Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
口述◉羅光喜
記錄◉林碧堂、王奕凱、江委螗、王美書
第 6 誡
「毋通害死人」，中文ê翻譯和台語無仝。「毋通刣人」kap「毋通害死人」有啥無仝？到底Lo tirṣaḥ是欲譯做「毋通刣人」抑是「毋通謀殺」？「謀殺」就是故意設計犯罪kā人刣。「毋通刣人」，這是啥物刣攏袂使。司法官kā人判死刑ê刣kám ē-sái？戰爭ê時，為著欲保護某囝袂去hông欺負，著刣對方，這个刣ē-sái無？安樂死ē-sái無？táⁿ-thai墮胎ē-sái無？自殺ē-sái無？事實上，這是袂使刣人，包含袂使自殺，攏包含在內。
解說可能是較倚「毋通謀殺」。因為聖經內底，若有犯罪，有時會判死刑，所以毋是講攏總ê刣人攏袂用得，是干焦犯罪式ê刣人陷害袂用得。拍人拍到死，是會定死罪。袂使用詭計kā人刣，人若懷孕，你kā人害，嘛袂使。奴僕嘛袂當刣。牛若是kā人觸，著kā牛刣ho͘死，足濟相關ê經文。
咱嘛著進一步讀新約，馬太福音第5章，耶穌基督kā咱講：「恁有聽見有吩咐古早人講：『刣人ê人難免受審判。』只是我kā你講……」耶穌特別kā咱講「咱對兄弟姊妹受氣，著會受審判。」你罵人憨阿呆，罵人哪會chiah-nī無路用，會受地獄ê火。毋通害死人，毋通刣人，包含講話hō͘人艱苦，所以欲按怎講造就性ê話，莫去講hō͘人艱苦ê話。耶穌ê解說是到這款ê地步。
第 7 誡
第七誡，「毋通行姦淫」。這講婚前性行為、kap動物交合，以及嫁翁娶某了後，佇翁仔某以外有性ê行為，攏叫做行姦淫。婚前性行為著怎樣來辦？22章16節講，查埔人若是kap在室女行淫，查埔人ê聘金著交出來，娶伊做某。相關ê經文閣加一句「一世人袂使離婚」。所以，猶是毋通婚前有性ê行為。毋過這無遐爾簡單。到新約，耶穌講，「恁有聽著律法按呢教示講：『毋通姦淫。』 毋拘我kā給恁講，人若用邪念看婦女，已經佇心內犯姦淫。」所以目睭愛挖出來。少年ê時我看到遮，這是欲挖幾擺？咱看著查某囡仔，足濟攏足媠，按呢就定定犯姦淫。
毋通休妻離婚。為啥物袂使？兩個問題。一个是講，人性ê墜落，有三个慾望，會去hō͘撒但利用，一个是情慾，犯姦淫；一个是物質慾，直直買物件，浪費物件，欲囤積閣較濟物件；另外一个是權力慾，「我比你較大，我袂使hō͘你管，hō͘你管我會驚，我欲kā你管」，權力慾毋是欲侍奉上帝，變做管來管去，緊張來緊張去，攏無健康。
夫妻ê關係變做干焦情慾ê滿足，毋是上帝原來創造ê意思。所以佇遮講，毋通kap其他婦人人有情慾ê問題。情慾ê問題，一方面是咱ê情慾去hō͘魔鬼，去hō͘墜落ê天使利用去。閣一个麻煩要緊ê問題，是任何夫妻ê關係攏必須通過立約，咱講結婚ê婚約，結婚毋是男女誓約就完成矣，結婚是男女兩个kap上帝做伙立約，是佇上帝面前ê誓約。犯姦淫是褻瀆kap上帝kap咱立ê婚約，所以犯姦淫是咱無遵守上帝kap咱立ê約。結婚是按怎著chhōa來上帝面前禮拜閣誓約？（Chit-má登記就ē-sái。）為啥物愛按呢？注意，生湠ê氣力是上帝本身ê氣力，男女結婚會生囝，除非有特別ê恩賜，檢采是無hō͘你生囝ê責任。生育ê氣力對上帝來，這款創造性，性命ê生育袂使烏白生，有ê囡仔烏白生，若親像是hō͘人khian出來，毋是佇疼ê約內底。若是hō͘人khian出來，彼會艱苦，閣會產生社會動亂。無正常ê性命成長，問題會足濟。咱欲使用生產ê恩典，男女欲結合欲生囝，這个恩賜有伊快樂ê部分，但是嘛有生育ê責任，神聖ê一部分。這个氣力，欲使用ê代先，愛先chhōa來徛佇上帝ê面前，今仔日，阮兩个欲使用祢賞賜性、生湠ê氣力，阮佇祢ê面前，告白這个氣力對祢來，這个恩賜欲kap祢做伙立約ê中間，照祢ê旨意按呢來行。這是婚約ê意思。
