◎馮喜秀
係愛隔開个病
基督教醫院五七三病房
像一隻生命个鳥仔侷在這
He oi kak-khôi ke phiang
Kî-tuk-kau yî-yan ńg-chhit-sâm phiang-fòng
Chhiong yit-chak sên-miang ke tiâu-è khiu̍k chhai yá
眠在病床望十字架
金亮个光環同 ngài 講
該係照耀世人个光
該係保守 ngài 等个力
Mìn chhai phiang-chhòng mong sṳ̍p-sṳ-ka
Kîm-liong ke kông-fàn thùng ngài kóng
Ke he cheu-yeu sṳ-ngìn ke kông
Ke he pó-sú ngài-tên ke li̍t
眠在病床望十字架
聆聽上主福音 ngài 日夜求喊默想
主啊 請原諒 ngài 無珍惜自家圓身
主啊 求汝莫離 ngài 恁遠遽來救 ngài
主啊 ngài 愛在汝个翼胛下保佑 等到所有个災難過去
主啊 ngài 一生人會享受汝个恩惠慈愛
主啊 ngài 愛用感謝个心唱詩歌讚美汝
Mìn chhai phiang-chhòng mong sṳ̍p-sṳ-ka
Lìn-thâng Song-chú fuk-yîm ngài ngit-ya khiù-ham me̍t-sióng
Chú-â chhiáng ngiàn-liong ngài mò chṳ̂n-siak chhit-kâ yàn-sṳ̂n
Chú-â khiù ǹg mo̍k lì ngài án yán kiak-lòi kiu-ngài
Chú-â ngài oi chhai ǹg-ke yi̍t-kap-hâ pó-yu tén-to só-yû ke chhâi-nan ko-hi
Chú-â ngài yit-sên-ngìn voi hióng-su ǹg ke ên-fi chhṳ̀-oi
Chú-â ngài oi yung kám-chhia ke sîm chhong sṳ̂-kô chan-mî ǹg
係肺發炎 支氣管大 毋係麼个肺癌 肺結核（肺癆）
先生个惜心上主个憐愛
He Hi fat-yàm chṳ̂-hi-kón-thai m̀ -he mak-ke Hi-ngàm Hi-kiat-he̍t (Hi-lò)
Sîn-sâng ke siak-sîm Song-chú ke lìn-oi
一個禮拜後
該胸腔个天空開陽還生咧
該隻生命个鳥仔還生咧
Yit-ke lî-pai heu
Ke hiûng-khiông ke thiên-khûng khôi-yòng vàn-sâng lè
Ke-chak sên-miang ke tiâu-é vàn-sâng lè
