無形 ê 選擇

◎陳俐雯

Ka-lí kap pn̄g kám it-tēng ài khǹg chò-hóe ?
咖哩佮飯敢一定愛囥做伙?
Chia̍h-chhài kám it-tēng tāi-piáu chû-pi ?
食菜敢一定代表慈悲?
Ài kap chêng kám it-tēng tàu sêng-siang ?
愛佮情敢一定鬥成雙?
Ū khiáu thâu-khak + choa̍t-tùi ê phah-piàⁿ kám it-tēng ē sêng-kong ?
有巧頭殼 + 絕對的拍拚敢一定會成功?

Bô-tek-khak, ōaⁿ chi̍t-ê chia̍h-hoat, kā ka-lí kap pn̄g hun–khui, lú hó-chia̍h
無的確,換一个食法,共咖哩佮飯分開,愈好食
Án bô-kâng ê kak-tō͘ su-khó chia̍h-chhài kap chû-pi ê koan-liân, lán ū khó-lêng hō͘ khek-pán ê ìn-siōng só͘ kan-gāi
按無仝的角度思考食菜佮慈悲的關連,咱有可能予刻板的印象所干礙
Ū ài kám it-tēng tō ū chêng, tī hiān-kim sī bô-choa̍t-tùi ah ! Ē-tàng khak-tēng ê sī siōng-ài kán-tan siōng-chhú lân
有愛敢一定就有情,佇現今是無絕對矣!會當確定的是相愛簡單相處難
Khiáu thâu-khak sī Siōng-tè siúⁿ-sù ê un-tián, put-jî-kò nā-bô ūn, koh-khah phah-piàⁿ mā bô-hāu
巧頭殼是上帝賞賜的恩典,不而過若無運,閣卡拍拚嘛無效

Sèⁿ-miā ū chin-chē cho͘-ha̍p phòe-tùi ê hêng-thài, ū lâng jīn-ûi chèng-siông tō-sī ài án-ne, mā ū lâng phō bô-kâng ê khòaⁿ-hoat, jīn-ûi……kám it-tēng tō ài án-ne ?
性命有真濟組合配對的形態,有人認為正常就是愛按呢,嘛有人抱無仝的看法,認為……敢一定就愛按呢?
Sûi-tio̍h sî-tāi khoân-kèng ê piàn-chhian, hòe-sò͘ ê cheng-tióng, seng-oa̍h ê bôa-liān
隨著時代環境的變遷,歲數的增長,生活的磨練
Tī seng-oa̍h keng-le̍k ê thé-giām hā, sán-seng bô-kâng ê siūⁿ-hoat
佇生活經歷的體驗下,產生無仝的想法

Tàu-té siáⁿ-mi̍h sī tio̍h ? Siáⁿ-mi̍h sī m̄ -tio̍h? Siáⁿ-mi̍h sī hó ? Siáⁿ-mi̍h sī m̄ -hó ?
到底啥物是著?啥物是毋著?啥物是好?啥物是毋好?
Choân pêng siā-hōe chú-liû, ka-têng bûn-hòa, kò-jîn kè-ta̍t-koan lâi pêng-tēng
全憑社會主流,家庭文化,個人價值觀來評定
M̄-koán lí ū ì-sek tio̍h–bô ! Ún-hêng ê ù-ìn chá tō leh éng-hióng
毋管你有意識著–無!隱形的烙印早就咧影響
Lí bû-hêng ê soán-tek í-keng chhòng-chō chhut lí chù-tiāⁿ ê pháu-tō
你無形的選擇已經創造出你註定的跑道

我有話要說