Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
口述◉羅光喜
記錄◉林碧堂、王奕凱、江委螗、王美書
第 4 誡
「著記得安歇日守伊做聖。六日內恁著著磨，做恁一切ê工，獨獨第七日就是向耶和華──你ê上帝來守ê安歇。此日你及你ê子、查某子、奴僕、女婢、精牲、人客，一切ê工攏毋通做。因為六日內，耶和華創造天、地、海，及彼中間萬物，第七日就歇，所以耶和華賜福佇安息日，設立伊做聖。」這个「你及你ê子兒、查某子」，所以這个「你」是爸爸；「你」ê奴僕、女婢，表示這个「你」是頭家；伊若有牛，代表伊有犁田，所以伊有土地；伊若有駱駝，表示伊ē-tàng跨國做生理。這个「你」是做董事長ê。咱chit-má講ê拜五暗到拜六暗ê中間叫做安歇日。這條誡真明顯，是對做頭家ê咧講ê。咱若有做頭家ê，特別要注意。咱拄拄有做頭家ê去hǒng選著彰基董事，愛知影歇安歇日。有權有勢ê人愛chhōa頭歇睏。你若無歇睏，你ê下跤手欲按怎歇睏？
咱歇安歇日是欲創啥？爬山、看電影？咱歇安歇日是欲敬拜上帝。咱往過拜五暗有家庭禮拜。拜六規工攏是祈禱ê日子。「記得安歇日」毋是放縱私慾ê安歇。「記得安歇日」是欲守伊做聖。按怎守安歇日做聖？咱ê日子按怎有神聖？這親像往過ê修道院，透早八點精神，食飯了後種菜、種稻仔、飼羊、飼雞，巡巡ê了後無代誌，差不多十點，揣一个所在去歇、去祈禱。透早十點祈禱到下晡三、四點，了後閣去巡巡咧，食飯，閣欲來睏。古早時代ê靈修是睏足飽咧靈修。有時陣咱腹肚枵睏無飽，欲靈修是足困難，足亂，人際關係嘛無好勢。有時佇安歇ê中間，ē-tàng收煞、恢復精神，肉體、疲勞攏ho͘好勢，這是上好。
「著記得安歇日守伊做聖」，就是愛kap上帝交通，修道院ê祈禱無困難，你干焦會曉一句兩句嘛無要緊。希臘文ê歌，kyria’ kyria, ellson，「主啊，主啊，憐憫我」，中世紀ê祈禱其實足簡單。你欲對透早十點祈禱到下晡四點，至少一年有幾工愛按呢祈禱上好。事實上，你有法度祈禱超過五分鐘就算是足𠢕。免三分鐘，你祈禱「主，憐憫我，主，憐憫我，求主耶穌憐憫我」，就親像誠久誠想欲去盹龜。祈禱無遐簡單。佇愛睏、心神teh欲hō͘撒但giú去，隨時向彼个欲睏猶是欲kā你giú去ê氣力繼續祈禱：「主，憐憫我，主，憐憫我，求主耶穌憐憫我」。祈禱到hō͘咱ē-tàng真正注神看耶穌，求主耶穌憐憫我。佇祈禱ê中間，聖神會用講袂出ê吐氣陪伴咱祈禱。你過去是毋是講毋著話hō͘人艱苦，過去人按怎kā你傷害，你艱苦彼个代誌攏會走出來。一旦聖神kā咱人生過去ê任何事一項一項giú出來，隨時祈禱「主，憐憫我，主，憐憫我，求主耶穌憐憫我」，一項一項用祈禱，用耶穌ê救恩kā圍起來，祈禱到hō͘伊無去。你若有法度祈禱到過去攏總ê傷害攏走去，彼个時陣，你ê靈命才會清。咱大部分ê靈命是亂ê。咱會清ê時，才會感受著疼，聖神kā咱攬咧，咱親像安歇佇聖神ê懷抱。「安歇主懷」m̄-thang到喪禮抑愛送花ê時才寫。安歇主懷，安歇佇聖神ê懷抱，是咱佇每一个安歇日愛去領受ê。咱愛有一个時間，祈禱kah若親像hō͘聖神抱咧。任何放縱私欲ê安歇方式攏有副作用，干焦佇聖神懷抱ê安歇，才是正港對靈命健康帶來好處。咱ē-tàng來試看覓。
