(請安裝Taigi Unicode字形，配合Firefox瀏覽器來讀)
作者：李南衡
會記得70年前、我作囝仔 ê 時陣，若有人佇長輩、頂司、官長 ê 頭前講一寡無應該講、真無適當、真失禮 ê 話，抑是有做出違反常理 ê 行為，作序大 ê 會佇尻川後、抑是事後叫來面前罵講：你 chit-ê 人真正是「目睫毛無漿湆（bak-chiah-mn̂g bô chiuⁿ-ám）」。類似 ê 情形，我 mā bat 聽人罵講：「目睭擗無金（bat-chiu peh bō kim）」、「m̄ -bat 芳臭（m̄ -bat phang chhàu）」。
是按怎有「目睫毛無漿湆」chit 句台灣俗語話？代先咱 tio̍h ùi「漿湆」講起。早前差不多每一個台灣家庭攏 mā 頭嘴真濟，煮飯 tio̍h 用大灶大鼎煮，通常攏會加下一寡水，等飯煮熟了後用竹蔑仔編 ê hia-á「飯耒」（pn̄g-lē），kā 飯 hô͘ 起來貯佇飯坩，因為「飯耒」有幼縫，湆會滴落去鼎底。「湆」就是飯湯飯汁，有人 the̍h 來準湯飲；有人 the̍h chit-ê 上營養 ê「湆」去飼豬，hô͘「粕」去 hō͘ 人食，感覺小可奇怪；有人洗白色 ê 外衫、咱台灣人學日本人講 ê 外來語叫作「oăi-siá-chuh」，因為早前紡織加工技術 ê 限制，外衫洗好曝焦了後會發現衫縐縐、無夠硬身無夠挺，若是 kā「oăi-siá-chu」洗了，先用湆漿過才 the̍h 去曝，特別是衫仔領會 koh 白 koh 挺，若用熨斗小熨一下 koh khah 讚。
是按怎會罵人「目睫毛無漿湆」咧？意思是講 hit-ê 人因為目睫毛無漿湆，目睫毛垂垂 khàm tio̍h 目睭，致使看代誌無清 bē 明，才會烏白講話抑是做出無啥道理 ê 行為來。
56年前1962年讀東海大學二年歇熱 ê 時，我頭一遍去日本，電車頂坐佇我邊仔一位日本小姐，伊 ê 目睫毛大板、小可虬虬 koh 是綠色 ê，伊目睭 nih 一下 nih 一下，我那像有聽 tio̍h phia̍t 一下 phia̍t 一下 ê 聲，我當時想講 chit-ê 日本小姐 ê 目睫毛漿湆 mā 未免漿了傷過頭。有機會我問日本朋友，是按怎 hit 工看 tio̍h ê 日本小姐目睫毛會生作 hiah 奇怪？日本朋友笑講：He 是假目睫毛、m̄ 是真 ê。我驚一 tiô！啥物？目睫毛也有假 ê？日本朋友笑講，m̄ -nā 目睫毛，頭毛、嘴齒、ne-ne，攏 mā 有假 ê，看慣勢 tio̍h bē 感覺奇怪。
現代科技發達，無管啥物布料啥物衫 beh 軟 beh 硬 beh 挻攏無問題，衫已經早 tio̍h 無人 teh 漿湆 ah。將來 mā 無人會知影啥物叫作「漿湆」。
10年、20年後，若有人講「目睫毛無漿湆」chit 句俗語話，少年人若問講「漿湆」是啥意思，真濟人 tio̍h 解說 bē 來，mài 講若有少年人問講：是按怎目睫毛 tio̍h 漿湆？相信大部分 ê「老大人」攏 m̄ 知 beh ùi 叼位講起才好。相信20年後，「目睫毛無漿湆」chit 句台灣俗語話無人會曉講。
李南衡《那teh褪色的台灣俗語話》（1-2冊 )已經出版，歡迎來交關，做伙進步