第 8 誡
「毋通偷提。」財產權ê互相保障，出埃及記22章1～15節：「人若偷牽牛抑是羊，無論是掠去刣抑是牽去賣，一隻牛著賠五隻，一隻羊著賠四隻……關係侵占牛、驢、羊、衣服，抑是拍毋見物件的訴訟，若有人講『這是我的』，煞引起紛爭，雙方著去審判官遐；審判官若裁決什麼人有罪，彼個人著重倍賠伊的厝邊。若確實知牲生是互人偷牽去，受託的人著賠原主……。」逐家轉去讀。
第 9 誡
「毋通做假見證。」上帝ê面前咒詛毋通做假見證，佇法庭欲做證袂當烏白做假見證。若是你hō͘人抹黑做假見證，你就沒按呢，人卻講你有按呢，是毋是會真艱苦？所以上帝kā這誡囥佇遮。所以你ē-tàng看見法庭ê正義嘛是十條誡咧處理，所有法庭ê審判袂使有任何ê假ê證據，法官、律師、告方、被告一分證據說一分話，若是假ê毋通講出來，你講出來毋是干焦佇法庭你得到家己ê利益，毋是喔！你講出來你已經得罪上帝。這十條誡毋管你有信耶穌無信耶穌，十條誡是天地世界ê秩序維持。
第 10 誡
「毋通貪你ê厝邊ê厝、厝邊ê某、牛、驢、奴婢……」這點非常ê要緊，毋通貪。佇chit-má ê時代是按怎愛宣揚？這條誡無趕緊守，無偌久地球會總死，你知無？你kám知影為啥物？貪就是愈生產愈欲揣發展，愈發展愈大，趁錢欲愈趁愈濟，to已經有夠用閣一直欲趁，直直消費，這會發生啥物代誌？直直生產、直直消費、直直浪費、破壞，到尾仔就是地球ê環境壞去，資源用了了，後一代無通用，這對後一代無公平。Chit-má一堆氣候ê災難，風颱、siuⁿ熱、siuⁿ寒，無應該落雪落chiah這濟，應該結冰ê北極南極teh融冰。第二島鏈攏強欲沉入海nih：「享受你咧享受，沉阮咧沉，這世間無公平，上帝欲kā in審判……」無仝所在ê基督徒ê祈禱攏無仝。
若是咱chit-má kap咱ê後代囝孫無法度遵守「毋通貪」這誡，上帝ê攝理最後會結束。咱若欲久長hō͘後代閣有社會、世間ē-tàng生存，對chit-má愛開始追求一個物質免傷濟，但是屬靈ê活命真豐富ê生活。豐富ê生命毋是物質ê，是屬靈ê、親近上帝ê，佇聖神懷抱內面ê彼个快樂，毋是愛買足濟車、足濟音響、足濟物件彼款。
咱看著這十條誡，這毋是干焦咱兄弟姊妹信仰kap生活ê準則，嘛是咱傳福音愛有ê內容，愈緊愈好，愈慢這地球會愈害。咱ê社會欲較好，未來你閣會thang tòa，chit-má ê教會使命決定未來ê福氣。咱saⁿ-kap來祈禱：主上帝，祢ê話何等要緊，祢設立十條誡命欲建立祢ê家ê秩序，一定有祢ê意思，佇今仔日ê查經hō͘阮知影這个要緊性，阮也知影祢時刻kap阮同在。願祢hō͘祢ê教會成做受祢重用ê奴僕，對遮、對阮ê學生工作、對學校發展出去，佇未來因為閣較濟人遵守十條誡，hō͘阮、阮ê囝孫攏得著福氣，hō͘台中市成做一个健康ê都市，願主祢賜福hō͘教會ê教區，用祢所啟示ê十條誡做阮信仰kap生活ê準則，阮不配祈禱，奉主耶穌基督ê聖名，阿們！ (全文完)