第 5 誡
「著孝敬你ê老爸你ê老母，hō͘你ê日子佇耶和華──你ê上帝所賞賜你ê地得著久長。」「孝敬爸母」，佇新約無翻譯做「孝敬」爸母，是翻譯做「敬重」爸母。巴克禮牧師翻譯ê時，發現佇新約「孝敬爸母」是翻譯毋著。「孝」這个字下面是「子」，頂面彼一撇是武士刀。啥物叫做「孝敬」？君要臣死，臣不得不死。身體髮膚，受之父母。若老爸欲kā你ê身軀收轉去咧？佇《封神榜》，三太子Lí Lô-chhia（李哪吒）ê老爸看囝無聽話，ka講：「你ê身軀是我生hō͘你ê！」Lí Lô-chhia講：「好，我ê身軀還你。」這个囡仔chŏaⁿ一條靈魂飛去，到尾仔有三蕊蓮花化身。雖然這是一个神話，總是這顯示古代某種東方ê宗教信仰抑是倫理，就是講囝兒ê身軀是爸母生ê；爸母有權柄kā囝兒ê身軀收倒轉來，所以爸母ē-tàng攑刀。有孝是爸母欲kā你ê身軀收轉來，你嘛袂當喊聲。聖經kám有這號概念？聖經無。聖經講性命是對上帝來，爸母無權柄kā囝兒ê身體收轉來。囝兒忤逆爸母，仝款愛掠去城門口，通過審判，有兩三个做見證，才ē-tàng判刑。
Kabad這个字佇聖經翻譯通常做「事奉上帝、榮耀上帝」，kabad ê意思就是足重ê。佇咱禮拜、佇咱生活ê中間，永遠用上帝做上重ê彼个對象，按呢叫做敬重上帝、事奉上帝。這个字佇第五誡是用佇爸母，意思就是你怎樣敬拜上帝，你就怎樣敬拜爸母；你怎樣事奉上帝，你就怎樣事奉爸母。因為上帝創造天地萬物賞賜性命，爸母仝款。是通過in kā你生出來。爸母ê生育是上帝ê創造kap賞賜。你按怎敬拜上帝，請你按怎敬重你ê爸母。上帝伊無出現，你也無看著上帝ê形象，無看著伊ê喙、伊ê手、伊ê跤，但是咱咧事奉聖殿，咱檢采咧掃塗跤，按呢咱咧事奉咱ê上帝。咱無看著上帝ê手，咱來掃塗跤，來替伊掃。伊kán-ná也無跤，所以咱愛做上帝ê跤，替上帝奔波。做上帝ê目睭，來看顧主日學ê學生抑是軟弱ê兄弟姊妹。咱咧事奉上帝就是講，咱逐禮拜來敬拜上帝一擺，逐個月來什一奉獻，用各種ê ho̍k-sāi（服事）來事奉上帝。
你按怎事奉上帝、敬拜上帝，你照按呢做佇你ê爸母ê身上。爸爸媽媽已經老花，你做伊ê目睭，讀報紙、讀冊、讀聖經ho͘聽。伊想欲講話毋閣講袂通光，你替伊講。伊ê手較無力通做，你做伊ê手替伊做。伊ê跤較袂行，你替伊走傱。逐禮拜咱來敬拜上帝，請你逐禮拜愛有一工去看你ê爸母。你有十分之一奉獻hō͘上帝，m̄-thang袂記，你嘛著有十分之一奉獻hō͘你ê爸母。所以這條誡命ê意思是，你若按呢做，你欲佇耶和華你ê上帝賞賜你ê地得著久長。這毋是講拍老爸、罵老母，這攏會受處罰死刑。佇馬可福音，有人講：「我已經獻hō͘上帝禮物，將應該hō͘爸母養生ê錢獻hō͘上帝。」上帝通過耶穌啟示，講：「毋對，毋是按呢。若是按呢，你嘛應該佇厝內提hō͘爸母。你有十箍，犧牲兩箍，一箍hō͘上帝，一箍hō͘爸母，你嘛猶有八箍。按怎付袂出來？」這是咱佇聖經看ê著ê。咱大部分是以經解經，用聖經中咧講ê來解說十條誡。 (後期koh刊)
延伸閱讀
