Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◎William Barclay
台譯◎陳惠雅
咱對拿但業ê認bat是ùi四福音內底兩tah經文來ê，伊是加利利ê迦拿（約翰福音21章2節）hia ê人，mā是腓力ê好朋友。腓力拄tio̍h耶穌了後，隨走去chhōe拿但業，kā伊講家己ê發現。腓力án-ne做，是因為伊相信拿撒勒人約瑟ê kiáⁿ耶穌是全律法kah先知所講ê中心人物——彌賽亞。M̄-koh，拿但業心內懷疑（後壁咱會看tio̍h拿但業這个態度ê另外一種可能ê解說），伊真oh-tit相信chiah-nī偉大ê人物會出現tī拿撒勒這款所在。M̄是因為拿撒勒這个所在ê名聲特別bái，是因為拿撒勒tī迦拿ê隔壁，兩个城離誠近，定定會為tio̍h競爭致到藐視對方。腓力無想beh浪費時間kap氣力hām拿但業爭論，伊邀請拿但業親身行一chōa去看māi。耶穌kā拿但業歡迎，講：「你看，真正是以色列人，心無khúi-khiat–ê。」（1章47節）拿但業感覺奇怪，耶穌哪會bat伊。耶穌kā拿但業講，腓力猶未叫伊進前，伊tō已經看見伊tī無花果樹跤。
想beh知影這句話ê意思，tō ài先明白無花果樹tī巴勒斯坦是私人ê產業，這款樹仔約略會發kah 15英尺koân，樹椏會當thòaⁿ到25英尺闊，通常是種tī徛家ê門跤口。另外，巴勒斯坦ê散赤人厝內通常kan-na有一間房間，個人若是想beh有家己安靜ê空間，定定會利用門前ê無花果樹，tī樹蔭跤祈禱抑是默想。所以，耶穌這句話ê意思是講：「拿但業，我有看見你tī hit个唯一會當hō͘你安靜ê所在，家己一个人tī hia虔誠祈禱；m̄-nā án-ne，我mā有看見你心內所向望ê代誌，知影你想beh搜chhōe啥物。」耶穌bōe輸上帝仝款，知影拿但業心內ê渴望（詩篇139篇2節），這个人竟然有神奇ê能力，通看thàng別人心內ê祕密，拿但業ê心內充滿驚hiâⁿ kap好玄，對耶穌講：「老師，祢tō是上帝ê Kiáⁿ，祢tō是以色列ê王。」因為án-ne，耶穌賜hō͘拿但業koh khah大ê應允，tō是伊會得tio̍h最後ê勝利，伊會成做榮耀ê見證人（約翰福音1章43～51節）。
拿但業到底是啥人？
拿但業這个人一直hō͘新約ê學者感覺真神祕，而且定定hŏng誤解是另外一个人。
1. 親像咱頭前講ê，拿但業定定hō͘人當做巴多羅買。這m̄是足早以前tō有人按呢講。可能是第九世紀大馬士革一个聶斯脫里派（Nestorianism，景教）、名號做伊利亞士ê人開始講ê。
2. Kā拿但業當做是迦南人西門。頭前咱mā有講過，tī新約ê次等抄本（inferior MSS）內面kā西門稱做Kananites，有一寡仔人誤認這字ê意思是「迦南地ê人」。約翰福音21章2節內底有寫拿但業是加利利ê迦拿人，所以學者mā認為這字ê意思是「迦拿地ê人」。其實這是無可能ê，因為西門根本m̄是迦拿地ê人，伊其實是一个Canannaean或者是Zealot（請參看本冊第十章「激進黨ê西門」）。
3. 主教埃匹發扭斯（Epiphanius of Salamis）根據一項咱無法度知影ê背景講拿但業是前往以馬忤斯路–ni̍h ê hit个無落名ê使徒（路加福音24章13～25節；Epiphanius, Heresies, 23）。Tī以馬忤斯路中拄tio̍h耶穌ê人，其中一个叫做革流巴，另外一个無講明伊ê名，埃匹發扭斯認為hit个tō是拿但業。
4. Mā有人講拿但業是主所愛ê hit个門徒——約翰。耶穌ǹg拿但業所講ê第一句話是：「恁看，伊是真正ê以色列人，攏無虛假。」（約翰福音1章47節，現代台語譯本2021版）耶穌ê意思是：「這个正正是我beh疼惜ê好門徒。」設使講拿但業kap耶穌做伙生活一站仔了後，確實變做主所疼ê門徒，若án-ne，這種講法tō無奇怪。
5. Siōng蓋趣味koh有創意ê理路是，有人kā拿但業當做是司提反。這種講法是根據耶穌對拿但業ê應允來ê——伊會看見天開，上帝ê天使tī人子ê頂面teh起起落落（1章51節）。司提反殉道ê時有看見天開，耶穌khiā tī上帝ê正爿（使徒行傳7章56節）。因為司提反所承受ê拄好是主應允拿但業ê，所以才會有人kā伊當做司提反。
其他ê主張雖罔嘛有趣味ê所在，m̄-koh拿但業若有影是使徒中間ê一个，伊必然是巴多羅買。
