Chhìn-á hêng–góa hó–bô? Góa āu-pái m̄-káⁿ koh lâi pâi ah…” A-sáng ná kóng ná khàu, khàu-siaⁿ chin chhi-chhám, i ê sòe-kiáⁿ khiā tī a-bú ê sin-piⁿ, giú a-bú ê saⁿ-ki-bóe, kiaⁿ kah phī-phī-chhoah tōa-siaⁿ-háu, chit-khoán tiûⁿ-bīn si̍t-chāi chin pi-chhám, siūⁿ-bē-káu hit-ê ngī-sim ê sûn-cha, m̄-nā bô hêng a-sáng ê chhìn-á koh ēng kha tōa-la̍t tha̍t té pa̍t-á ê chhài-nâ-á, tì-sú kui nâ ê pa̍t-á liàn kah kui thô͘-kha, chit tùi bú-á-kiáⁿ chē tī thô͘-kha khàu bē thêng, in ê sim-lāi chin kan-khó͘, kin-á-ji̍t iáu bē thàn tio̍h chîⁿ, koh hō͘ sûn-cha bo̍k-siu chhìn-á, āu-pái ê ji̍t-chí m̄ chai beh án-chóaⁿ kòe, siūⁿ kàu chia ba̍k-sái it-tit lâu bē soah.
Hit chūn khòaⁿ-tio̍h hit chióng chêng-hêng ê góa, chin siūⁿ beh thè a-sáng kā chhìn-á chhiúⁿ–tńg-lâi, m̄-kú tng-sî góa iáu-kú sòe-hàn bô kàu khùi-la̍t, kan-ta ē-tàng kā siū-khì khǹg tī sim-lāi.
Goān chû-pi lîn-bín lâng ê Chú siúⁿ-sù un-tián hō͘ chit tùi khó-liân ê bú-á-kiáⁿ, ēng pêng-an lâi pó͘ pîⁿ in lāi-sim ê siong-hûn!
