Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Góa ê kò͘-hiong sī tī Lam-tâu-koān Tiong-liâu-hiong ê soaⁿ-téng bóe-liu, góa ê chó͘-sian chá-kî chin sàn-chia̍h, ūi-tio̍h beh seng-oa̍h, tō tùi Sin-tek pôaⁿ-soaⁿ-kòe-niá lâi kàu Tiong-liâu chit ê só͘-chāi khai-khún soaⁿ-nâ, tī hia tèng-kun siⁿ-thòaⁿ, chhōa-bó͘ siⁿ-kiáⁿ, kiàn-li̍p ka-têng, iúⁿ-chhī chi̍t-tē koh chi̍t-tē ê kiáⁿ-sun, in-ūi ū chó͘-sian ê ióng-kám kap phah-piàⁿ, chiah ū kin-á-ji̍t ê góa, goán lóng chin siàu-liām in.
Ē-kì-tit sòe-hān ê sî, tùi goán-tau khang-kiâⁿ kàu chhia-lō͘ iok-lio̍k ài cha̍p-gō͘ hun-cheng, nā sī ū phāiⁿ-tāng kiâⁿ-lō͘, tek-khak sī ài khah kú ê sî-kan. Tī hit ê nî-tāi, tōa-pō͘-hūn ê ka-têng keng-chè lóng bô-hó, chhiú-thâu ân-tòng-tòng, hit-chūn tō chin sî-kiâⁿ chhī-ti lâi thàn-chîⁿ, goán-tau mā sī kāng-khoán.
Goán chhī ti iok-lio̍k sī jī cha̍p kúi chiah, bē ti-á ê siu-ji̍p ài ēng lâi chò kui-nî-thàng-thiⁿ ê só͘-hùi, án-ni lín tō chai ti-á ê kak-sek tùi kui-ke-kháu-á lâi kóng sī jōa-nī tiōng-iàu, só͘-í ti-á tō tiāⁿ-tiāⁿ hō͘ lâng sioh-miā-miā, in jīn-chin chia̍h koh m̄-bián choh, kan-ta hū-chek chia̍h ho͘ pûi-pûi, kek-ho͘ thûi-thûi, goán ū sî mā ē him-siān chia–ê ti-á án-chóaⁿ hō͘ lâng hó khoán-thāi, hit-chūn goán iáu sòe-hàn bē-hiáu siūⁿ, ū sî sim-chêng nā bô hó ê sî, mā ē kám-kak ka-kī pí ti-á khah pháiⁿ-miā, m̄-kú nā khòaⁿ-tio̍h ti beh hō͘ lâng lia̍h khì thâi ê sî, hit khoán ai-pē-kiò-bó, háu kah chiâⁿ tōa-siaⁿ, goán chiū chheng-chhíⁿ khí–lâi.
Ti-á ê kè-siàu nā hó, tōa-lâng chiū hoaⁿ-thâu-hí-bīn, nā bái, chiū iû-tâu-kat-bīn, gín-á-lâng lóng sī chia̍h pn̄g-khaⁿ tiong-ng–ê, m̄ chai-iáⁿ khin-tāng, ū-sî tōa-lâng nā kiò goán khì kòa ti-chhài lâi chhī ti tō m̄-chêng-m̄-goān, ná chai, lāu-pē kóng: “lí kan-ta kòa ti-chhài hō͘ i chia̍h niā-niā, i ài kòa bah hō͘ lí kau chheh-hùi, bô, lí kah i kau-ōaⁿ hó–bô?”, ta̍k-pái góa nā thiaⁿ-tio̍h chit kù ōe, thâu-khak tō cheng-sîn–ah.
Tán ti-á pûi ê sî, tōa-lâng tō ē hiàm ti-hoàn-á lâi lia̍h ti, in chi̍t-pái lâi sí-ê lâng, nn̄g-ê lâng chi̍t-cho͘ chòe-hé kng chi̍t-chiah ti-á kiâⁿ khì chhia-lō͘ chiūⁿ-chhia, ti-á sī tāng-hoâiⁿ-hoâiⁿ, kng ê kòe-thêng chin kan-khó͘, tèⁿ kah kiò-m̄-káⁿ, góa siūⁿ, nā beh thàn chit-khoán chîⁿ mā bô kán-tan.
Góa koh ē kì-tit chi̍t-ê chhù-bī ê tāi-chì, in-ūi soaⁿ-lō͘ chin pháiⁿ kiâⁿ, tì-sú ti-ko nā pè kàu soaⁿ-téng tō í-keng thiám kah bô khùi-la̍t lâi thàn-chîⁿ, só͘-í khan-ti-ko ê sai-hū lóng bē ài chiap chit-khoán ê sit-thâu, goán lāu-pē tō óng-óng ài khì chhōe siù-i bé goân-liāu lai thè ti-bó thoân-chong chiap-tāi, thiaⁿ-kóng goán lāu-pē ê kang-hu bē-bái, i só͘ phah-chéng ê ti-bó kài gâu-siⁿ.
Goán chng-thâu ū ch t-khoán hong-sio̍k, ti-bó nā siⁿ-kiáⁿ liáu āu, chú-lâng ē khì soaⁿ-khe-á chhōe àm-kong-sai (mô͘-hē) kap khe-hê-á lâi chú nn̄g-chiú kā ti-bó chò gē-lāi, ti̍t-kàu móa-goe̍h hit kang, tōa-lâng mā ē so-îⁿ-á lâi khèng-chiok, siūⁿ–khì-lâi téng-iân ê lâng mā chiok kám-sim, chai-iáⁿ chò lâng ài ím-súi su-goân, chia̍h ké-chí pài chhiū-thâu, góa te̍k-pia̍t siá chi̍t ê kò͘-sū lâi kì-liām in.