早期hia-ê偉大ê教父無認為拿但業列佇十二使徒ê中間，in ê理由是án-ne：拿但業是一个精通律法kap預言ê大學者。羅馬天主教ê學者kā拿但業稱做「律法博士」。奧古斯丁mā認為咱有充足ê理由相信拿但業m̄是十二使徒中間ê一个，因為耶穌來是beh呼召無學問ê人來改變這个世界（Augustine, Homilies on John, 7）。
額我略一世 （Gregory the Great，540～604年）mā贊同這个講法。耶穌對拿但業講ê頭一句話是呵咾ê話，講伊是一个正港ê以色列人，心內一點仔虛假tō無。照這个理路， 額我略一世認為拿但業無成做使徒，是因為耶穌beh揀選ê是本身lóng無啥thang好驕傲ê人，這是beh表明in ê成就m̄是倚靠家己，是全然倚靠上帝ê結果（Gregory the Great, Mor., 33）。
「拿但業是一个律法博士」這種想法koh是ùi佗位來ê？關係腓力講伊家己已經拄tio̍h耶穌這句話，差不多所有ê翻譯lóng kā拿但業ê回答當做質問：「拿撒勒hit款所在kám ē出啥物好物？」（約翰福音1章46節）Khah古早ê希臘文抄本無標點符號，若án-ne，拿但業所講ê話mā有可能m̄是質問，反轉是teh講事實。奧古斯丁講：「拿但業對聖經ê內容真了解，當伊聽見拿撒勒這个所在ê名，隨充滿期待kā腓力應：會有好ê úi拿撒勒出來。」M̄-koh真少人相信拿但業聽tio̍h腓力ê消息了後會隨應講：「是，你講ê無m̄-tio̍h！會有好ê ùi拿撒勒出來。」
是講，拿但業ná會成做偉大ê律法專家kap先知？馬太福音有描寫約瑟kap馬利亞去到拿撒勒ê情景：「In去到一个叫做拿撒勒ê城，to̍h tī hia tòa。這是beh應驗早前上帝交代先知所講ê話：祂beh叫做拿撒勒人。」（馬太福音2章23節）馬太這段經文是聖經中間神祕ê引言，因為無人會當證實這个預言koh講kah hō͘人滿意。In講拿但業對律法kap先知ê話chiah-nī清楚，而且koh確信這个預言，所以當然是一个專家。
這種講法聽起來不止仔有道理，m̄-koh，若用希臘話來解說拿但業所講ê這句話，可能會koh-khah自然，其中hit句「質問」其實是因為：拿但業根本看輕hit个伊早tō熟似ê所在——拿撒勒。
拿但業這个人
雖罔咱對拿但業ê了解真欠缺，m̄-koh若將手邊ê資料tàu-tàu-leh，mā ē-tàng淡薄仔看出伊這个人ê個性。
1.拿但業是一个聖經學者kap追求真理ê人。這點會當tùi腓力所講ê話得tio̍h證明：「摩西tī律法書所寫kah眾先知書所記載ê hit个，阮已經有tú–tio̍h。」（約翰福音1章45節）Tùi遮咱會當看出腓力kap拿但業in兩人bat開真濟時間思考聖經，研究彌賽亞生做啥款，伊會án-chóaⁿ臨到這个世界。腓力kap拿但業定定做伙搜chhōe真理，研究上帝ê話，這tō是為啥物當上帝ê kiáⁿ臨到ê時，in會當隨時認出來。
2.拿但業是一个正直ê人，是正港ê以色列人，心內無詭詐（1章47節）。這點會使tùi伊願意相信耶穌來做證明，因為伊原來m̄相信拿撒勒會出啥物人才。M̄-koh，當伊拄tio̍h耶穌了後，隨放棄家己以前ê歧視，相信目前所看tio̍h ê這个人。普拉莫（Plummer）論拿但業，講：「一个好人，雖然bat有偏見，m̄-koh mā真開通。」有ê人kan-taⁿ看tio̍h家己想beh看ê，m̄-koh拿但業ê正直hō͘伊得tio̍h真理，甚至放棄家己一切ê成見。
3.拿但業是一个迫切祈禱ê人。當耶穌看見伊ê時，伊tī無花果樹跤（1章49節），這段記事暗示伊m̄-nā常常tī hia默想，mā定定祈禱，伊迫切ê祈禱發出光，hō͘伊發見真理。
4.拿但業m̄是馬馬虎虎ê人。「祢tō是上帝ê Kiáⁿ，」伊對耶穌講：「祢tō是以色列ê王。」（1章49節）拿但業ê降服是完全ê降服，當伊發見耶穌基督ê時，伊知影家己心內hit个至尊至koân ê位tō是beh留hō͘耶穌ê。
5.拿但業是一个做代誌會堅持到底ê人。十字架ê苦痛事件了後，伊仝款kap使徒做伙（21章2節）。「祢tō是以色列ê王。」伊bat án-ne講，雖罔這个王是用十字架做伊ê王位，m̄-koh拿但業仝款相信伊。
咱若認定拿但業是巴多羅買，tō會當tùi新約知影伊ê款式：伊拍拚搜chhōe真理、迫切祈禱、完全降服佇基督；伊將信仰轉化做行動，mā是教會歷史中間真有冒險精神ê傳道者。
